Library·Vājasaneyi Saṃhitā (Śukla Yajurveda, as given on Wikisource)·14
ध्रुवक्षितिर् ध्रुवयोनिर् ध्रुवासि ध्रुवं योनिम् आ सीद साधुया । उख्यस्य केतुं प्रथमं जुषाणा । अश्विनाध्वर्यू सादयताम् इह त्वा ॥
dhruvakṣitir dhruvayonir dhruvāsi dhruvaṃ yonim ā sīda sādhuyā | ukhyasya ketuṃ prathamaṃ juṣāṇā | aśvinādhvaryū sādayatām iha tvā ||
Sanskrit only: no published translation is held for this verse.
कुलायिनी घृतवती पुरंधिः स्योने सीद सदने पृथिव्याः । अभि त्वा रुद्रा वसवो गृणन्त्व् इमा ब्रह्म पीपिहि सौभगाय । अश्विनाध्वर्यू सादयताम् इह त्वा ॥
kulāyinī ghṛtavatī puraṃdhiḥ syone sīda sadane pṛthivyāḥ | abhi tvā rudrā vasavo gṛṇantv imā brahma pīpihi saubhagāya | aśvinādhvaryū sādayatām iha tvā ||
Sanskrit only: no published translation is held for this verse.
स्वैर् दक्षैर् दक्षपितेह सीद देवानाꣳ सुम्ने बृहते रणाय । पितेवैधि सूनव ऽ आ सुशेवा स्वावेशा तन्वा सं विशस्व । अश्विनाध्वर्यू सादयताम् इह त्वा ॥
svair dakṣair dakṣapiteha sīda devānām̐ sumne bṛhate raṇāya | pitevaidhi sūnava ' ā suśevā svāveśā tanvā saṃ viśasva | aśvinādhvaryū sādayatām iha tvā ||
Sanskrit only: no published translation is held for this verse.
पृथिव्याः पुरीषम् अस्य् अप्सो नाम तां त्वा विश्वे ऽ अभि गृणन्तु देवाः । स्तोमपृष्ठा घृतवतीह सीद प्रजावद् अस्मे द्रविणा यजस्व । अश्विनाध्वर्यू सादयताम् इह त्वा ॥
pṛthivyāḥ purīṣam asy apso nāma tāṃ tvā viśve ' abhi gṛṇantu devāḥ | stomapṛṣṭhā ghṛtavatīha sīda prajāvad asme draviṇā yajasva | aśvinādhvaryū sādayatām iha tvā ||
Sanskrit only: no published translation is held for this verse.
अदित्यास् त्वा पृष्ठे सादयाम्य् अन्तरिक्षस्य धर्त्रीं विष्टम्भनीं दिशामधिपत्नीं भुवनानामूर्मिर् द्रप्सो ऽ अपाम् असि विश्वकर्मा त ऽ ऋषिः । अश्विनाध्वर्यू सादयताम् इह त्वा ॥
adityās tvā pṛṣṭhe sādayāmy antarikṣasya dhartrīṃ viṣṭambhanīṃ diśāmadhipatnīṃ bhuvanānāmūrmir drapso ' apām asi viśvakarmā ta ' ṛṣiḥ | aśvinādhvaryū sādayatām iha tvā ||
Sanskrit only: no published translation is held for this verse.
शुक्रश् च शुचिश् च ग्रीष्माव् ऋतू ऽ अग्नेर् अन्तःश्लेषो ऽसि कल्पेतां द्यावापृथिवी कल्पन्ताम् आप ऽ ओषधयः कल्पन्ताम् अग्नयः पृथङ् नम ज्यैष्ठ्याय सव्रताः । ये ऽ अग्नयः समनसो ऽन्तरा द्यावापृथिवी ऽ इमे ग्रैष्माव् ऋतू ऽ अभिकल्पमानाऽ इन्द्रम् इव देवा ऽ अभिसं विशन्तु तया देवतयाङ्गिरस्वद् ध्रुवे सीदतम् ॥
śukraś ca śuciś ca grīṣmāv ṛtū ' agner antaḥśleṣo 'si kalpetāṃ dyāvāpṛthivī kalpantām āpa ' oṣadhayaḥ kalpantām agnayaḥ pṛthaṅ nama jyaiṣṭhyāya savratāḥ | ye ' agnayaḥ samanaso 'ntarā dyāvāpṛthivī ' ime graiṣmāv ṛtū ' abhikalpamānā' indram iva devā ' abhisaṃ viśantu tayā devatayāṅgirasvad dhruve sīdatam ||
Sanskrit only: no published translation is held for this verse.
