Vājasaneyi Saṃhitā (Śukla Yajurveda, as given on Wikisource) 13

मयि गृह्णाम्य् अग्रे ऽ अग्निꣳ रायस्पोषाय सुप्रजास्त्वाय सुवीर्याय । माम् उ देवताः सचन्ताम् ॥

mayi gṛhṇāmy agre ' agnim̐ rāyaspoṣāya suprajāstvāya suvīryāya | mām u devatāḥ sacantām ||

Sanskrit only: no published translation is held for this verse.

अपां पृष्ठम् असि योनिर् अग्नेः समुद्रम् अभितः पिन्वमानम् । वर्धमानो महाँ२ ऽ आ च पुष्करे दिवो मात्रया वरिम्णा प्रथस्व ॥

apāṃ pṛṣṭham asi yonir agneḥ samudram abhitaḥ pinvamānam | vardhamāno mahā~2 ' ā ca puṣkare divo mātrayā varimṇā prathasva ||

Sanskrit only: no published translation is held for this verse.

ब्रह्म जज्ञानं प्रथमं पुरस्ताद् वि सीमतः सुरुचो वेन ऽ आवः । स बुध्न्या ऽ उपमा ऽ अस्य विष्ठाः सतश् च योनिम् असतश् च वि वः ॥

brahma jajñānaṃ prathamaṃ purastād vi sīmataḥ suruco vena ' āvaḥ | sa budhnyā ' upamā ' asya viṣṭhāḥ sataś ca yonim asataś ca vi vaḥ ||

Sanskrit only: no published translation is held for this verse.

हिरण्यगर्भः सम् अवर्तताग्रे भूतस्य जातः पतिर् एक ऽ आसीत् । स दाधार पृथिवीं द्याम् उतेमां कस्मै देवाय हविषा विधेम ॥

hiraṇyagarbhaḥ sam avartatāgre bhūtasya jātaḥ patir eka ' āsīt | sa dādhāra pṛthivīṃ dyām utemāṃ kasmai devāya haviṣā vidhema ||

द्रप्सश् चस्कन्द पृथिवीम् अनु द्याम् इमं च योनिम् अनु यश् च पूर्वः । समानं योनिम् अनु संचरन्तं द्रप्सं जुहोम्य् अनु सप्त होत्राः ॥

drapsaś caskanda pṛthivīm anu dyām imaṃ ca yonim anu yaś ca pūrvaḥ | samānaṃ yonim anu saṃcarantaṃ drapsaṃ juhomy anu sapta hotrāḥ ||

नमोऽस्तु सर्पेभ्यो ये के च पृथिवीम् अनु । ये ऽ अन्तरिक्षे ये दिवि तेभ्यः सर्पेभ्यो नमः ॥

namo'stu sarpebhyo ye ke ca pṛthivīm anu | ye ' antarikṣe ye divi tebhyaḥ sarpebhyo namaḥ ||

Sanskrit only: no published translation is held for this verse.

या ऽ इषवो यातुधानानां ये वा वनस्पतीꣳ१ ऽरनु । ये वावटषु शेरते तेभ्यः सर्पेभ्यो नमः ॥

yā ' iṣavo yātudhānānāṃ ye vā vanaspatīm̐1 'ranu | ye vāvaṭaṣu śerate tebhyaḥ sarpebhyo namaḥ ||

Sanskrit only: no published translation is held for this verse.

ये वामी रोचने दिवो ये वा सूर्यस्य रश्मिषु । येषाम् अप्सु सदस् कृतं तेभ्यः सर्पेभ्यो नमः ॥

ye vāmī rocane divo ye vā sūryasya raśmiṣu | yeṣām apsu sadas kṛtaṃ tebhyaḥ sarpebhyo namaḥ ||

Sanskrit only: no published translation is held for this verse.

