Library·Vājasaneyi Saṃhitā (Śukla Yajurveda, as given on Wikisource)·19
स्वाद्वीं त्वा स्वादुना तीव्रां तीव्रेणामृताम् अमृतेन । मधुमतीं मधुमता सृजामि सꣳ सोमेन । सोमोऽसि । अश्विभ्यां पच्यस्व । सरस्वत्यै पच्यस्व । इन्द्राय सुत्राम्णे पच्यस्व ॥
svādvīṃ tvā svādunā tīvrāṃ tīvreṇāmṛtām amṛtena | madhumatīṃ madhumatā sṛjāmi sam̐ somena | somo'si | aśvibhyāṃ pacyasva | sarasvatyai pacyasva | indrāya sutrāmṇe pacyasva ||
Sanskrit only: no published translation is held for this verse.
परीतो षिञ्चता सुतꣳ सोमो य ऽ उत्तमꣳ हविः । दधन्वान् यो नर्यो अप्स्व् अन्तर् आ सुषाव सोमम् अद्रिभिः ॥
parīto ṣiñcatā sutam̐ somo ya ' uttamam̐ haviḥ | dadhanvān yo naryo apsv antar ā suṣāva somam adribhiḥ ||
Hence sprinkle forth the juice effused, Soma, the best of sacred gifts, Who, friend of man, hath run amid the water-streams. He hath pressed Soma out with stones.
Translated by Ralph T. H. Griffith (1896)This is the translator's rendering of the same verse where it occurs at RV 9.107.1; the wording of this text may differ in places.
वायोः पूतः पवित्रेण प्रत्यङ्क् सोमो ऽ अतिद्रुतः । इन्द्रस्य युज्यः सखा । वायोः पूतः पवित्रेण प्राङ् सोमो ऽ अतिद्रुतः । इन्द्रस्य युज्यः सखा ॥
vāyoḥ pūtaḥ pavitreṇa pratyaṅk somo ' atidrutaḥ | indrasya yujyaḥ sakhā | vāyoḥ pūtaḥ pavitreṇa prāṅ somo ' atidrutaḥ | indrasya yujyaḥ sakhā ||
Sanskrit only: no published translation is held for this verse.
पुनाति ते परिस्रुतꣳ सोमꣳ सूर्यस्य दुहिता । वारेण शश्वता तना ॥
punāti te parisrutam̐ somam̐ sūryasya duhitā | vāreṇa śaśvatā tanā ||
By means of this eternal fleece may Surya's Daughter purify Thy Soma that is foaming forth.
Translated by Ralph T. H. Griffith (1896)This is the translator's rendering of the same verse where it occurs at RV 9.1.6; the wording of this text may differ in places.
ब्रह्म क्षत्रं पवते तेज ऽ इन्द्रियꣳ सुरया सोमः सुत ऽ आसुतो मदाय । शुक्रेण देव देवताः पिपृग्धि रसेनान्नं यजमानाय धेहि ॥
brahma kṣatraṃ pavate teja ' indriyam̐ surayā somaḥ suta ' āsuto madāya | śukreṇa deva devatāḥ pipṛgdhi rasenānnaṃ yajamānāya dhehi ||
Sanskrit only: no published translation is held for this verse.
कुविद् अङ्ग यवमन्तो यवं चिद् यथा दान्त्य् अनुपूर्वं वियूय । इहेहैषां कृणुहि भोजनानि ये बर्हिषो नम ऽ उक्तिं यजन्ति । उपयामगृहीतो ऽस्य् अश्विभ्यां त्वा सरस्वत्यै त्वेन्द्राय त्वा सुत्राम्णे । ऽ एष ते योनिस् तेजसे त्वा वीर्याय त्वा बलाय त्वा ॥
kuvid aṅga yavamanto yavaṃ cid yathā dānty anupūrvaṃ viyūya | ihehaiṣāṃ kṛṇuhi bhojanāni ye barhiṣo nama ' uktiṃ yajanti | upayāmagṛhīto 'sy aśvibhyāṃ tvā sarasvatyai tvendrāya tvā sutrāmṇe | ' eṣa te yonis tejase tvā vīryāya tvā balāya tvā ||
Sanskrit only: no published translation is held for this verse.
नाना हि वां देवहितꣳ सदस् कृतं मा सꣳ सृक्षाथां परमे व्योमन् । सुरा त्वम् असि शुष्मिणी सोम ऽ एष मा मा हिꣳसीः स्वां योनिम् आविशन्ती ॥
nānā hi vāṃ devahitam̐ sadas kṛtaṃ mā sam̐ sṛkṣāthāṃ parame vyoman | surā tvam asi śuṣmiṇī soma ' eṣa mā mā him̐sīḥ svāṃ yonim āviśantī ||
Sanskrit only: no published translation is held for this verse.
उपयामगृहीतो ऽस्य् आश्विनं तेजः सारस्वतं वीर्यम् ऐन्द्रं बलम् । एष ते योनिर् मोदाय त्वानन्दाय त्वा महसे त्वा ॥
upayāmagṛhīto 'sy āśvinaṃ tejaḥ sārasvataṃ vīryam aindraṃ balam | eṣa te yonir modāya tvānandāya tvā mahase tvā ||
Sanskrit only: no published translation is held for this verse.
तेजो ऽसि तेजो मयि धेहि । वीर्यम् असि वीर्यं मयि धेहि । बलम् असि बलं मयि धेहि । ओजो ऽस्य् ओजो मयि धेहि । मन्युर् असि मन्युं मयि धेहि । सहो ऽसि सहो मयि धेहि ॥
tejo 'si tejo mayi dhehi | vīryam asi vīryaṃ mayi dhehi | balam asi balaṃ mayi dhehi | ojo 'sy ojo mayi dhehi | manyur asi manyuṃ mayi dhehi | saho 'si saho mayi dhehi ||
Sanskrit only: no published translation is held for this verse.
या व्याघ्रं विषूचिकोभौ वृकं च रक्षति । श्येनं पतत्रिणꣳ सिꣳहꣳ सेमं पात्व् अꣳहसः ॥
yā vyāghraṃ viṣūcikobhau vṛkaṃ ca rakṣati | śyenaṃ patatriṇam̐ sim̐ham̐ semaṃ pātv am̐hasaḥ ||
Sanskrit only: no published translation is held for this verse.