सजूर् ऋतुभिः सजूर् विधाभिः सजूर् देवैः सजूर् देवैर् वयोनाधैर् अग्नये त्वा वैश्वानरायाश्विनाध्वर्यू सादयताम् इह त्वा । सजूर् ऋतुभिः सजूर् विधाभिः सजूर् वसुभिः सजूर् देवैर् वयोनाधैर् अग्नये त्वा वैश्वानरायाश्विनाध्वर्यू सादयताम् इह त्वा । सजूर् ऋतुभिः सजूर् विधाभिः सजू रुद्रैः सजूर् देवैर् वयोनाधैर् अग्नये त्वा वैश्वानरायाश्विनाध्वर्यू सादयताम् इह त्वा । सजूर् ऋतुभिः सजूर् विधाभिः सजूर् आदित्यैः सजूर् देवैर् वयोनाधैर् अग्नये त्वा वैश्वानरायाश्विनाध्वर्यू सादयताम् इह त्वा । सजूर् ऋतुभिः सजूर् विधाभिः सजूर् विश्वैर् देवैः सजूर् देवैर् वयोनाधैर् अग्नये त्वा वैश्वानरायाश्विनाध्वर्यू सादयताम् इह त्वा ॥
sajūr ṛtubhiḥ sajūr vidhābhiḥ sajūr devaiḥ sajūr devair vayonādhair agnaye tvā vaiśvānarāyāśvinādhvaryū sādayatām iha tvā | sajūr ṛtubhiḥ sajūr vidhābhiḥ sajūr vasubhiḥ sajūr devair vayonādhair agnaye tvā vaiśvānarāyāśvinādhvaryū sādayatām iha tvā | sajūr ṛtubhiḥ sajūr vidhābhiḥ sajū rudraiḥ sajūr devair vayonādhair agnaye tvā vaiśvānarāyāśvinādhvaryū sādayatām iha tvā | sajūr ṛtubhiḥ sajūr vidhābhiḥ sajūr ādityaiḥ sajūr devair vayonādhair agnaye tvā vaiśvānarāyāśvinādhvaryū sādayatām iha tvā | sajūr ṛtubhiḥ sajūr vidhābhiḥ sajūr viśvair devaiḥ sajūr devair vayonādhair agnaye tvā vaiśvānarāyāśvinādhvaryū sādayatām iha tvā ||
Sanskrit only: no published translation is held for this verse.
प्राणं मे पाहि । अपानं मे पाहि । व्यानं मे पाहि । चक्षुर् म ऽ उर्व्या वि भाहि । श्रोत्रं मे श्लोकय । अपः पिन्व । ओषधीर् जिन्व । द्विपाद् अव । चतुष्पात् पाहि । दिवो वृष्टिम् एरय ॥
prāṇaṃ me pāhi | apānaṃ me pāhi | vyānaṃ me pāhi | cakṣur ma ' urvyā vi bhāhi | śrotraṃ me ślokaya | apaḥ pinva | oṣadhīr jinva | dvipād ava | catuṣpāt pāhi | divo vṛṣṭim eraya ||
Sanskrit only: no published translation is held for this verse.