कृणुष्व पाजः प्रसितिं न पृथ्वीं याहि राजेवामवाँ२ ऽ इभेन । तृष्वीम् अनु प्रसितिं द्रूणानो ऽस्तासि विध्य रक्षसस् तपिष्ठैः ॥

kṛṇuṣva pājaḥ prasitiṃ na pṛthvīṃ yāhi rājevāmavā~2 ' ibhena | tṛṣvīm anu prasitiṃ drūṇāno 'stāsi vidhya rakṣasas tapiṣṭhaiḥ ||

तव भ्रमास ऽ आशुया पतन्त्य् अनु स्पृश धृषता शोशुचानः । तपूꣳष्य् अग्ने जुह्वा पतङ्गान् असंदितो वि सृज विष्वग् उल्काः ॥

tava bhramāsa ' āśuyā patanty anu spṛśa dhṛṣatā śośucānaḥ | tapūm̐ṣy agne juhvā pataṅgān asaṃdito vi sṛja viṣvag ulkāḥ ||

प्रति स्पशो वि सृज तूर्णितमो भवा पायुर् विशो ऽ अस्या अदब्धः । यो नो दूरे ऽ अघशꣳसो यो ऽ अन्त्य् अग्ने माकिष् टे व्यथिर् आ दधर्षीत् ॥

prati spaśo vi sṛja tūrṇitamo bhavā pāyur viśo ' asyā adabdhaḥ | yo no dūre ' aghaśam̐so yo ' anty agne mākiṣ ṭe vyathir ā dadharṣīt ||

उद् अग्ने तिष्ठ प्रत्य् आ तनुष्व न्य् अमित्राँ२ ऽ ओषतात् तिग्महेते । यो नो ऽ अरातिꣳ समिधान चक्रे नीचा तं धक्ष्य् अतसं न शुष्कम् ॥

ud agne tiṣṭha praty ā tanuṣva ny amitrā~2 ' oṣatāt tigmahete | yo no ' arātim̐ samidhāna cakre nīcā taṃ dhakṣy atasaṃ na śuṣkam ||

ऊर्ध्वो भव प्रति विध्याध्य् अस्मद् आविष् कृणुष्व दैव्यान्य् अग्ने । अव स्थिरा तनुहि यातुजूनां जामिम् अजामिं प्र मृणीहि शत्रून् । अग्नेष् ट्वा तेजसा सादयामि ॥

ūrdhvo bhava prati vidhyādhy asmad āviṣ kṛṇuṣva daivyāny agne | ava sthirā tanuhi yātujūnāṃ jāmim ajāmiṃ pra mṛṇīhi śatrūn | agneṣ ṭvā tejasā sādayāmi ||

Sanskrit only: no published translation is held for this verse.

अग्निर् मूर्धा दिवः ककुत् पतिः पृथिव्या ऽ अयम् । अपाꣳ रेताꣳसि जिन्वति । इन्द्रस्य त्वौजसा सादयामि ॥

agnir mūrdhā divaḥ kakut patiḥ pṛthivyā ' ayam | apām̐ retām̐si jinvati | indrasya tvaujasā sādayāmi ||

Sanskrit only: no published translation is held for this verse.

भुवो यज्ञस्य रजसश् च नेता यत्रा नियुद्भिः सचसे शिवाभिः । दिवि मूर्धानं दधिषे स्वर्षां जिह्वाम् अग्ने चक्रिषे हव्यवाहम् ॥

bhuvo yajñasya rajasaś ca netā yatrā niyudbhiḥ sacase śivābhiḥ | divi mūrdhānaṃ dadhiṣe svarṣāṃ jihvām agne cakriṣe havyavāham ||

ध्रुवासि धरुणास्तृता विश्वकर्मणा । मा त्वा समुद्रऽउद् वधीन् मा सुपर्णोऽव्यथमाना पृथिवीं दृꣳह ॥

dhruvāsi dharuṇāstṛtā viśvakarmaṇā | mā tvā samudra'ud vadhīn mā suparṇo'vyathamānā pṛthivīṃ dṛm̐ha ||

Sanskrit only: no published translation is held for this verse.

प्रजापतिष् ट्वा सादयत्व् अपा पृष्ठे समुद्रस्येमन् । व्यचस्वतीं प्रथस्वतीं प्रथस्व पृथिव्यसि ॥

prajāpatiṣ ṭvā sādayatv apā pṛṣṭhe samudrasyeman | vyacasvatīṃ prathasvatīṃ prathasva pṛthivyasi ||

Sanskrit only: no published translation is held for this verse.

भूर् असि भूमिर् अस्य् अदितिर् असि विश्वधाया विश्वस्य भुवनस्य धर्त्री । पृथिवीं यच्छ पृथिवीं दृꣳह पृथिवीं मा हिꣳसीः ॥

bhūr asi bhūmir asy aditir asi viśvadhāyā viśvasya bhuvanasya dhartrī | pṛthivīṃ yaccha pṛthivīṃ dṛm̐ha pṛthivīṃ mā him̐sīḥ ||

Sanskrit only: no published translation is held for this verse.

