समान्य ऋचो भवन्ति मनुष्यलोको वा ऋचः । मनुष्यलोकाद् एव न यन्ति । अन्यदन्यत् साम भवति देवलोको वै साम देवलोकाद् एवान्यमन्यम् मनुष्यलोकम् प्रत्यवरोहन्तो यन्ति जगतीम् अग्रे उप यन्ति जगतीं वै छन्दाꣳसि प्रत्यवरोहन्त्य् आग्रयणं ग्रहा बृहत् पृष्ठानि त्रयस्त्रिꣳशꣳ स्तोमास् तस्माज् ज्यायाꣳसं कनीयान् प्रत्यवरोहति वैश्वकर्मणो गृह्यते विश्वान्य् एव तेन कर्माणि यजमाना अव रुन्धते । आदित्यः गृह्यते । इयं वा अदितिः । अस्याम् एव प्रति तिष्ठन्ति । अन्योऽन्यो गृह्येते मिथुनत्वाय प्रजात्यै । अवान्तरं वै दशरात्रेण प्रजापतिः प्रजा असृजत यद् दशरात्रो भवति प्रजा एव तद् यजमानाः सृजन्ते । एताꣳ ह वा उदङ्कः शौल्बायनः सत्त्रस्यर्द्धिम् उवाच यद् दशरात्रः । यद् दशरात्रो भवति सत्त्रस्यर्द्ध्यै । अथो यद् एव पूर्वेष्व् अहःसु विलोम क्रियते तस्यैवैषा शान्तिः ॥
samānya ṛco bhavanti manuṣyaloko vā ṛcaḥ | manuṣyalokād eva na yanti | anyadanyat sāma bhavati devaloko vai sāma devalokād evānyamanyam manuṣyalokam pratyavarohanto yanti jagatīm agre upa yanti jagatīṃ vai chandām̐si pratyavarohanty āgrayaṇaṃ grahā bṛhat pṛṣṭhāni trayastrim̐śam̐ stomās tasmāj jyāyām̐saṃ kanīyān pratyavarohati vaiśvakarmaṇo gṛhyate viśvāny eva tena karmāṇi yajamānā ava rundhate | ādityaḥ gṛhyate | iyaṃ vā aditiḥ | asyām eva prati tiṣṭhanti | anyo'nyo gṛhyete mithunatvāya prajātyai | avāntaraṃ vai daśarātreṇa prajāpatiḥ prajā asṛjata yad daśarātro bhavati prajā eva tad yajamānāḥ sṛjante | etām̐ ha vā udaṅkaḥ śaulbāyanaḥ sattrasyarddhim uvāca yad daśarātraḥ | yad daśarātro bhavati sattrasyarddhyai | atho yad eva pūrveṣv ahaḥsu viloma kriyate tasyaivaiṣā śāntiḥ ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.