मूर्धा वयः प्रजापतिश् छन्दः । क्षत्रं वयो मयंदं छन्दः । विष्टम्भो वयो ऽधिपतिश् छन्दः । विश्वकर्मा वयः परमेष्ठी छन्दः । वस्तो वयो विवलं छन्दः । वृष्णिर् वयो विशालं छन्दः । पुरुषो वयस् तन्द्रं छन्दः । व्याघ्रो वयो ऽनाधृष्टं छन्दः । सिꣳहो वयश् छदिश् छन्दः । पष्ठवाड् वयो बृहती छन्दः । ऽ उक्षा वयः ककुप् छन्दः । ऽ ऋषभो वयः सतोबृहती छन्दः ॥
mūrdhā vayaḥ prajāpatiś chandaḥ | kṣatraṃ vayo mayaṃdaṃ chandaḥ | viṣṭambho vayo 'dhipatiś chandaḥ | viśvakarmā vayaḥ parameṣṭhī chandaḥ | vasto vayo vivalaṃ chandaḥ | vṛṣṇir vayo viśālaṃ chandaḥ | puruṣo vayas tandraṃ chandaḥ | vyāghro vayo 'nādhṛṣṭaṃ chandaḥ | sim̐ho vayaś chadiś chandaḥ | paṣṭhavāḍ vayo bṛhatī chandaḥ | ' ukṣā vayaḥ kakup chandaḥ | ' ṛṣabho vayaḥ satobṛhatī chandaḥ ||
Sanskrit only: no published translation is held for this verse.
अनड्वान् वयः पङ्क्तिश् छन्दः । धेनुर् वयो जगती छन्दः । त्र्यविर् वयस् त्रिष्टुप् छन्दः । दित्यवाड् वयो विराट् छन्दः । पञ्चाविर् वयो गायत्री छन्दः । त्रिवत्सो वय ऽ उष्णिक् छन्दः । तुर्यवाड् वयो ऽनुष्टुप् छन्दः । [ लोकं पृण छिद्रं पृणाथो सीद ध्रुवा त्वम् । इन्द्राग्नी त्वा बृहस्पतिर् अस्मिन् योनाव् असीषदन् । ता अस्य सूददोहसः सोमꣳ श्रीणन्ति पृश्नयः । जन्मन् देवानां विशस् त्रिष्व् आ रोचने दिवः । इन्द्रं विश्वा अवीवृधन्त् समुद्रव्यचसं गिरः । रथीतमꣳ रथीनां वाजानाꣳ सत्पतिं पतिम् ॥ ]???
anaḍvān vayaḥ paṅktiś chandaḥ | dhenur vayo jagatī chandaḥ | tryavir vayas triṣṭup chandaḥ | dityavāḍ vayo virāṭ chandaḥ | pañcāvir vayo gāyatrī chandaḥ | trivatso vaya ' uṣṇik chandaḥ | turyavāḍ vayo 'nuṣṭup chandaḥ | [ lokaṃ pṛṇa chidraṃ pṛṇātho sīda dhruvā tvam | indrāgnī tvā bṛhaspatir asmin yonāv asīṣadan | tā asya sūdadohasaḥ somam̐ śrīṇanti pṛśnayaḥ | janman devānāṃ viśas triṣv ā rocane divaḥ | indraṃ viśvā avīvṛdhant samudravyacasaṃ giraḥ | rathītamam̐ rathīnāṃ vājānām̐ satpatiṃ patim || ]???
Sanskrit only: no published translation is held for this verse.
इन्द्राग्नी ऽ अव्यथमानाम् इष्टकां दृꣳहतं युवम् । पृष्ठेन द्यावापृथिवी ऽ अन्तरिक्षं च विबाधसे ॥
indrāgnī ' avyathamānām iṣṭakāṃ dṛm̐hataṃ yuvam | pṛṣṭhena dyāvāpṛthivī ' antarikṣaṃ ca vibādhase ||
Sanskrit only: no published translation is held for this verse.
विश्वकर्मा त्वा सादयत्व् अन्तरिक्षस्य पृष्ठे व्यचस्वतीं प्रथस्वतीम् अन्तरिक्षं यच्छान्तरिक्षं दृꣳहान्तरिक्षं मा हिꣳसीः । विश्वस्मै प्राणायापानाय व्यानायोदानाय प्रतिष्ठायै चरित्राय । वायुष् ट्वाभि पातु मह्या स्वस्त्या छर्दिषा शंतमेन तया देवतयाङ्गिरस्वद् ध्रुवा सीद ॥
viśvakarmā tvā sādayatv antarikṣasya pṛṣṭhe vyacasvatīṃ prathasvatīm antarikṣaṃ yacchāntarikṣaṃ dṛm̐hāntarikṣaṃ mā him̐sīḥ | viśvasmai prāṇāyāpānāya vyānāyodānāya pratiṣṭhāyai caritrāya | vāyuṣ ṭvābhi pātu mahyā svastyā chardiṣā śaṃtamena tayā devatayāṅgirasvad dhruvā sīda ||
Sanskrit only: no published translation is held for this verse.