यद् आपिपेष मातरं पुत्रः प्रमुदितो धयन् । एतत् तद् अग्ने ऽ अनृणो भवाम्य् अहतौ पितरौ मया । सम्पृच स्थ सं मा भद्रेण पृङ्क्त । विपृच स्थ वि मा पाप्मना पृङ्क्त ॥
yad āpipeṣa mātaraṃ putraḥ pramudito dhayan | etat tad agne ' anṛṇo bhavāmy ahatau pitarau mayā | sampṛca stha saṃ mā bhadreṇa pṛṅkta | vipṛca stha vi mā pāpmanā pṛṅkta ||
Sanskrit only: no published translation is held for this verse.
देवा यज्ञम् अतन्वत भेषजं भिषजाश्विना । वाचा सरस्वती भिषग् इन्द्रायेन्द्रियाणि दधतः ॥
devā yajñam atanvata bheṣajaṃ bhiṣajāśvinā | vācā sarasvatī bhiṣag indrāyendriyāṇi dadhataḥ ||
Sanskrit only: no published translation is held for this verse.
दीक्षायै रूपꣳ शष्पाणि प्रायणीयस्य तोक्मानि । क्रयस्य रूपꣳ सोमस्य लाजाः सोमाꣳशवो मधु ॥
dīkṣāyai rūpam̐ śaṣpāṇi prāyaṇīyasya tokmāni | krayasya rūpam̐ somasya lājāḥ somām̐śavo madhu ||
Sanskrit only: no published translation is held for this verse.
आतिथ्यरूपं मासरं महावीरस्य नग्नहुः । रूपम् उपसदाम् एतत् तिस्रो रात्रीः सुरासुता ॥
ātithyarūpaṃ māsaraṃ mahāvīrasya nagnahuḥ | rūpam upasadām etat tisro rātrīḥ surāsutā ||
Sanskrit only: no published translation is held for this verse.
सोमस्य रूप क्रीतस्य परिस्रुत् परि षिच्यते । अश्विभ्यां दुग्धं भेषजम् इन्द्रायैन्द्रꣳ सरस्वत्या ॥
somasya rūpa krītasya parisrut pari ṣicyate | aśvibhyāṃ dugdhaṃ bheṣajam indrāyaindram̐ sarasvatyā ||
Sanskrit only: no published translation is held for this verse.
आसन्दी रूपꣳ राजासन्द्यै वेद्यै कुम्भी सुराधानी । अन्तर ऽ उत्तरवेद्या रूपं कारोतरो भिषक् ॥
āsandī rūpam̐ rājāsandyai vedyai kumbhī surādhānī | antara ' uttaravedyā rūpaṃ kārotaro bhiṣak ||
Sanskrit only: no published translation is held for this verse.
वेद्या वेदिः सम् आप्यते बर्हिषा बर्हिर् इन्द्रियम् । यूपेन यूप ऽ आप्यते प्रणीतो ऽ अग्निर् अग्निना ॥
vedyā vediḥ sam āpyate barhiṣā barhir indriyam | yūpena yūpa ' āpyate praṇīto ' agnir agninā ||
Sanskrit only: no published translation is held for this verse.
हविर्धानं यद् अश्विनाग्नीध्रं यत् सरस्वती । इन्द्रायैन्द्रꣳ सदस् कृतं पत्नीशालं गार्हपत्यः ॥
havirdhānaṃ yad aśvināgnīdhraṃ yat sarasvatī | indrāyaindram̐ sadas kṛtaṃ patnīśālaṃ gārhapatyaḥ ||
Sanskrit only: no published translation is held for this verse.
प्रैषेभिः प्रैषान् आप्नोत्य् आप्रीभिर् आप्रीर् यज्ञस्य । प्रयाजेभिर् अनुयाजान् वषट्कारेभिर् आहुतीः ॥
praiṣebhiḥ praiṣān āpnoty āprībhir āprīr yajñasya | prayājebhir anuyājān vaṣaṭkārebhir āhutīḥ ||
Sanskrit only: no published translation is held for this verse.
पशुभिः पशून् आप्नोति पुरोडाशैर् हवीꣳष्य् आ । छन्दोभिः सामिधेनीर् याज्याभिर् वषट्कारान् ॥
paśubhiḥ paśūn āpnoti puroḍāśair havīm̐ṣy ā | chandobhiḥ sāmidhenīr yājyābhir vaṣaṭkārān ||
Sanskrit only: no published translation is held for this verse.
धानाः करम्भः सक्तवः परीवापः पयो दधि । सोमस्य रूपꣳ हविष आमिक्षा वाजिनं मधु ॥
dhānāḥ karambhaḥ saktavaḥ parīvāpaḥ payo dadhi | somasya rūpam̐ haviṣa āmikṣā vājinaṃ madhu ||
Sanskrit only: no published translation is held for this verse.
धानानाꣳ रूपं कुवलं परीवापस्य गोधूमाः । सक्तूनाꣳ रूपं बदरम् उपवाकाः करम्भस्य ॥
dhānānām̐ rūpaṃ kuvalaṃ parīvāpasya godhūmāḥ | saktūnām̐ rūpaṃ badaram upavākāḥ karambhasya ||
Sanskrit only: no published translation is held for this verse.
पयसो रूपं यद् यवा दध्नो रूपं कर्कन्धूनि । सोमस्य रूपं वाजिनꣳ सौम्यस्य रूपम् आमिक्षा ॥
payaso rūpaṃ yad yavā dadhno rūpaṃ karkandhūni | somasya rūpaṃ vājinam̐ saumyasya rūpam āmikṣā ||
Sanskrit only: no published translation is held for this verse.
आ श्रावयेति स्तोत्रियाः प्रत्याश्रावो ऽ अनुरूपः । यजेति धाय्यारूपं प्रगाथा येयजामहाः ॥
ā śrāvayeti stotriyāḥ pratyāśrāvo ' anurūpaḥ | yajeti dhāyyārūpaṃ pragāthā yeyajāmahāḥ ||
Sanskrit only: no published translation is held for this verse.
अर्धऽऋचैर् उक्थानाꣳ रूपं पदैर् आप्नोति निविदः । प्रणवैः शस्त्राणाꣳ रूपं पयसा सोम आप्यते ॥
ardha'ṛcair ukthānām̐ rūpaṃ padair āpnoti nividaḥ | praṇavaiḥ śastrāṇām̐ rūpaṃ payasā soma āpyate ||
Sanskrit only: no published translation is held for this verse.
अश्विभ्यां प्रातःसवनम् इन्द्रेणैन्द्रं माध्यन्दिनम् । वैश्वदेवꣳ सरस्वत्या तृतीयम् आप्तꣳ सवनम् ॥
aśvibhyāṃ prātaḥsavanam indreṇaindraṃ mādhyandinam | vaiśvadevam̐ sarasvatyā tṛtīyam āptam̐ savanam ||
Sanskrit only: no published translation is held for this verse.
