यो वा अग्नाव् अग्निः प्रह्रियते यश् च सोमो राजा तयोर् एष आतिथ्यं यद् अग्नीषोमीयः । अथैष रुद्रो यश् चीयते यत् संचिते ऽग्नाव् एतानि हवीꣳषि न निर्वपेत् । एष एव रुद्रो ऽशान्त उपोत्थाय प्रजाम् पशून् यजमानस्याभि मन्येत यत् संचिते ऽग्नाव् एतानि हवीꣳषि निर्वपति भागधेयेनैवैनꣳ शमयति नास्य रुद्रो ऽशान्तः उपोत्थाय प्रजाम् पशून् अभि मन्यते दश हवीꣳषि भवन्ति नव वै पुरुषे प्राणा नाभिर् दशमी प्राणान् एव यजमाने दधाति । अथो दशाक्षरा विराड् अन्नं विराड् विराज्य् एवान्नाद्ये प्रति तिष्ठति । ऋतुभिर् वा एष छन्दोभिः स्तोमैः पृष्ठैश् चेतव्य इत्य् आहुः । यद् एतानि हवीꣳषि निर्वपत्य् ऋतुभिर् एवैनं छन्दोभिः स्तोमैः पृष्ठैश् चिनुते दिशः सुषुवाणेन अभिजित्या इत्य् आहुः । यद् एतानि हवीꣳषि निर्वपति दिशाम् अभिजित्यै । एतया वा इन्द्रं देवा अयाजयन् तस्माद् इन्द्रसवः । एतया मनुम् मनुष्यास् तस्मान् मनुसवः । यथेन्द्रो देवानां यथा मनुर् मनुष्याणाम् एवम् भवति य एवं विद्वान् एतयेष्ट्या यजते दिग्वतीः पुरोऽनुवाक्या भवन्ति सर्वासां दिशाम् अभिजित्यै ॥
yo vā agnāv agniḥ prahriyate yaś ca somo rājā tayor eṣa ātithyaṃ yad agnīṣomīyaḥ | athaiṣa rudro yaś cīyate yat saṃcite 'gnāv etāni havīm̐ṣi na nirvapet | eṣa eva rudro 'śānta upotthāya prajām paśūn yajamānasyābhi manyeta yat saṃcite 'gnāv etāni havīm̐ṣi nirvapati bhāgadheyenaivainam̐ śamayati nāsya rudro 'śāntaḥ upotthāya prajām paśūn abhi manyate daśa havīm̐ṣi bhavanti nava vai puruṣe prāṇā nābhir daśamī prāṇān eva yajamāne dadhāti | atho daśākṣarā virāḍ annaṃ virāḍ virājy evānnādye prati tiṣṭhati | ṛtubhir vā eṣa chandobhiḥ stomaiḥ pṛṣṭhaiś cetavya ity āhuḥ | yad etāni havīm̐ṣi nirvapaty ṛtubhir evainaṃ chandobhiḥ stomaiḥ pṛṣṭhaiś cinute diśaḥ suṣuvāṇena abhijityā ity āhuḥ | yad etāni havīm̐ṣi nirvapati diśām abhijityai | etayā vā indraṃ devā ayājayan tasmād indrasavaḥ | etayā manum manuṣyās tasmān manusavaḥ | yathendro devānāṃ yathā manur manuṣyāṇām evam bhavati ya evaṃ vidvān etayeṣṭyā yajate digvatīḥ puro'nuvākyā bhavanti sarvāsāṃ diśām abhijityai ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.