राज्ञ्य् असि प्राची दिक् । विराड् असि दक्षिणा दिक् । सम्राड् असि प्रतीची दिक् । स्वराड् अस्य् उदीची दिक् । अधिपत्न्य् असि बृहती दिक् ॥
rājñy asi prācī dik | virāḍ asi dakṣiṇā dik | samrāḍ asi pratīcī dik | svarāḍ asy udīcī dik | adhipatny asi bṛhatī dik ||
Sanskrit only: no published translation is held for this verse.
विश्वकर्मा त्वा सादयत्व् अन्तरिक्षस्य पृष्ठे ज्योतिष्मतीम् । विश्वस्मै प्राणायापानाय व्यानाय विश्वं ज्योतिर् यच्छ । वायुष्टे ऽधिपतिस् तया देवतयाङ्गिरस्वद् ध्रुवा सीद ॥
viśvakarmā tvā sādayatv antarikṣasya pṛṣṭhe jyotiṣmatīm | viśvasmai prāṇāyāpānāya vyānāya viśvaṃ jyotir yaccha | vāyuṣṭe 'dhipatis tayā devatayāṅgirasvad dhruvā sīda ||
Sanskrit only: no published translation is held for this verse.
नभश् च नभस्यश् च वार्षिकाव् ऋतू ऽ अग्नेर् अन्तःश्लेषो सि कल्पेतां द्यावापृथिवी कल्पन्ताम् आप ऽ ओषधयः कल्पन्ताम् अग्नयः पृथङ् नम ज्यैष्ठ्याय सव्रताः । ये ऽ अग्नयः समनसोऽन्तरा द्यावापृथिवी ऽ इमे वार्षिकाव् ऋतू ऽ अभिकल्पमानाऽ इन्द्रम् इव देवा ऽ अभिसं विशन्तु तया देवतयाङ्गिरस्वद् ध्रुवे सीदतम् ॥
nabhaś ca nabhasyaś ca vārṣikāv ṛtū ' agner antaḥśleṣo si kalpetāṃ dyāvāpṛthivī kalpantām āpa ' oṣadhayaḥ kalpantām agnayaḥ pṛthaṅ nama jyaiṣṭhyāya savratāḥ | ye ' agnayaḥ samanaso'ntarā dyāvāpṛthivī ' ime vārṣikāv ṛtū ' abhikalpamānā' indram iva devā ' abhisaṃ viśantu tayā devatayāṅgirasvad dhruve sīdatam ||
Sanskrit only: no published translation is held for this verse.
इषश् चोर्जश् च शारदाव् ऋतू ऽ अग्नेर् अन्तःश्लेषोऽसि कल्पेतां द्यावापृथिवी कल्पन्ताम् आप ऽ ओषधयः कल्पन्ताम् अग्नयः पृथङ् नम ज्यैष्ठ्याय सव्रताः । ये ऽ अग्नयः समनसोऽन्तरा द्यावापृथिवी ऽ इमे शारदाव् ऋतू ऽ अभिकल्पमाना ऽइन्द्रम् इव देवाऽ अभिसं विशन्तु तया देवतयाङ्गिरस्वद् ध्रुवे सीदतम् ॥
iṣaś corjaś ca śāradāv ṛtū ' agner antaḥśleṣo'si kalpetāṃ dyāvāpṛthivī kalpantām āpa ' oṣadhayaḥ kalpantām agnayaḥ pṛthaṅ nama jyaiṣṭhyāya savratāḥ | ye ' agnayaḥ samanaso'ntarā dyāvāpṛthivī ' ime śāradāv ṛtū ' abhikalpamānā 'indram iva devā' abhisaṃ viśantu tayā devatayāṅgirasvad dhruve sīdatam ||
Sanskrit only: no published translation is held for this verse.