विश्वस्मै प्राणायापानाय व्यानायोदानाय प्रतिष्ठायै चरित्राय । अग्निष् ट्वाभि पातु मह्या स्वस्त्या छर्दिषा शंतमेन तया देवतयाङ्गिरस्वद् ध्रुवा सीद ॥

viśvasmai prāṇāyāpānāya vyānāyodānāya pratiṣṭhāyai caritrāya | agniṣ ṭvābhi pātu mahyā svastyā chardiṣā śaṃtamena tayā devatayāṅgirasvad dhruvā sīda ||

Sanskrit only: no published translation is held for this verse.

काण्डात्-काण्डात् प्ररोहन्ती परुषः-परुषस् परि । एवा नो दूर्वे प्र तनु सहस्रेण शतेन च ॥

kāṇḍāt-kāṇḍāt prarohantī paruṣaḥ-paruṣas pari | evā no dūrve pra tanu sahasreṇa śatena ca ||

Sanskrit only: no published translation is held for this verse.

या शतेन प्रतनोषि सहस्रेण विरोहसि । तस्यास् ते देवीष्टके विधेम हविषा वयम् ॥

yā śatena pratanoṣi sahasreṇa virohasi | tasyās te devīṣṭake vidhema haviṣā vayam ||

Sanskrit only: no published translation is held for this verse.

यास् ते ऽ अग्ने सूर्ये रुचो दिवम् आतन्वन्ति रश्मिभिः । ताभिर् नो ऽ अद्य सर्वाभी रुचे जनाय नस् कृधि ॥

yās te ' agne sūrye ruco divam ātanvanti raśmibhiḥ | tābhir no ' adya sarvābhī ruce janāya nas kṛdhi ||

Sanskrit only: no published translation is held for this verse.

या वो देवाः सूर्ये रुचो गोष्व् अश्वेषु या रुचः । इन्द्राग्नी ताभिः सर्वाभी रुचं नो धत्त बृहस्पते ॥

yā vo devāḥ sūrye ruco goṣv aśveṣu yā rucaḥ | indrāgnī tābhiḥ sarvābhī rucaṃ no dhatta bṛhaspate ||

Sanskrit only: no published translation is held for this verse.

विराड् ज्योतिर् अधारयत् । स्वराड् ज्योतिर् अधारयत् । प्रजापतिष् ट्वा सादयतु पृष्ठे पृथिव्या ज्योतिष्मतीम् । विश्वस्मै प्राणायापानाय व्यानाय विश्वं ज्योतिर् यच्छ । अग्निष्टे ऽधिपतिस् तया देवतयाङ्गिरस्वद् ध्रुवा सीद ॥

virāḍ jyotir adhārayat | svarāḍ jyotir adhārayat | prajāpatiṣ ṭvā sādayatu pṛṣṭhe pṛthivyā jyotiṣmatīm | viśvasmai prāṇāyāpānāya vyānāya viśvaṃ jyotir yaccha | agniṣṭe 'dhipatis tayā devatayāṅgirasvad dhruvā sīda ||

Sanskrit only: no published translation is held for this verse.

मधुश् च माधवश् च वासन्तिकाव् ऋतू ऽ अग्नेर् अन्तःश्लेषोऽसि कल्पेतां द्यावापृथिवी कल्पन्ताम् आप ऽ ओषधयः कल्पन्ताम् अग्नयः पृथङ् नम ज्यैष्ठ्याय सव्रताः । ये ऽ अग्नयः समनसो ऽन्तरा द्यावापृथिवी ऽ इमे वासन्तिकाव् ऋतू ऽअभिकल्पमाना ऽ इन्द्रम् इव देवा ऽ अभिसंविशन्तु तया देवतयाङ्गिरस्वद् ध्रुवे सीदतम् ॥

madhuś ca mādhavaś ca vāsantikāv ṛtū ' agner antaḥśleṣo'si kalpetāṃ dyāvāpṛthivī kalpantām āpa ' oṣadhayaḥ kalpantām agnayaḥ pṛthaṅ nama jyaiṣṭhyāya savratāḥ | ye ' agnayaḥ samanaso 'ntarā dyāvāpṛthivī ' ime vāsantikāv ṛtū 'abhikalpamānā ' indram iva devā ' abhisaṃviśantu tayā devatayāṅgirasvad dhruve sīdatam ||

Sanskrit only: no published translation is held for this verse.