वायव्यैर् वायव्यान् आप्नोति सतेन द्रोणकलशम् । कुम्भीभ्याम् अम्भृणौ सुते स्थालीभि स्थालीर् आप्नोति ॥
vāyavyair vāyavyān āpnoti satena droṇakalaśam | kumbhībhyām ambhṛṇau sute sthālībhi sthālīr āpnoti ||
Sanskrit only: no published translation is held for this verse.
यजुर्भिर् आप्यन्ते ग्रहा ग्रहै स्तोमाश् च विष्टुतीः । छन्दोभिर् उक्थाशस्त्राणि साम्नावभृथऽआप्यते ॥
yajurbhir āpyante grahā grahai stomāś ca viṣṭutīḥ | chandobhir ukthāśastrāṇi sāmnāvabhṛtha'āpyate ||
Sanskrit only: no published translation is held for this verse.
इडाभिर् भक्षान् आप्नोति सूक्तवाकेनाशिषः । शंयुना पत्नीसंयाजान्त् समिष्टयजुषा सꣳस्थाम् ॥
iḍābhir bhakṣān āpnoti sūktavākenāśiṣaḥ | śaṃyunā patnīsaṃyājānt samiṣṭayajuṣā sam̐sthām ||
Sanskrit only: no published translation is held for this verse.
व्रतेन दीक्षाम् आप्नोति दीक्षयाप्नोति दक्षिणाम् । दक्षिणा श्रद्धाम् आप्नोति श्रद्धया सत्यम् आप्यते ॥
vratena dīkṣām āpnoti dīkṣayāpnoti dakṣiṇām | dakṣiṇā śraddhām āpnoti śraddhayā satyam āpyate ||
Sanskrit only: no published translation is held for this verse.
एतावद् रूपं यज्ञस्य यद् देवैर् ब्रह्मणा कृतम् । तद् एतत् सर्वम् आप्नोति यज्ञे सौत्रामणी सुते ॥
etāvad rūpaṃ yajñasya yad devair brahmaṇā kṛtam | tad etat sarvam āpnoti yajñe sautrāmaṇī sute ||
Sanskrit only: no published translation is held for this verse.
सुरावन्तं बर्हिषदꣳ सुवीरं यज्ञꣳ हिन्वन्ति महिषा नमोभिः । दधानाः सोमं दिवि देवतासु मदेमेन्द्रं यजमानाः स्वर्काः ॥
surāvantaṃ barhiṣadam̐ suvīraṃ yajñam̐ hinvanti mahiṣā namobhiḥ | dadhānāḥ somaṃ divi devatāsu mademendraṃ yajamānāḥ svarkāḥ ||
Sanskrit only: no published translation is held for this verse.
यस् ते रसः सम्भृत ऽ ओषधीषु सोमस्य शुष्मः सुरया सुतस्य । तेन जिन्व यजमानं मदेन सरस्वतीम् अश्विनाव् इन्द्रम् अग्निम् ॥
yas te rasaḥ sambhṛta ' oṣadhīṣu somasya śuṣmaḥ surayā sutasya | tena jinva yajamānaṃ madena sarasvatīm aśvināv indram agnim ||
Sanskrit only: no published translation is held for this verse.
यम् अश्विना नमुचेर् आसुराद् अधि सरस्वत्य् असुनोद् इन्द्रियाय । इमं तꣳ शुक्रं मधुमन्तम् इन्दुꣳ सोमꣳ राजानम् इह भक्षयामि ॥
yam aśvinā namucer āsurād adhi sarasvaty asunod indriyāya | imaṃ tam̐ śukraṃ madhumantam indum̐ somam̐ rājānam iha bhakṣayāmi ||
Sanskrit only: no published translation is held for this verse.
यद् अत्र रिप्तꣳ रसिनः सुतस्य यद् इन्द्रो ऽ अपिबच्छचीभिः । अहं तद् अस्य मनसा शिवेन सोमꣳ राजानम् इह भक्षयामि ॥
yad atra riptam̐ rasinaḥ sutasya yad indro ' apibacchacībhiḥ | ahaṃ tad asya manasā śivena somam̐ rājānam iha bhakṣayāmi ||
Sanskrit only: no published translation is held for this verse.
पितृभ्यः स्वधायिभ्यः स्वधा नमः । पितामहेभ्यः स्वधायिभ्यः स्वधा नमः । प्रपितामहेभ्यः स्वधायिभ्यः स्वधा नमः । अक्षन् पितरः । ऽअमीमदन्त पितरः । ऽअतीतृपन्त पितरः । पितरः शुन्धध्वम् ॥
pitṛbhyaḥ svadhāyibhyaḥ svadhā namaḥ | pitāmahebhyaḥ svadhāyibhyaḥ svadhā namaḥ | prapitāmahebhyaḥ svadhāyibhyaḥ svadhā namaḥ | akṣan pitaraḥ | 'amīmadanta pitaraḥ | 'atītṛpanta pitaraḥ | pitaraḥ śundhadhvam ||
Sanskrit only: no published translation is held for this verse.
पुनन्तु मा पितरः सोम्यासः पुनन्तु मा पितामहाः । पुनन्तु प्रपितामहाः पवित्रेण शतायुषा । पुनन्तु मा पितामहाः सोम्यासः पुनन्तु प्रपितामहाः । पवित्रेण शतायुषा विश्वम् आयुर् व्यश्नवै ॥
punantu mā pitaraḥ somyāsaḥ punantu mā pitāmahāḥ | punantu prapitāmahāḥ pavitreṇa śatāyuṣā | punantu mā pitāmahāḥ somyāsaḥ punantu prapitāmahāḥ | pavitreṇa śatāyuṣā viśvam āyur vyaśnavai ||
Sanskrit only: no published translation is held for this verse.
अग्न ऽ आयूꣳषि पवस ऽ आ सुवोर्जम् इषं च नः । आरे बाधस्व दुच्छुनाम् ॥
agna ' āyūm̐ṣi pavasa ' ā suvorjam iṣaṃ ca naḥ | āre bādhasva ducchunām ||
Sanskrit only: no published translation is held for this verse.
पुनन्तु मा देवजनाः पुनन्तु मनसा धियः । पुनन्तु विश्वा भूतानि जातवेदः पुनीहि मा ॥
punantu mā devajanāḥ punantu manasā dhiyaḥ | punantu viśvā bhūtāni jātavedaḥ punīhi mā ||
Sanskrit only: no published translation is held for this verse.
पवित्रेण पुनीहि मा शुक्रेण देव दीद्यत् । अग्ने क्रत्वा क्रतूँ२ऽर् अनु ॥
pavitreṇa punīhi mā śukreṇa deva dīdyat | agne kratvā kratū~2'r anu ||
Sanskrit only: no published translation is held for this verse.