आयुर् मे पाहि । प्राणं मे पाहि । अपानं मे पाहि । व्यानं मे पाहि । चक्षुर् मे पाहि । श्रोत्रं मे पाहि । वाचं मे पिन्व । मनो मे जिन्व । आत्मानं मे पाहि । ज्योतिर् मे यच्छ ॥
āyur me pāhi | prāṇaṃ me pāhi | apānaṃ me pāhi | vyānaṃ me pāhi | cakṣur me pāhi | śrotraṃ me pāhi | vācaṃ me pinva | mano me jinva | ātmānaṃ me pāhi | jyotir me yaccha ||
Sanskrit only: no published translation is held for this verse.
मा छन्दः । प्रमा छन्दः । प्रतिमा छन्दः । ऽ अस्रीवयश् छन्दः । पङ्क्तिश् छन्दः । ऽ उष्णिक् छन्दः । बृहती छन्दः । ऽअनुष्टुप् छन्दः । विराट् छन्दः । गायत्री छन्दः । त्रिष्टुप् छन्दः । जगती छन्दः ॥
mā chandaḥ | pramā chandaḥ | pratimā chandaḥ | ' asrīvayaś chandaḥ | paṅktiś chandaḥ | ' uṣṇik chandaḥ | bṛhatī chandaḥ | 'anuṣṭup chandaḥ | virāṭ chandaḥ | gāyatrī chandaḥ | triṣṭup chandaḥ | jagatī chandaḥ ||
Sanskrit only: no published translation is held for this verse.
पृथिवी छन्दः । ऽअन्तरिक्षं छन्दः । द्यौश् छन्दः । समाश् छन्दः । नक्षत्राणि छन्दः । वाक् छन्दः । मनश् छन्दः । कृषिश् छन्दः । हिरण्यं छन्दः । गौश् छन्दः । ऽअजा छन्दः । ऽअश्वश् छन्दः ॥
pṛthivī chandaḥ | 'antarikṣaṃ chandaḥ | dyauś chandaḥ | samāś chandaḥ | nakṣatrāṇi chandaḥ | vāk chandaḥ | manaś chandaḥ | kṛṣiś chandaḥ | hiraṇyaṃ chandaḥ | gauś chandaḥ | 'ajā chandaḥ | 'aśvaś chandaḥ ||
Sanskrit only: no published translation is held for this verse.
अग्निर् देवता । वातो देवता । सूर्यो देवता । चन्द्रमा देवता । वसवो देवता । रुद्रा देवता । ऽऽआदित्या देवता । मरुतो देवता । विश्वे देवा देवता । बृहस्पतिर् देवता । इन्द्रो देवता । वरुणो देवता ॥
agnir devatā | vāto devatā | sūryo devatā | candramā devatā | vasavo devatā | rudrā devatā | ''ādityā devatā | maruto devatā | viśve devā devatā | bṛhaspatir devatā | indro devatā | varuṇo devatā ||
Sanskrit only: no published translation is held for this verse.
मूर्धासि राड् ध्रुवासि धरुणा धर्त्र्य् असि धरणी । आयुषे त्वा वर्चसे त्वा कृष्यै त्वा क्षेमाय त्वा ॥
mūrdhāsi rāḍ dhruvāsi dharuṇā dhartry asi dharaṇī | āyuṣe tvā varcase tvā kṛṣyai tvā kṣemāya tvā ||
Sanskrit only: no published translation is held for this verse.
यन्त्री राड् यन्त्र्य् असि यमनी ध्रुवासि धरित्री । इषे त्वोर्जे त्वा रय्यै त्वा पोषाय त्वा । लोकं पृण छिद्रं पृणाथो सीद ध्रुवा त्वम् । इन्द्राग्नी त्वा बृहस्पतिर् अस्मिन् योनाव् असीषदन् । ता अस्य सूददोहसः सोमꣳ श्रीणन्ति पृश्नयः । जन्मन् देवानां विशस् त्रिष्व् आ रोचने दिवः । इन्द्रं विश्वा अवीवृधन्त् समुद्रव्यचसं गिरः । रथीतमꣳ रथीनां वाजानाꣳ सत्पतिं पतिम् ॥
yantrī rāḍ yantry asi yamanī dhruvāsi dharitrī | iṣe tvorje tvā rayyai tvā poṣāya tvā | lokaṃ pṛṇa chidraṃ pṛṇātho sīda dhruvā tvam | indrāgnī tvā bṛhaspatir asmin yonāv asīṣadan | tā asya sūdadohasaḥ somam̐ śrīṇanti pṛśnayaḥ | janman devānāṃ viśas triṣv ā rocane divaḥ | indraṃ viśvā avīvṛdhant samudravyacasaṃ giraḥ | rathītamam̐ rathīnāṃ vājānām̐ satpatiṃ patim ||
Sanskrit only: no published translation is held for this verse.