अषाढासि सहमाना सहस्वारातीः सहस्व पृतनायतः । सहस्रवीर्यासि सा मा जिन्व ॥ मधु वाता ऽ ऋतायते मधु क्षरन्ति सिन्धवः । माध्वीर् नः सन्त्व् ओषधीः ॥

aṣāḍhāsi sahamānā sahasvārātīḥ sahasva pṛtanāyataḥ | sahasravīryāsi sā mā jinva || madhu vātā ' ṛtāyate madhu kṣaranti sindhavaḥ | mādhvīr naḥ santv oṣadhīḥ ||

Sanskrit only: no published translation is held for this verse.

मधु नक्तम् उतोषसो मधुमत् पार्थिवꣳ रजः । मधु द्यौर् अस्तु नः पिता ॥

madhu naktam utoṣaso madhumat pārthivam̐ rajaḥ | madhu dyaur astu naḥ pitā ||

मधुमान् नो वनस्पतिर् मधुमाँ२ऽ अस्तु सूर्यः । माध्वीर् गावो भवन्तु नः ॥

madhumān no vanaspatir madhumā~2' astu sūryaḥ | mādhvīr gāvo bhavantu naḥ ||

अपां गम्भन्त् सीद मा त्वा सूर्योऽभि ताप्सीन् माग्निर् वैश्वानरः । अच्छिन्नपत्राः प्रजा ऽ अनुवीक्षस्वानु त्वा दिव्या वृष्टिः सचताम् ॥

apāṃ gambhant sīda mā tvā sūryo'bhi tāpsīn māgnir vaiśvānaraḥ | acchinnapatrāḥ prajā ' anuvīkṣasvānu tvā divyā vṛṣṭiḥ sacatām ||

Sanskrit only: no published translation is held for this verse.

त्रीन्त् समुद्रान्त् सम् असृपत् स्वर्गान् अपां पतिर् वृषभ ऽ इष्टकानाम् । पुरीषं वसानः सुकृतस्य लोके तत्र गच्छ यत्र पूर्वे परेताः ॥

trīnt samudrānt sam asṛpat svargān apāṃ patir vṛṣabha ' iṣṭakānām | purīṣaṃ vasānaḥ sukṛtasya loke tatra gaccha yatra pūrve paretāḥ ||

Sanskrit only: no published translation is held for this verse.

मही द्यौः पृथिवी च न ऽ इमं यज्ञं मिमिक्षताम् । पिपृतां नो भरीमभिः ॥

mahī dyauḥ pṛthivī ca na ' imaṃ yajñaṃ mimikṣatām | pipṛtāṃ no bharīmabhiḥ ||

विष्णोः कर्माणि पश्यत यतो व्रतानि पस्पशे । इन्द्रस्य युज्यः सखा ॥

viṣṇoḥ karmāṇi paśyata yato vratāni paspaśe | indrasya yujyaḥ sakhā ||

ध्रुवासि धरुणेतो जज्ञे प्रथमम् एभ्यो योनिभ्यो ऽ अधि जातवेदाः । स गायत्र्या त्रिष्टुभानुष्टुभा च देवेभ्यो हव्यं वहतु प्रजानन् ॥

dhruvāsi dharuṇeto jajñe prathamam ebhyo yonibhyo ' adhi jātavedāḥ | sa gāyatryā triṣṭubhānuṣṭubhā ca devebhyo havyaṃ vahatu prajānan ||

Sanskrit only: no published translation is held for this verse.

इषे राये रमस्व सहसे द्युम्न ऽ ऊर्जेऽ अपत्याय । सम्राड् असि स्वराड् असि सारस्वतौ त्वोत्सौ प्रावताम् ॥

iṣe rāye ramasva sahase dyumna ' ūrje' apatyāya | samrāḍ asi svarāḍ asi sārasvatau tvotsau prāvatām ||

Sanskrit only: no published translation is held for this verse.

अग्ने युक्ष्वा हि ये तवाश्वासो देव साधवः । अरं वहन्ति मन्यवे ॥

agne yukṣvā hi ye tavāśvāso deva sādhavaḥ | araṃ vahanti manyave ||

युक्ष्वा हि देवहूतमाँ२ऽ अश्वाँ२ऽ अग्ने रथीर् इव । नि होता पूर्व्यः सदः ॥

yukṣvā hi devahūtamā~2' aśvā~2' agne rathīr iva | ni hotā pūrvyaḥ sadaḥ ||

Sanskrit only: no published translation is held for this verse.