यत् ते पवित्रम् अर्चिष्य् अग्ने विततम् अन्तरा । ब्रह्म तेन पुनातु मा ॥
yat te pavitram arciṣy agne vitatam antarā | brahma tena punātu mā ||
Sanskrit only: no published translation is held for this verse.
पवमानः सो ऽ अद्य नः पवित्रेण विचर्षणिः । यः पोता स पुनातु मा ॥
pavamānaḥ so ' adya naḥ pavitreṇa vicarṣaṇiḥ | yaḥ potā sa punātu mā ||
This day may Pavamana cleanse us with his purifying power, Most active purifying Priest.
Translated by Ralph T. H. Griffith (1896)This is the translator's rendering of the same verse where it occurs at RV 9.67.22; the wording of this text may differ in places.
उभाभ्यां देव सवितः पवित्रेण सवेन च । मां पुनीहि विश्वतः ॥
ubhābhyāṃ deva savitaḥ pavitreṇa savena ca | māṃ punīhi viśvataḥ ||
Savitar, God, by both of these, libation, purifying power, Purify me on every side.
Translated by Ralph T. H. Griffith (1896)This is the translator's rendering of the same verse where it occurs at RV 9.67.25; the wording of this text may differ in places.
वैश्वदेवी पुनती देव्य् आगाद् यस्याम् इमा बह्व्यस् तन्वो वीतपृष्ठाः । तया मदन्तः सधमादेषु वयꣳ स्याम पतयो रयीणाम् ॥
vaiśvadevī punatī devy āgād yasyām imā bahvyas tanvo vītapṛṣṭhāḥ | tayā madantaḥ sadhamādeṣu vayam̐ syāma patayo rayīṇām ||
Sanskrit only: no published translation is held for this verse.
ये समानाः समनसः पितरो यमराज्ये । तेषां लोकः स्वधा नमो यज्ञो देवेषु कल्पताम् ॥
ye samānāḥ samanasaḥ pitaro yamarājye | teṣāṃ lokaḥ svadhā namo yajño deveṣu kalpatām ||
Sanskrit only: no published translation is held for this verse.
ये समानाः समनसो जीवा जीवेषु मामकाः । तेषाꣳ श्रीर् मयि कल्पताम् अस्मिँल्लोके शतꣳ समाः ॥
ye samānāḥ samanaso jīvā jīveṣu māmakāḥ | teṣām̐ śrīr mayi kalpatām asmi~lloke śatam̐ samāḥ ||
Sanskrit only: no published translation is held for this verse.
द्वे सृती ऽ अशृणवं पितॄणाम् अहं देवानाम् उत मर्त्यानाम् । ताभ्याम् इदं विश्वम् एजत् सम् एति यद् अन्तरा पितरं मातरं च ॥
dve sṛtī ' aśṛṇavaṃ pitṝṇām ahaṃ devānām uta martyānām | tābhyām idaṃ viśvam ejat sam eti yad antarā pitaraṃ mātaraṃ ca ||
Sanskrit only: no published translation is held for this verse.
इदꣳ हविः प्रजननं मे ऽ अस्तु दशवीरꣳ सर्वगणꣳ स्वस्तये । आत्मसनि प्रजासनि पशुसनि लोकसन्य् अभयसनि । अग्निः प्रजां बहुलां मे करोत्व् अन्नं पयो रेतो ऽ अस्मासु धत्त ॥
idam̐ haviḥ prajananaṃ me ' astu daśavīram̐ sarvagaṇam̐ svastaye | ātmasani prajāsani paśusani lokasany abhayasani | agniḥ prajāṃ bahulāṃ me karotv annaṃ payo reto ' asmāsu dhatta ||
Sanskrit only: no published translation is held for this verse.
उद् ईरताम् ऽ अवर उत् परास ऽ उन् मध्यमाः पितरः सोम्यासः । असुं य ऽ ईयुर् अवृका ऽ ऋतज्ञास् ते नो ऽवन्तु पितरो हवेषु ॥
ud īratām ' avara ut parāsa ' un madhyamāḥ pitaraḥ somyāsaḥ | asuṃ ya ' īyur avṛkā ' ṛtajñās te no 'vantu pitaro haveṣu ||
May they ascend, the lowest, highest, midmost, the Fathers who deserve a share of Soma- May they who have attained the life of spirits, gentle and righteous, aid us when we call them.
Translated by Ralph T. H. Griffith (1896)This is the translator's rendering of the same verse where it occurs at RV 10.15.1; the wording of this text may differ in places.
अङ्गिरसो नः पितरो नवग्वा ऽ अथर्वाणो भृगवः सोम्यासः । तेषां वयꣳ सुमतौ यज्ञियानाम् अपि भद्रे सौमनसे स्याम ॥
aṅgiraso naḥ pitaro navagvā ' atharvāṇo bhṛgavaḥ somyāsaḥ | teṣāṃ vayam̐ sumatau yajñiyānām api bhadre saumanase syāma ||
Our Fathers are Angirases, Navagvas, Atharvans, Bhrgus who deserve the Soma. May these, the Holy, look on us with favour, may we enjoy their gracious loving-kindness.
Translated by Ralph T. H. Griffith (1896)This is the translator's rendering of the same verse where it occurs at RV 10.14.6; the wording of this text may differ in places.
ये नः पूर्वे पितरः सोम्यासो ऽनूहिरे सोमपीथं वसिष्ठाः । तेभिर् यमः सꣳरराणो हवीꣳष्य् उशन्न् उशद्भिः प्रतिकामम् अत्तु ॥
ye naḥ pūrve pitaraḥ somyāso 'nūhire somapīthaṃ vasiṣṭhāḥ | tebhir yamaḥ sam̐rarāṇo havīm̐ṣy uśann uśadbhiḥ pratikāmam attu ||
Our ancient Fathers who deserve the Soma, who came, most noble, to our Soma banquet,- With these let Yama, yearning with the yearning, rejoicing eat our offerings at his pleasure.
Translated by Ralph T. H. Griffith (1896)This is the translator's rendering of the same verse where it occurs at RV 10.15.8; the wording of this text may differ in places.
त्वꣳ सोम प्र चिकितो मनीषा त्वꣳ रजिष्ठम् अनु नेषि पन्थाम् । तव प्रणीती पितरो न ऽ इन्दो देवेषु रत्नम् अभजन्त धीराः ॥
tvam̐ soma pra cikito manīṣā tvam̐ rajiṣṭham anu neṣi panthām | tava praṇītī pitaro na ' indo deveṣu ratnam abhajanta dhīrāḥ ||
Sanskrit only: no published translation is held for this verse.