आशुर् त्रिवृत् । भान्तः पञ्चदशः । व्योमा सप्तदशः । धरुण ऽ एकविꣳशः । प्रतूर्तिर् अष्टादशः । तपो नवदशः । ऽअभीवर्तः सविꣳशः । वर्चो द्वाविꣳशः । संभरणस् त्रयोविꣳशः । योनिश् चतुर्विꣳशः । गर्भाः पञ्चविꣳशः । ऽ ओजस् त्रिणवः । क्रतुर् एकत्रिꣳशः । प्रतिष्ठा त्रयस्त्रिꣳशः । ब्रध्नस्य विष्टपं चतुस्त्रिꣳशः । नाकः षट्त्रिꣳशः । विवर्तो ष्टाचत्वारिꣳशः । धर्त्रं चतुष्टोमः ॥
āśur trivṛt | bhāntaḥ pañcadaśaḥ | vyomā saptadaśaḥ | dharuṇa ' ekavim̐śaḥ | pratūrtir aṣṭādaśaḥ | tapo navadaśaḥ | 'abhīvartaḥ savim̐śaḥ | varco dvāvim̐śaḥ | saṃbharaṇas trayovim̐śaḥ | yoniś caturvim̐śaḥ | garbhāḥ pañcavim̐śaḥ | ' ojas triṇavaḥ | kratur ekatrim̐śaḥ | pratiṣṭhā trayastrim̐śaḥ | bradhnasya viṣṭapaṃ catustrim̐śaḥ | nākaḥ ṣaṭtrim̐śaḥ | vivarto ṣṭācatvārim̐śaḥ | dhartraṃ catuṣṭomaḥ ||
Sanskrit only: no published translation is held for this verse.
अग्नेर् भागो ऽसि दीक्षाया ऽ आधिपत्यं ब्रह्म स्पृतं त्रिवृत् स्तोमः । इन्द्रस्य भागो ऽसि विष्णोर् आधिपत्यं क्षत्रꣳ स्पृतं पञ्चदशः स्तोमः । नृचक्षसां भागो ऽसि धातुर् आधिपत्यं जनित्रꣳ स्पृतꣳ सप्तदशः स्तोमः । मित्रस्य भागो ऽसि वरुणस्याधिपत्यं दिवो वृष्टिर् वात स्पृत ऽएकविꣳश स्तोमः ॥
agner bhāgo 'si dīkṣāyā ' ādhipatyaṃ brahma spṛtaṃ trivṛt stomaḥ | indrasya bhāgo 'si viṣṇor ādhipatyaṃ kṣatram̐ spṛtaṃ pañcadaśaḥ stomaḥ | nṛcakṣasāṃ bhāgo 'si dhātur ādhipatyaṃ janitram̐ spṛtam̐ saptadaśaḥ stomaḥ | mitrasya bhāgo 'si varuṇasyādhipatyaṃ divo vṛṣṭir vāta spṛta 'ekavim̐śa stomaḥ ||
Sanskrit only: no published translation is held for this verse.
वसूनां भागो ऽसि रुद्राणाम् आधिपत्यं चतुष्पात् स्पृतं चतुर्विꣳश स्तोमः । आदित्यानां भागो ऽसि मरुताम् आधिपत्यं गर्भा स्पृताः पञ्चविꣳश स्तोमः । अदित्यै भागो ऽसि पूष्ण ऽ आधिपत्यम् ओज स्पृतं त्रिणव स्तोमः । देवस्य सवितुर् भागो ऽसि बृहस्पतेर् आधिपत्यꣳ समीचीर् दिश स्पृताश् चतुष्टोम स्तोमः ॥
vasūnāṃ bhāgo 'si rudrāṇām ādhipatyaṃ catuṣpāt spṛtaṃ caturvim̐śa stomaḥ | ādityānāṃ bhāgo 'si marutām ādhipatyaṃ garbhā spṛtāḥ pañcavim̐śa stomaḥ | adityai bhāgo 'si pūṣṇa ' ādhipatyam oja spṛtaṃ triṇava stomaḥ | devasya savitur bhāgo 'si bṛhaspater ādhipatyam̐ samīcīr diśa spṛtāś catuṣṭoma stomaḥ ||
Sanskrit only: no published translation is held for this verse.