सम्यक् स्रवन्ति सरितो न धेना ऽ अन्तर् हृदा मनसा पूयमानाः । घृतस्य धारा ऽ अभि चाकशीमि हिरण्ययो वेतसो मध्ये ऽ अग्नेः ॥

samyak sravanti sarito na dhenā ' antar hṛdā manasā pūyamānāḥ | ghṛtasya dhārā ' abhi cākaśīmi hiraṇyayo vetaso madhye ' agneḥ ||

Sanskrit only: no published translation is held for this verse.

ऋचे त्वा रुचे त्वा भासे त्वा ज्योतिषे त्वा । अभूद् इदं विश्वस्य भुवनस्य वाजिनम् अग्नेर् वैश्वानरस्य च ॥

ṛce tvā ruce tvā bhāse tvā jyotiṣe tvā | abhūd idaṃ viśvasya bhuvanasya vājinam agner vaiśvānarasya ca ||

Sanskrit only: no published translation is held for this verse.

अग्निर् ज्योतिषा ज्योतिष्मान् रुक्मो वर्चसा वर्चस्वान् । सहस्रदा ऽ असि सहस्राय त्वा ॥

agnir jyotiṣā jyotiṣmān rukmo varcasā varcasvān | sahasradā ' asi sahasrāya tvā ||

Sanskrit only: no published translation is held for this verse.

आदित्यं गर्भं पयसा सम् अङ्धि सहस्रस्य प्रतिमां विश्वरूपम् । परि वृङ्धि हरसा माभि मꣳस्थाः शतायुषं कृणुहि चीयमानः ॥

ādityaṃ garbhaṃ payasā sam aṅdhi sahasrasya pratimāṃ viśvarūpam | pari vṛṅdhi harasā mābhi mam̐sthāḥ śatāyuṣaṃ kṛṇuhi cīyamānaḥ ||

Sanskrit only: no published translation is held for this verse.

वातस्य जूतिं वरुणस्य नाभिम् अश्वं जज्ञानꣳ सरिरस्य मध्ये । शिशुं नदीनाꣳ हरिम् अद्रिबुध्नम् अग्ने मा हिꣳसीः परमे व्योमन् ॥

vātasya jūtiṃ varuṇasya nābhim aśvaṃ jajñānam̐ sarirasya madhye | śiśuṃ nadīnām̐ harim adribudhnam agne mā him̐sīḥ parame vyoman ||

Sanskrit only: no published translation is held for this verse.

अजस्रम् इन्दुम् अरुषं भुरण्युम् अग्निम् ईडे पूर्वचित्तिं नमोभिः । स पर्वभिर् ऋतुशः कल्पमानो गां मा हिꣳसीर् अदितिं विराजम् ॥

ajasram indum aruṣaṃ bhuraṇyum agnim īḍe pūrvacittiṃ namobhiḥ | sa parvabhir ṛtuśaḥ kalpamāno gāṃ mā him̐sīr aditiṃ virājam ||

Sanskrit only: no published translation is held for this verse.

वरूत्रीं त्वष्टुर् वरुणस्य नाभिम् अविं जज्ञानाꣳ रजसः परस्मात् । महीꣳ साहस्रीम् असुरस्य मायाम् अग्ने मा हिꣳसीः परमे व्योमन् ॥

varūtrīṃ tvaṣṭur varuṇasya nābhim aviṃ jajñānām̐ rajasaḥ parasmāt | mahīm̐ sāhasrīm asurasya māyām agne mā him̐sīḥ parame vyoman ||

Sanskrit only: no published translation is held for this verse.

यो ऽ अग्निर् अग्नेर् अधिय् अजायत शोकात् पृथिव्या ऽ उत वा दिवस् परि । येन प्रजा विश्वकर्मा जजान तम् अग्ने हेडः परि ते वृणक्तु ॥

yo ' agnir agner adhiy ajāyata śokāt pṛthivyā ' uta vā divas pari | yena prajā viśvakarmā jajāna tam agne heḍaḥ pari te vṛṇaktu ||

Sanskrit only: no published translation is held for this verse.