त्वया हि नः पितरः सोम पूर्वे कर्माणि चक्रुः पवमान धीराः । वन्वन्न् अवातः परिधीँ२ऽर् अपोर्णु वीरेभिर् अश्वैर् मघवा भवा नः ॥
tvayā hi naḥ pitaraḥ soma pūrve karmāṇi cakruḥ pavamāna dhīrāḥ | vanvann avātaḥ paridhī~2'r aporṇu vīrebhir aśvair maghavā bhavā naḥ ||
For our sage fathers, Soma Pavamana, of old performed, by thee, their sacred duties. Fighting unvanquished, open the enclosures: enrich us with large gifts of steeds and heroes.
Translated by Ralph T. H. Griffith (1896)This is the translator's rendering of the same verse where it occurs at RV 9.96.11; the wording of this text may differ in places.
त्वꣳ सोम पितृभिः संविदानो ऽनु द्यावापृथिवी ऽ आ ततन्थ । तस्मै त ऽ इन्दो हविषा विधेम वयꣳ स्याम पतयो रयीणाम् ॥
tvam̐ soma pitṛbhiḥ saṃvidāno 'nu dyāvāpṛthivī ' ā tatantha | tasmai ta ' indo haviṣā vidhema vayam̐ syāma patayo rayīṇām ||
Sanskrit only: no published translation is held for this verse.
बर्हिषदः पितर ऽ ऊत्य् अर्वाग् इमा वो हव्या चकृमा जुषध्वम् । त ऽ आ गतावसा शंतमेनाथा नः शं योर् अरपो दधात ॥
barhiṣadaḥ pitara ' ūty arvāg imā vo havyā cakṛmā juṣadhvam | ta ' ā gatāvasā śaṃtamenāthā naḥ śaṃ yor arapo dadhāta ||
Fathers who sit on sacred grass, come, help us: these offerings have we made for you; accept them. So come to us with most auspicious favour, and give us health and strength without a trouble.
Translated by Ralph T. H. Griffith (1896)This is the translator's rendering of the same verse where it occurs at RV 10.15.4; the wording of this text may differ in places.
आहं पितॄन् सुविदत्राꣳ२ऽ अवित्सि नपातं च विक्रमणं च विष्णोः । बर्हिषदो ये स्वधया सुतस्य भजन्त पित्वस्त ऽ इहागमिष्ठाः ॥
āhaṃ pitṝn suvidatrām̐2' avitsi napātaṃ ca vikramaṇaṃ ca viṣṇoḥ | barhiṣado ye svadhayā sutasya bhajanta pitvasta ' ihāgamiṣṭhāḥ ||
1 have attained the gracious-minded Fathers, I have gained son and progeny from Visnu. They who enjoy pressed juices with oblation seated on sacred grass, come oftenest hither.
Translated by Ralph T. H. Griffith (1896)This is the translator's rendering of the same verse where it occurs at RV 10.15.3; the wording of this text may differ in places.
उपहूताः पितरः सोम्यासो बर्हिष्येषु निधिषु प्रियेषु । त ऽ आ गमन्तु त ऽ इह श्रुवन्त्व् अधि ब्रुवन्तु ते ऽवन्त्व् अस्मान् ॥
upahūtāḥ pitaraḥ somyāso barhiṣyeṣu nidhiṣu priyeṣu | ta ' ā gamantu ta ' iha śruvantv adhi bruvantu te 'vantv asmān ||
May they, the Fathers, worthy of the Soma, invited to their favourite oblations. Laid on the sacred grass, come nigh and listen: may they be gracious unto us and bless us.
Translated by Ralph T. H. Griffith (1896)This is the translator's rendering of the same verse where it occurs at RV 10.15.5; the wording of this text may differ in places.
आ यन्तु नः पितरः सोम्यासोऽग्निष्वात्ताः पथिभिर् देवयानैः । अस्मिन् यज्ञे स्वधया मदन्तो ऽधि ब्रुवन्तु ते ऽवन्त्व् अस्मान् ॥
ā yantu naḥ pitaraḥ somyāso'gniṣvāttāḥ pathibhir devayānaiḥ | asmin yajñe svadhayā madanto 'dhi bruvantu te 'vantv asmān ||
Sanskrit only: no published translation is held for this verse.
अग्निष्वात्ताः पितर ऽ एह गच्छत सदः-सदः सदत सुप्रणीतयः । अत्ता हवीꣳषि प्रयतानि बर्हिष्य् अथा रयिꣳ सर्ववीरं दधातन ॥
agniṣvāttāḥ pitara ' eha gacchata sadaḥ-sadaḥ sadata supraṇītayaḥ | attā havīm̐ṣi prayatāni barhiṣy athā rayim̐ sarvavīraṃ dadhātana ||
Fathers whom Agni's flames have tasted, come ye nigh: ye kindly leaders, take ye each your proper place. Eat sacrificial food presented on the grass: grant riches with a multitude of hero sons.
Translated by Ralph T. H. Griffith (1896)This is the translator's rendering of the same verse where it occurs at RV 10.15.11; the wording of this text may differ in places.
ये ऽ अग्निष्वात्ता ये ऽ अनग्निष्वात्ता मध्ये दिवः स्वधया मादयन्ते । तेभ्यः स्वराड् असुनीतिम् एतां यथावशं तन्वं कल्पयाति ॥
ye ' agniṣvāttā ye ' anagniṣvāttā madhye divaḥ svadhayā mādayante | tebhyaḥ svarāḍ asunītim etāṃ yathāvaśaṃ tanvaṃ kalpayāti ||
Sanskrit only: no published translation is held for this verse.
अग्निष्वात्ताꣳ ऋतुमतो हवामहे नाराशꣳसे सोमपीथं य ऽ आशुः । ते नो विप्रासः सुहवा भवन्तु वयꣳ स्याम पतयो रयीणाम् ॥
agniṣvāttām̐ ṛtumato havāmahe nārāśam̐se somapīthaṃ ya ' āśuḥ | te no viprāsaḥ suhavā bhavantu vayam̐ syāma patayo rayīṇām ||
Sanskrit only: no published translation is held for this verse.
आच्या जानु दक्षिणतो निषद्येमं यज्ञम् अभि गृणीत विश्वे । मा हिꣳसिष्ट पितरः केन चिन् नो यद्व ऽ आगः पुरुषता कराम ॥
ācyā jānu dakṣiṇato niṣadyemaṃ yajñam abhi gṛṇīta viśve | mā him̐siṣṭa pitaraḥ kena cin no yadva ' āgaḥ puruṣatā karāma ||
Bowing your bended knees and seated southward, accept this sacrifice of ours with favour. Punish us not for any sin, O Fathers, which we through human frailty have committed.