यवानां भागो ऽस्य् अयवानाम् आधिपत्यं प्रजा स्पृताश् चतुश्चत्वारिꣳश स्तोमः । ऋभूणां भागो ऽसि विश्वेषां देवानाम् आधिपत्यं भूतꣳ स्पृतं त्रयस्त्रिꣳश स्तोमः ॥
yavānāṃ bhāgo 'sy ayavānām ādhipatyaṃ prajā spṛtāś catuścatvārim̐śa stomaḥ | ṛbhūṇāṃ bhāgo 'si viśveṣāṃ devānām ādhipatyaṃ bhūtam̐ spṛtaṃ trayastrim̐śa stomaḥ ||
Sanskrit only: no published translation is held for this verse.
सहश् च सहस्यश् च हैमन्तिकाव् ऋतू ऽ अग्नेर् अन्तःश्लेषो सि कल्पेतां द्यावापृथिवी कल्पन्ताम् आप ऽ ओषधयः कल्पन्ताम् अग्नयः पृथङ् नम ज्यैष्ठ्याय सव्रताः । ये ऽ अग्नयः समनसो न्तरा द्यावापृथिवी ऽ इमे हैमन्तिकाव् ऋतू ऽ अभिकल्पमाना ऽ इन्द्रम् इव देवा ऽ अभिसंविशन्तु तया देवतयाङ्गिरस्वद् ध्रुवे सीदतम् ॥
sahaś ca sahasyaś ca haimantikāv ṛtū ' agner antaḥśleṣo si kalpetāṃ dyāvāpṛthivī kalpantām āpa ' oṣadhayaḥ kalpantām agnayaḥ pṛthaṅ nama jyaiṣṭhyāya savratāḥ | ye ' agnayaḥ samanaso ntarā dyāvāpṛthivī ' ime haimantikāv ṛtū ' abhikalpamānā ' indram iva devā ' abhisaṃviśantu tayā devatayāṅgirasvad dhruve sīdatam ||
Sanskrit only: no published translation is held for this verse.
एकयास्तुवत प्रजा ऽ अधीयन्त प्रजापतिर् अधिपतिर् आसीत् । तिसृभिर् अस्तुवत ब्रह्मासृज्यत ब्रह्मणस्पतिर् अधिपतिर् आसीत् । पञ्चभिर् अस्तुवत भूतान्य् असृज्यन्त भूतानां पतिर् अधिपतिर् आसीत् । सप्तभिर् अस्तुवत सप्त ऋषयो ऽसृज्यन्त धाताधिपतिर् आसीत् ॥
ekayāstuvata prajā ' adhīyanta prajāpatir adhipatir āsīt | tisṛbhir astuvata brahmāsṛjyata brahmaṇaspatir adhipatir āsīt | pañcabhir astuvata bhūtāny asṛjyanta bhūtānāṃ patir adhipatir āsīt | saptabhir astuvata sapta ṛṣayo 'sṛjyanta dhātādhipatir āsīt ||
Sanskrit only: no published translation is held for this verse.