चित्रं देवानाम् उद् अगाद् अनीकं चक्षुर् मित्रस्य वरुणस्याग्नेः । आप्रा द्यावापृथिवी ऽ अन्तरिक्षꣳ सूर्य ऽ आत्मा जगतस् तस्थुषश् च ॥

citraṃ devānām ud agād anīkaṃ cakṣur mitrasya varuṇasyāgneḥ | āprā dyāvāpṛthivī ' antarikṣam̐ sūrya ' ātmā jagatas tasthuṣaś ca ||

इमं मा हिꣳसीर् द्विपादं पशुꣳ सहस्राक्षो मेधाय चीयमानः । मयुं पशुं मेधम् अग्ने जुषस्व तेन चिन्वानस् तन्वो नि षीद । मयुं ते शुग् ऋच्छतु यं द्विष्मस् तं ते शुग् ऋच्छतु ॥

imaṃ mā him̐sīr dvipādaṃ paśum̐ sahasrākṣo medhāya cīyamānaḥ | mayuṃ paśuṃ medham agne juṣasva tena cinvānas tanvo ni ṣīda | mayuṃ te śug ṛcchatu yaṃ dviṣmas taṃ te śug ṛcchatu ||

Sanskrit only: no published translation is held for this verse.

इमं मा हिꣳसीर् एकशफं पशुं कनिक्रदं वाजिनं वाजिनेषु । गौरम् आरण्यम् अनु ते दिशामि तेन चिन्वानस् तन्वो नि षीद । गौरं ते शुग् ऋच्छतु यं द्विष्मस् तं ते शुग् ऋच्छतु ॥

imaṃ mā him̐sīr ekaśaphaṃ paśuṃ kanikradaṃ vājinaṃ vājineṣu | gauram āraṇyam anu te diśāmi tena cinvānas tanvo ni ṣīda | gauraṃ te śug ṛcchatu yaṃ dviṣmas taṃ te śug ṛcchatu ||

Sanskrit only: no published translation is held for this verse.

इमꣳ साहस्रꣳ शतधारम् उत्सं व्यच्यमानꣳ सरिरस्य मध्ये । घृतं दुहानाम् अदितिं जनायाग्ने मा हिꣳसीः परमे व्योमन् । गवयम् आरण्यम् अनु ते दिशामि तेन चिन्वानस् तन्वो नि षीद । गवयं ते शुग् ऋच्छतु यं द्विष्मस् तं ते शुग् ऋच्छतु ॥

imam̐ sāhasram̐ śatadhāram utsaṃ vyacyamānam̐ sarirasya madhye | ghṛtaṃ duhānām aditiṃ janāyāgne mā him̐sīḥ parame vyoman | gavayam āraṇyam anu te diśāmi tena cinvānas tanvo ni ṣīda | gavayaṃ te śug ṛcchatu yaṃ dviṣmas taṃ te śug ṛcchatu ||

Sanskrit only: no published translation is held for this verse.

इममूर्णायुं वरुणस्य नाभिं त्वचं पशूनां द्विपदांचतुष्पदाम् । त्वष्टुः प्रजानां प्रथमं जनित्रम् अग्ने मा हिꣳसीः परमे व्योमन् । उष्ट्रम् आरण्यम् अनु ते दिशामि तेन चिन्वानस् तन्वो नि षीद । उष्ट्रं ते शुग् ऋच्छतु यं द्विष्मस् तं ते शुग् ऋच्छतु ॥

imamūrṇāyuṃ varuṇasya nābhiṃ tvacaṃ paśūnāṃ dvipadāṃcatuṣpadām | tvaṣṭuḥ prajānāṃ prathamaṃ janitram agne mā him̐sīḥ parame vyoman | uṣṭram āraṇyam anu te diśāmi tena cinvānas tanvo ni ṣīda | uṣṭraṃ te śug ṛcchatu yaṃ dviṣmas taṃ te śug ṛcchatu ||

Sanskrit only: no published translation is held for this verse.

अजो ह्य् अग्नेर् अजनिष्ट शोकात् सो ऽ अपश्यज् जनितारम् अग्रे । तेन देवा देवताम् अग्रम् आयꣳस् तेन रोहम् आयन्न् उप मेध्यासः । शरभम् आरण्यम् अनु ते दिशामि तेन चिन्वानस् तन्वो नि षीद । शरभं ते शुग् ऋच्छतु यं द्विष्मस् तं ते शुग् ऋच्छतु ॥

ajo hy agner ajaniṣṭa śokāt so ' apaśyaj janitāram agre | tena devā devatām agram āyam̐s tena roham āyann upa medhyāsaḥ | śarabham āraṇyam anu te diśāmi tena cinvānas tanvo ni ṣīda | śarabhaṃ te śug ṛcchatu yaṃ dviṣmas taṃ te śug ṛcchatu ||

Sanskrit only: no published translation is held for this verse.