Translated by Ralph T. H. Griffith (1896)This is the translator's rendering of the same verse where it occurs at RV 10.15.6; the wording of this text may differ in places.
आसीनासो ऽ अरुणीनाम् उपस्थे रयिं धत्त दाशुषे मर्त्याय । पुत्रेभ्यः पितरस् तस्य वस्वः प्र यच्छत त ऽ इहोर्जं दधात ॥
āsīnāso ' aruṇīnām upasthe rayiṃ dhatta dāśuṣe martyāya | putrebhyaḥ pitaras tasya vasvaḥ pra yacchata ta ' ihorjaṃ dadhāta ||
Lapped in the bosom of the purple Mornings, give riches to the man who brings oblations. Grant to your sons a portion of that treasure, and, present, give them energy, ye Fathers.
Translated by Ralph T. H. Griffith (1896)This is the translator's rendering of the same verse where it occurs at RV 10.15.7; the wording of this text may differ in places.
यम् अग्ने कव्यवाहन त्वं चिन् मन्यसे रयिम् । तं नो गीर्भिः श्रवाय्यं देवत्रा पनया युजम् ॥
yam agne kavyavāhana tvaṃ cin manyase rayim | taṃ no gīrbhiḥ śravāyyaṃ devatrā panayā yujam ||
Sanskrit only: no published translation is held for this verse.
यो ऽ अग्निः कव्यवाहनः पितॄन् यक्षद् ऋतावृधः । प्रेद् उ हव्यानि वोचति देवेभ्यश् च पितृभ्य ऽ आ ॥
yo ' agniḥ kavyavāhanaḥ pitṝn yakṣad ṛtāvṛdhaḥ | pred u havyāni vocati devebhyaś ca pitṛbhya ' ā ||
Sanskrit only: no published translation is held for this verse.
त्वम् अग्न ऽ ईडितः कव्यवाहनावाड् हव्यानि सुरभीणि कृत्वी । प्रादाः पितृभ्यः स्वधया ते ऽ अक्षन्न् अद्धि त्वं देव प्रयता हवीꣳषि ॥
tvam agna ' īḍitaḥ kavyavāhanāvāḍ havyāni surabhīṇi kṛtvī | prādāḥ pitṛbhyaḥ svadhayā te ' akṣann addhi tvaṃ deva prayatā havīm̐ṣi ||
Sanskrit only: no published translation is held for this verse.
ये चेह पितरो ये च नेह याꣳश् च विद्म याꣳ२ऽ उ च न प्रविद्म । त्वं वेत्थ यति ते जातवेदः स्वधाभिर् यज्ञꣳ सुकृतं जुषस्व ॥
ye ceha pitaro ye ca neha yām̐ś ca vidma yām̐2' u ca na pravidma | tvaṃ vettha yati te jātavedaḥ svadhābhir yajñam̐ sukṛtaṃ juṣasva ||
Thou, Jatavedas, knowest well the number of Fathers who are here and who are absent, Of Fathers whom we know and whom we know not: accept the sacrifice well prepared with portions.
Translated by Ralph T. H. Griffith (1896)This is the translator's rendering of the same verse where it occurs at RV 10.15.13; the wording of this text may differ in places.
इदं पितृभ्यो नमो ऽ अस्त्व् अद्य ये पूर्वासो य ऽ उपरास ईयुः । ये पार्थिवे रजस्य् आ निषत्ता ये वा नूनꣳ सुवृजनासु विक्षु ॥
idaṃ pitṛbhyo namo ' astv adya ye pūrvāso ya ' uparāsa īyuḥ | ye pārthive rajasy ā niṣattā ye vā nūnam̐ suvṛjanāsu vikṣu ||
Now let us pay this homage to the Fathers, to those who passed of old and those who followed, Those who have rested in the earthly region, and those who dwell among the Mighty Races.
Translated by Ralph T. H. Griffith (1896)This is the translator's rendering of the same verse where it occurs at RV 10.15.2; the wording of this text may differ in places.
अधा यथा नः पितरः परासः प्रत्नासो ऽ अग्न ऽ ऋतम् आशुषाणाः । शुचीदयन् दीधितिम् उक्थशासः क्षामा भिन्दन्तो ऽ अरुणीर् अप व्रन् ॥
adhā yathā naḥ pitaraḥ parāsaḥ pratnāso ' agna ' ṛtam āśuṣāṇāḥ | śucīdayan dīdhitim ukthaśāsaḥ kṣāmā bhindanto ' aruṇīr apa vran ||
As in the days of old our ancient Fathers, speeding the work of holy worship, Agni, Sought pure light and devotion, singing praises; they cleft the ground and made red Dawns apparent.
Translated by Ralph T. H. Griffith (1896)This is the translator's rendering of the same verse where it occurs at RV 4.2.16; the wording of this text may differ in places.
उशन्तस् त्वा नि धीमह्य् उशन्तः सम् इधीमहि । उशन्न् उशत ऽ आ वह पितॄन् हविषे ऽ अत्तवे ॥
uśantas tvā ni dhīmahy uśantaḥ sam idhīmahi | uśann uśata ' ā vaha pitṝn haviṣe ' attave ||
Right gladly would we set thee down, right gladly make thee burn and glow. Gladly bring yearning Fathers nigh to cat the food of sacrifice.
Translated by Ralph T. H. Griffith (1896)This is the translator's rendering of the same verse where it occurs at RV 10.16.12; the wording of this text may differ in places.
अपां फेनेन नमुचेः शिर ऽ इन्द्रोद् अवर्तयः । विश्वा यद् अजय स्पृधः ॥
apāṃ phenena namuceḥ śira ' indrod avartayaḥ | viśvā yad ajaya spṛdhaḥ ||
With waters' foam thou torest off, Indra, the head of Namuci, Subduing all contending hosts.
Translated by Ralph T. H. Griffith (1896)This is the translator's rendering of the same verse where it occurs at RV 8.14.13; the wording of this text may differ in places.
सोमो राजामृतꣳ सुत ऽ ऋजीषेणाजहान् मृत्युम् । ऋतेन सत्यम् इन्द्रियं विपानꣳ शुक्रम् अन्धस ऽ इन्द्रस्येन्द्रियम् इदं पयो ऽमृतं मधु ॥
somo rājāmṛtam̐ suta ' ṛjīṣeṇājahān mṛtyum | ṛtena satyam indriyaṃ vipānam̐ śukram andhasa ' indrasyendriyam idaṃ payo 'mṛtaṃ madhu ||
Sanskrit only: no published translation is held for this verse.