नवभिर् अस्तुवत पितरो ऽसृज्यन्तादितिर् अध्निपत्न्य् आसीत् । एकादशभिर् अस्तुवत ऽ ऋतवो ऽसृज्यन्तार्तवा ऽ अधिपतय ऽ आसन् । त्रयोदशभिर् अस्तुवत मासा ऽ असृज्यन्त संवत्सरो ऽधिपतिर् आसीत् । पञ्चदशभिर् अस्तुवत क्षत्रम् असृज्यतेन्द्रो ऽधिपतिर् आसीत् । सप्तदशभिर् अस्तुवत ग्राम्याः पशवो ऽसृज्यन्त बृहस्पतिर् अधिपतिर् आसीत् ॥
navabhir astuvata pitaro 'sṛjyantāditir adhnipatny āsīt | ekādaśabhir astuvata ' ṛtavo 'sṛjyantārtavā ' adhipataya ' āsan | trayodaśabhir astuvata māsā ' asṛjyanta saṃvatsaro 'dhipatir āsīt | pañcadaśabhir astuvata kṣatram asṛjyatendro 'dhipatir āsīt | saptadaśabhir astuvata grāmyāḥ paśavo 'sṛjyanta bṛhaspatir adhipatir āsīt ||
Sanskrit only: no published translation is held for this verse.
नवदशभिर् अस्तुवत शूद्रार्याव् असृज्येताम् अहोरात्रे ऽ अधिपत्नी आस्ताम् । एकविꣳशत्यास्तुवतैकशफाः पशवो सृज्यन्त वरुणो ऽधिपतिर् आसीत् । त्रयोविꣳशत्यास्तुवत क्षुद्रां पशवो ऽसृज्यन्त पूषाधिपतिर् आसीत् । पञ्चविꣳशत्यास्तुवताऽऽरण्याः पशवो ऽसृज्यन्त वायुर् अधिपतिर् आसीत् । सप्तविꣳशत्यास्तुवत द्यावापृथिवी व्यैतां वसवो रुद्राऽ आदित्याऽ अनुव्य् आयꣳस् त ऽ एवाधिपतय ऽ आसन् ॥
navadaśabhir astuvata śūdrāryāv asṛjyetām ahorātre ' adhipatnī āstām | ekavim̐śatyāstuvataikaśaphāḥ paśavo sṛjyanta varuṇo 'dhipatir āsīt | trayovim̐śatyāstuvata kṣudrāṃ paśavo 'sṛjyanta pūṣādhipatir āsīt | pañcavim̐śatyāstuvatā''raṇyāḥ paśavo 'sṛjyanta vāyur adhipatir āsīt | saptavim̐śatyāstuvata dyāvāpṛthivī vyaitāṃ vasavo rudrā' ādityā' anuvy āyam̐s ta ' evādhipataya ' āsan ||
Sanskrit only: no published translation is held for this verse.
नवविꣳशत्यास्तुवत वनस्पतयोऽसृज्यन्त सोमो ऽधिपतिर् आसीत् । एकत्रिꣳशतास्तुवत प्रजा ऽ असृज्यन्त यवाश् चायवाश् चाधिपतय ऽ आसन् । त्रयस्त्रिꣳशतास्तुवत भूतान्य् अशाम्यन् प्रजापतिः परमेष्ठ्य् अधिपतिर् आसीत् । [लोकं पृण छिद्रं पृणाथो सीद ध्रुवा त्वम् । इन्द्राग्नी त्वा बृहस्पतिर् अस्मिन् योनाव् असीषदन् । ता अस्य सूददोहसः सोमꣳ श्रीणन्ति पृश्नयः । जन्मन् देवानां विशस् त्रिष्व् आ रोचने दिवः । इन्द्रं विश्वा अवीवृधन्त् समुद्रव्यचसं गिरः । रथीतमꣳ रथीनां वाजानाꣳ सत्पतिं पतिम् ॥
navavim̐śatyāstuvata vanaspatayo'sṛjyanta somo 'dhipatir āsīt | ekatrim̐śatāstuvata prajā ' asṛjyanta yavāś cāyavāś cādhipataya ' āsan | trayastrim̐śatāstuvata bhūtāny aśāmyan prajāpatiḥ parameṣṭhy adhipatir āsīt | [lokaṃ pṛṇa chidraṃ pṛṇātho sīda dhruvā tvam | indrāgnī tvā bṛhaspatir asmin yonāv asīṣadan | tā asya sūdadohasaḥ somam̐ śrīṇanti pṛśnayaḥ | janman devānāṃ viśas triṣv ā rocane divaḥ | indraṃ viśvā avīvṛdhant samudravyacasaṃ giraḥ | rathītamam̐ rathīnāṃ vājānām̐ satpatiṃ patim ||
Sanskrit only: no published translation is held for this verse.