त्वं यविष्ठ दाशुषो नॄꣳः पाहि शृणुधी गिरः । रक्षा तोकम् उत त्मना ॥

tvaṃ yaviṣṭha dāśuṣo nṝm̐ḥ pāhi śṛṇudhī giraḥ | rakṣā tokam uta tmanā ||

Sanskrit only: no published translation is held for this verse.

अपां त्वेमन्त् सादयामि । अपां त्वोद्मन्त् सादयामि । अपां त्वा भस्मन्त् सादयामि । अपां त्वा ज्योतिषि सादयामि । अपां त्वायने सादयामि । अर्णवे त्वा सदने सादयामि । समुद्रे त्वा सदने सादयामि । सरिरे त्वा सदने सादयामि । अपां त्वा क्षये सादयामि । अपां त्वा सधिषि सादयामि । अपां त्वा सदने सादयामि । अपां त्वा सधस्थे सादयामि । अपां त्वा योनौ सादयामि । अपां त्वा पुरीषे सादयामि । अपां त्वा पाथसि सादयामि । गायत्रेण त्वा छन्दसा सादयामि । त्रैष्टुभेन त्वा छन्दसा सादयामि । जागतेन त्वा छन्दसा सादयामि । आनुष्टुभेन त्वा छन्दसा सादयामि । पाश्रून त्वा छन्दसा सादयामि ॥

apāṃ tvemant sādayāmi | apāṃ tvodmant sādayāmi | apāṃ tvā bhasmant sādayāmi | apāṃ tvā jyotiṣi sādayāmi | apāṃ tvāyane sādayāmi | arṇave tvā sadane sādayāmi | samudre tvā sadane sādayāmi | sarire tvā sadane sādayāmi | apāṃ tvā kṣaye sādayāmi | apāṃ tvā sadhiṣi sādayāmi | apāṃ tvā sadane sādayāmi | apāṃ tvā sadhasthe sādayāmi | apāṃ tvā yonau sādayāmi | apāṃ tvā purīṣe sādayāmi | apāṃ tvā pāthasi sādayāmi | gāyatreṇa tvā chandasā sādayāmi | traiṣṭubhena tvā chandasā sādayāmi | jāgatena tvā chandasā sādayāmi | ānuṣṭubhena tvā chandasā sādayāmi | pāśrūna tvā chandasā sādayāmi ||

Sanskrit only: no published translation is held for this verse.

अयं पुरो भुवः । तस्य प्राणो भौवनायः । वसन्तः प्राणायनः । गायत्री वासन्ती । गायत्र्यै गायत्रम् । गायत्राद् उपाꣳशुः । उपाꣳशोस् त्रिवृत् । त्रिवृतो रथन्तरम् । वसिष्ठ ऽ ऋषिः । प्रजापतिगृहीतया त्वया प्राणं गृह्णामि प्रजाभ्यः ॥

ayaṃ puro bhuvaḥ | tasya prāṇo bhauvanāyaḥ | vasantaḥ prāṇāyanaḥ | gāyatrī vāsantī | gāyatryai gāyatram | gāyatrād upām̐śuḥ | upām̐śos trivṛt | trivṛto rathantaram | vasiṣṭha ' ṛṣiḥ | prajāpatigṛhītayā tvayā prāṇaṃ gṛhṇāmi prajābhyaḥ ||

Sanskrit only: no published translation is held for this verse.

अयं दक्षिणा विश्वकर्मा । तस्य मनो वैश्वकर्मणम् । ग्रीष्मो मानसः । त्रिष्टुब् ग्रैष्मी । त्रिष्टुभः स्वारम् । स्वाराद् अन्तर्यामः । ऽअन्तर्यामात् पञ्चदशः । पञ्चदशाद् बृहत् । भरद्वाज ऽ ऋषिः । प्रजापतिगृहीतया त्वया मनो गृह्णामि प्रजाभ्यः ॥

ayaṃ dakṣiṇā viśvakarmā | tasya mano vaiśvakarmaṇam | grīṣmo mānasaḥ | triṣṭub graiṣmī | triṣṭubhaḥ svāram | svārād antaryāmaḥ | 'antaryāmāt pañcadaśaḥ | pañcadaśād bṛhat | bharadvāja ' ṛṣiḥ | prajāpatigṛhītayā tvayā mano gṛhṇāmi prajābhyaḥ ||

Sanskrit only: no published translation is held for this verse.