अद्भ्यः क्षीरं व्यपिबत् क्रुङ्ङ् आङ्गिरसो धिया । ऋतेन सत्यम् इन्द्रियं विपानꣳ शुक्रम् अन्धस इन्द्रस्येन्द्रियम् इदं पयो ऽमृतं मधु ॥
adbhyaḥ kṣīraṃ vyapibat kruṅṅ āṅgiraso dhiyā | ṛtena satyam indriyaṃ vipānam̐ śukram andhasa indrasyendriyam idaṃ payo 'mṛtaṃ madhu ||
Sanskrit only: no published translation is held for this verse.
सोमम् अद्भ्यो व्यपिबच् छन्दसा हꣳसः शुचिषत् । ऋतेन सत्यम् इन्द्रियं विपानꣳ शुक्रम् अन्धस ऽ इन्द्रस्येन्द्रियम् इदं पयो ऽमृतं मधु ॥
somam adbhyo vyapibac chandasā ham̐saḥ śuciṣat | ṛtena satyam indriyaṃ vipānam̐ śukram andhasa ' indrasyendriyam idaṃ payo 'mṛtaṃ madhu ||
Sanskrit only: no published translation is held for this verse.
अन्नात् परिस्रुतो रसं ब्रह्मणा व्यपिबत् क्षत्रं पयः सोमं प्रजापतिः । ऋतेन सत्यम् इन्द्रियं विपानꣳ शुक्रम् अन्धस ऽ इन्द्रस्येन्द्रियम् इदं पयो ऽमृतं मधु ॥
annāt parisruto rasaṃ brahmaṇā vyapibat kṣatraṃ payaḥ somaṃ prajāpatiḥ | ṛtena satyam indriyaṃ vipānam̐ śukram andhasa ' indrasyendriyam idaṃ payo 'mṛtaṃ madhu ||
Sanskrit only: no published translation is held for this verse.
रेतो मूत्रं वि जहाति योनिं प्रविशद् इन्द्रियम् । गर्भो जरायुणावृत ऽ उल्वं जहाति जन्मना । ऋतेन सत्यम् इन्द्रियं विपानꣳ शुक्रम् अन्धस ऽ इन्द्रस्येन्द्रियम् इदं पयो ऽमृतं मधु ॥
reto mūtraṃ vi jahāti yoniṃ praviśad indriyam | garbho jarāyuṇāvṛta ' ulvaṃ jahāti janmanā | ṛtena satyam indriyaṃ vipānam̐ śukram andhasa ' indrasyendriyam idaṃ payo 'mṛtaṃ madhu ||
Sanskrit only: no published translation is held for this verse.
दृष्ट्वा रूपे व्याकरोत् सत्यानृते प्रजापतिः । अश्रद्धाम् अनृते ऽदधाच् छ्रद्धाꣳ सत्ये प्रजापतिः । ऋतेन सत्यम् इन्द्रियं विपानꣳ शुक्रम् अन्धस ऽ इन्द्रस्येन्द्रियम् इदं पयो ऽमृतं मधु ॥
dṛṣṭvā rūpe vyākarot satyānṛte prajāpatiḥ | aśraddhām anṛte 'dadhāc chraddhām̐ satye prajāpatiḥ | ṛtena satyam indriyaṃ vipānam̐ śukram andhasa ' indrasyendriyam idaṃ payo 'mṛtaṃ madhu ||
Sanskrit only: no published translation is held for this verse.
वेदेन रूपे व्यपिबत् सुतासुतौ प्रजापतिः । ऋतेन सत्यम् इन्द्रियं विपानꣳ शुक्रम् अन्धस ऽ इन्द्रस्येन्द्रियम् इदं पयो ऽमृतं मधु ॥
vedena rūpe vyapibat sutāsutau prajāpatiḥ | ṛtena satyam indriyaṃ vipānam̐ śukram andhasa ' indrasyendriyam idaṃ payo 'mṛtaṃ madhu ||
Sanskrit only: no published translation is held for this verse.
दृष्ट्वा परिस्रुतो रसꣳ शुक्रेण शुक्रं व्यपिबत् । पयः सोमं प्रजापतिः । ऋतेन सत्यम् इन्द्रियं विपानꣳ शुक्रम् अन्धस ऽ इन्द्रस्येन्द्रियम् इदं पयो ऽमृतं मधु ॥
dṛṣṭvā parisruto rasam̐ śukreṇa śukraṃ vyapibat | payaḥ somaṃ prajāpatiḥ | ṛtena satyam indriyaṃ vipānam̐ śukram andhasa ' indrasyendriyam idaṃ payo 'mṛtaṃ madhu ||
Sanskrit only: no published translation is held for this verse.
सीसेन तन्त्रं मनसा मनीषिण ऽ ऊर्णासूत्रेण कवयो वयन्ति । अश्विना यज्ञꣳ सविता सरस्वतीन्द्रस्य रूपं वरुणो भिषज्यन् ॥
sīsena tantraṃ manasā manīṣiṇa ' ūrṇāsūtreṇa kavayo vayanti | aśvinā yajñam̐ savitā sarasvatīndrasya rūpaṃ varuṇo bhiṣajyan ||
Sanskrit only: no published translation is held for this verse.
तद् अस्य रूपम् अमृतꣳ शचीभिस् तिस्रो दधुर् देवताः सꣳरराणाः । लोमानि शष्पैर् बहुधा न तोक्मभिस् त्वग् अस्य माꣳसम् अभवन् न लाजाः ॥
tad asya rūpam amṛtam̐ śacībhis tisro dadhur devatāḥ sam̐rarāṇāḥ | lomāni śaṣpair bahudhā na tokmabhis tvag asya mām̐sam abhavan na lājāḥ ||
Sanskrit only: no published translation is held for this verse.
तद् अश्विना भिषजा रुद्रवर्तनी सरस्वती वयति पेशो ऽ अन्तरम् । अस्थि मज्जानं मासरैः कारोतरेण दधतो गवां त्वचि ॥
tad aśvinā bhiṣajā rudravartanī sarasvatī vayati peśo ' antaram | asthi majjānaṃ māsaraiḥ kārotareṇa dadhato gavāṃ tvaci ||
Sanskrit only: no published translation is held for this verse.
सरस्वती मनसा पेशलं वसु नासत्याभ्यां वयति दर्शतं वपुः । रसं परिस्रुता न रोहितं नग्नहुर् धीरस् तसरं न वेम ॥
sarasvatī manasā peśalaṃ vasu nāsatyābhyāṃ vayati darśataṃ vapuḥ | rasaṃ parisrutā na rohitaṃ nagnahur dhīras tasaraṃ na vema ||
Sanskrit only: no published translation is held for this verse.
