प्रजापतिः सुवर्गं लोकम् ऐत् तं देवा येनयेन छन्दसाऽनु प्रायुञ्जत तेन नाऽऽप्नुवन् त एता द्वात्रिꣳशतꣳ रात्रीर् अपश्यन् द्वात्रिꣳशदक्षरानुष्टुग् आनुष्टुभः प्रजापतिः स्वेनैव छन्दसा प्रजापतिम् आप्त्वाभ्यारुह्य सुवर्गं लोकम् आयन् य एवं विद्वाꣳस एता आसते द्वात्रिꣳशद् एताः । द्वात्रिꣳशदक्षरानुष्टुग् आनुष्टुभः प्रजापतिः स्वेनैव छन्दसा प्रजापतिम् आप्त्वा श्रियं गच्छन्ति । श्रीर् हि मनुष्यस्य सुवर्गो लोकः । द्वात्रिꣳशद् एताः । द्वात्रिꣳशदक्षरानुष्टुग् वाग् अनुष्टुप् सर्वाम् एव वाचम् आप्नुवन्ति सर्वे वाचो वदितारो भवन्ति सर्वे हि श्रियं गच्छन्ति ज्योतिर् गौर् आयुर् इति त्र्यहा भवन्ति । इयं वाव ज्योतिर् अन्तरिक्षं गौर् असाव् आयुर् इमान् एव लोकान् अभ्यारोहन्ति । अभिपूर्वं त्र्यहा भवन्ति । अभिपूर्वम् एव सुवर्गं लोकम् अभ्यारोहन्ति बृहद्रथंतराभ्यां यन्ति । इयं वाव रथंतरम् असौ बृहत् । आभ्याम् एव यन्ति । अथो अनयोर् एव प्रति तिष्ठन्ति । एते वै यज्ञस्याञ्जसायनी स्रुती ताभ्याम् एव सुवर्गं लोकं यन्ति पराञ्चो वा एते सुवर्गं लोकम् अभ्यारोहन्ति ये पराचस् त्र्यहान् उपयन्ति प्रत्यङ् त्र्यहो भवति प्रत्यवरूढ्या अथो प्रतिष्ठित्यै । उभयोर् लोकयोर् ऋद्ध्वोत् तिष्ठन्ति द्वात्रिꣳशद् एतास् तासां यास् त्रिꣳशत् त्रिꣳशदक्षरा विराड् अन्नं विराड् विराजैवान्नाद्यम् अव रुन्धते ये द्वे अहोरात्रे एव ते उभाभ्याꣳ रूपाभ्याꣳ सुवर्गं लोकं यन्ति । अतिरात्राव् अभितो भवतः परिगृहीत्यै ॥
prajāpatiḥ suvargaṃ lokam ait taṃ devā yenayena chandasā'nu prāyuñjata tena nā''pnuvan ta etā dvātrim̐śatam̐ rātrīr apaśyan dvātrim̐śadakṣarānuṣṭug ānuṣṭubhaḥ prajāpatiḥ svenaiva chandasā prajāpatim āptvābhyāruhya suvargaṃ lokam āyan ya evaṃ vidvām̐sa etā āsate dvātrim̐śad etāḥ | dvātrim̐śadakṣarānuṣṭug ānuṣṭubhaḥ prajāpatiḥ svenaiva chandasā prajāpatim āptvā śriyaṃ gacchanti | śrīr hi manuṣyasya suvargo lokaḥ | dvātrim̐śad etāḥ | dvātrim̐śadakṣarānuṣṭug vāg anuṣṭup sarvām eva vācam āpnuvanti sarve vāco vaditāro bhavanti sarve hi śriyaṃ gacchanti jyotir gaur āyur iti tryahā bhavanti | iyaṃ vāva jyotir antarikṣaṃ gaur asāv āyur imān eva lokān abhyārohanti | abhipūrvaṃ tryahā bhavanti | abhipūrvam eva suvargaṃ lokam abhyārohanti bṛhadrathaṃtarābhyāṃ yanti | iyaṃ vāva rathaṃtaram asau bṛhat | ābhyām eva yanti | atho anayor eva prati tiṣṭhanti | ete vai yajñasyāñjasāyanī srutī tābhyām eva suvargaṃ lokaṃ yanti parāñco vā ete suvargaṃ lokam abhyārohanti ye parācas tryahān upayanti pratyaṅ tryaho bhavati pratyavarūḍhyā atho pratiṣṭhityai | ubhayor lokayor ṛddhvot tiṣṭhanti dvātrim̐śad etās tāsāṃ yās trim̐śat trim̐śadakṣarā virāḍ annaṃ virāḍ virājaivānnādyam ava rundhate ye dve ahorātre eva te ubhābhyām̐ rūpābhyām̐ suvargaṃ lokaṃ yanti | atirātrāv abhito bhavataḥ parigṛhītyai ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.