अयं पश्चाद् विश्वव्यचाः । तस्य चक्षुर् वैश्वव्यचसम् । वर्षाश् चाक्षुष्यः । जगती वार्षी । जगत्या ऽ ऋक्समम् । ऋक्समाच् छुक्रः । शुक्रात् सप्तदशः । सप्तदशाद् वैरूपम् । जमदग्निर् ऋषिः । प्रजापतिगृहीतया त्वया चक्षुर् गृह्णामि प्रजाभ्यः ॥

ayaṃ paścād viśvavyacāḥ | tasya cakṣur vaiśvavyacasam | varṣāś cākṣuṣyaḥ | jagatī vārṣī | jagatyā ' ṛksamam | ṛksamāc chukraḥ | śukrāt saptadaśaḥ | saptadaśād vairūpam | jamadagnir ṛṣiḥ | prajāpatigṛhītayā tvayā cakṣur gṛhṇāmi prajābhyaḥ ||

Sanskrit only: no published translation is held for this verse.

इदं उत्तरात् स्वः । तस्य श्रोत्रꣳ सौवम् । शरच् छ्रौत्री । अनुष्टुप् शारदी । अनुष्टुभ ऽ ऐडम् । ऐडान् मन्थी । मन्थिन ऽ एकविꣳशः ऽ । एकविꣳशाद् वैराजम् । विश्वामित्र ऽ ऋषिः । प्रजापतिगृहीतया त्वया श्रोत्रं गृह्णामि प्रजाभ्यः ॥

idaṃ uttarāt svaḥ | tasya śrotram̐ sauvam | śarac chrautrī | anuṣṭup śāradī | anuṣṭubha ' aiḍam | aiḍān manthī | manthina ' ekavim̐śaḥ ' | ekavim̐śād vairājam | viśvāmitra ' ṛṣiḥ | prajāpatigṛhītayā tvayā śrotraṃ gṛhṇāmi prajābhyaḥ ||

Sanskrit only: no published translation is held for this verse.

इयं उपरि मतिः । तस्यै वाङ् मात्या । हेमन्तो वाच्यः । पङ्क्तिर् हैमन्ती । पङ्क्त्यै निधनवत् । निधनवत ऽ आग्रयणः । आग्रयणात् त्रिणवत्रयस्त्रिꣳशौ । त्रिणवत्रयस्त्रिꣳशाभ्याꣳ शाक्वररैवते । विश्वकर्म ऽ ऋषिः । प्रजापतिगृहीतया त्वया वाचं गृह्णामि प्रजाभ्यः । [ लोकं पृण छिद्रं पृणाथो सीद ध्रुवा त्वम् । इन्द्राग्नी त्वा बृहस्पतिर् अस्मिन् योनाव् असीषदन् । ता अस्य सूददोहसः सोमꣳ श्रीणन्ति पृश्नयः । जन्मन् देवानां विशस् त्रिष्व् आ रोचने दिवः । इन्द्रं विश्वा अवीवृधन्त् समुद्रव्यचसं गिरः । रथीतमꣳ रथीनां वाजानाꣳ सत्पतिं पतिम् ॥ ]???

iyaṃ upari matiḥ | tasyai vāṅ mātyā | hemanto vācyaḥ | paṅktir haimantī | paṅktyai nidhanavat | nidhanavata ' āgrayaṇaḥ | āgrayaṇāt triṇavatrayastrim̐śau | triṇavatrayastrim̐śābhyām̐ śākvararaivate | viśvakarma ' ṛṣiḥ | prajāpatigṛhītayā tvayā vācaṃ gṛhṇāmi prajābhyaḥ | [ lokaṃ pṛṇa chidraṃ pṛṇātho sīda dhruvā tvam | indrāgnī tvā bṛhaspatir asmin yonāv asīṣadan | tā asya sūdadohasaḥ somam̐ śrīṇanti pṛśnayaḥ | janman devānāṃ viśas triṣv ā rocane divaḥ | indraṃ viśvā avīvṛdhant samudravyacasaṃ giraḥ | rathītamam̐ rathīnāṃ vājānām̐ satpatiṃ patim || ]???

Sanskrit only: no published translation is held for this verse.