पयसा शुक्रम् अमृतं जनित्रꣳ सुरया मूत्राज् जनयन्त रेतः । अपामतिं दुर्मतिं बाधमाना ऽ ऊवध्यं वातꣳ सब्वं तद् आरात् ॥
payasā śukram amṛtaṃ janitram̐ surayā mūtrāj janayanta retaḥ | apāmatiṃ durmatiṃ bādhamānā ' ūvadhyaṃ vātam̐ sabvaṃ tad ārāt ||
Sanskrit only: no published translation is held for this verse.
इन्द्रः सुत्रामा हृदयेन सत्यं पुरोडाशेन सविता जजान । यकृत् क्लोमानं वरुणो भिषज्यन् मतस्ने वायव्यैर् न मिनाति पित्तम् ॥
indraḥ sutrāmā hṛdayena satyaṃ puroḍāśena savitā jajāna | yakṛt klomānaṃ varuṇo bhiṣajyan matasne vāyavyair na mināti pittam ||
Sanskrit only: no published translation is held for this verse.
आन्त्राणि स्थालीर् मधु पिन्वमाना गुदाः पात्राणि सुदुघा न धेनुः । श्येनस्य पत्रं न प्लीहा शचीभिर् आसन्दी नाभिर् उदरं न माता ॥
āntrāṇi sthālīr madhu pinvamānā gudāḥ pātrāṇi sudughā na dhenuḥ | śyenasya patraṃ na plīhā śacībhir āsandī nābhir udaraṃ na mātā ||
Sanskrit only: no published translation is held for this verse.
कुम्भो वनिष्ठुर् जनिता शचीभिर् यस्मिन्न् अग्रे योन्यां गर्भो ऽ अन्तः । प्लाशिर् व्यक्तः शतधार ऽ उत्सो दुहे न कुम्भी स्वधां पितृभ्यः ॥
kumbho vaniṣṭhur janitā śacībhir yasminn agre yonyāṃ garbho ' antaḥ | plāśir vyaktaḥ śatadhāra ' utso duhe na kumbhī svadhāṃ pitṛbhyaḥ ||
Sanskrit only: no published translation is held for this verse.
मुखꣳ सद् अस्य शिर ऽ इत् सतेन जिह्वा पवित्रम् अश्विनासन्त् सरस्वती । चप्यं न पायुर् भिषग् अस्य वालो वस्तिर् न शेपो हरसा तरस्वी ॥
mukham̐ sad asya śira ' it satena jihvā pavitram aśvināsant sarasvatī | capyaṃ na pāyur bhiṣag asya vālo vastir na śepo harasā tarasvī ||
Sanskrit only: no published translation is held for this verse.
अश्विभ्यां चक्षुर् अमृतं ग्रहाभ्यां छागेन तेजो हविषा शृतेन । पक्ष्माणि गोधूमैः कुवलैर् उतानि पेशो न शुक्रम् असितं वसाते ॥
aśvibhyāṃ cakṣur amṛtaṃ grahābhyāṃ chāgena tejo haviṣā śṛtena | pakṣmāṇi godhūmaiḥ kuvalair utāni peśo na śukram asitaṃ vasāte ||
Sanskrit only: no published translation is held for this verse.
अविर् न मेषो नसि वीर्याय प्राणस्य पन्था ऽ अमृतो ग्रहाभ्याम् । सरस्वत्य् उपवाकैर् व्यानं नस्यानि बर्हिर् बदरैर् जजान ॥
avir na meṣo nasi vīryāya prāṇasya panthā ' amṛto grahābhyām | sarasvaty upavākair vyānaṃ nasyāni barhir badarair jajāna ||
Sanskrit only: no published translation is held for this verse.
इन्द्रस्य रूपं वृषभो बलाय कर्णाभ्याꣳ श्रोत्रम् अमृतं ग्रहाभ्यां । यवा न बर्हिर् भ्रुवि केसराणि कर्कन्धु जज्ञे मधु सारघं मुखात् ॥
indrasya rūpaṃ vṛṣabho balāya karṇābhyām̐ śrotram amṛtaṃ grahābhyāṃ | yavā na barhir bhruvi kesarāṇi karkandhu jajñe madhu sāraghaṃ mukhāt ||
Sanskrit only: no published translation is held for this verse.
आत्मन्न् उपस्थे न वृकस्य लोम मुखे श्मश्रूणि न व्याघ्रलोम । केशा न शीर्षन् यशसे श्रियै शिखा सिꣳहस्य लोम त्विषिर् इन्द्रियाणि ॥
ātmann upasthe na vṛkasya loma mukhe śmaśrūṇi na vyāghraloma | keśā na śīrṣan yaśase śriyai śikhā sim̐hasya loma tviṣir indriyāṇi ||
Sanskrit only: no published translation is held for this verse.
अङ्गान्य् आत्मन् भिषजा तद् अश्विनात्मानम् अङ्गैः सम् अधात् सरस्वती । इन्द्रस्य रूपꣳ शतमानम् आयुश् चन्द्रेण ज्योतिर् अमृतं दधानाः ॥
aṅgāny ātman bhiṣajā tad aśvinātmānam aṅgaiḥ sam adhāt sarasvatī | indrasya rūpam̐ śatamānam āyuś candreṇa jyotir amṛtaṃ dadhānāḥ ||
Sanskrit only: no published translation is held for this verse.
सरस्वती योन्यां गर्भम् अन्तर् अश्विभ्यां पत्नी सुकृतं बिभर्ति । अपाꣳ रसेन वरुणो न साम्नेन्द्रꣳ श्रियै जनयन्न् अप्सु राजा ॥
sarasvatī yonyāṃ garbham antar aśvibhyāṃ patnī sukṛtaṃ bibharti | apām̐ rasena varuṇo na sāmnendram̐ śriyai janayann apsu rājā ||
Sanskrit only: no published translation is held for this verse.
तेजः पशूनाꣳ हविर् इन्द्रियावत् परिस्रुता पयसा सारघं मधु । अश्विभ्यां दुग्धं भिषजा सरस्वत्या सुतासुताभ्याम् अमृतः सोम ऽ इन्दुः ॥
tejaḥ paśūnām̐ havir indriyāvat parisrutā payasā sāraghaṃ madhu | aśvibhyāṃ dugdhaṃ bhiṣajā sarasvatyā sutāsutābhyām amṛtaḥ soma ' induḥ ||
Sanskrit only: no published translation is held for this verse.