आ꣡प उन्दन्तु जीव꣡से दीर्घायुत्वा꣡य व꣡र्चस ओ꣡षधे त्र꣡यस् वैन(ग्ग्)ं स्व꣡धिते मै꣡न(ग्)ं हि(ग्)ंसीर् देव-श्रू꣡र् एता꣡नि प्र꣡वपे स्वस्त्य् उ꣡त्तराण्य् अशी या꣡पो अस्मा꣡न् मात꣡रश् शु꣡न्धन्तु घृते꣡न नो घृत-पु꣡वः पुनन्तु वि꣡श्वम् अस्म꣡त् प्र꣡वहन्तु रिप्र꣡म् उ꣡दाभ्यश् शु꣡चिरा पूत꣡ एमि सो꣡मस्य तनू꣡र् असि तनु꣡वं मे पा꣡हि महीनां꣡ प꣡यो ऽसि व꣡र्चो-धा꣡ असि व꣡र्चोम꣡यि धेहि वृत्र꣡स्य कनी꣡निकासि चक्षुष्-पा꣡ असि च꣡क्षुर् मे पाहि चित्-प꣡तिस् त्वा पु꣡नातु वाक्-प꣡तिस् त्वा पुनातु देव꣡स् त्वा सविता꣡ पुनात्व् अ꣡च्छिद्रेण पवि꣡त्रेण व꣡सोस् सू꣡र्यस्य रश्मि꣡भिस् त꣡स्य ते पवित्र-पते पवि꣡त्रेण य꣡स्मै कं꣡ पुने꣡ त꣡च् छकेयम् आ वो देवास ईमहे स꣡त्य-धर्माणो अध्वरे꣡ य꣡द् वो देवास आगुरे꣡ य꣡ज्ञियासो ह꣡वामह इ꣡न्द्राग्नी द्या꣡वा-पृथिवी आ꣡प ओषधीस् त्वं꣡ दीक्षा꣡णाम् अ꣡धिपतिर् असीह꣡ मा स꣡न्तं पाहि
ā́pa undantu jīváse dīrghāyutvā́ya várcasa óṣadhe tráyas vaina(gg)ṃ svádhite maína(g)ṃ hi(g)ṃsīr deva-śrū́r etā́ni právape svasty úttarāṇy aśī yā́po asmā́n mātáraś śúndhantu ghr̥téna no ghr̥ta-púvaḥ punantu víśvam asmát právahantu riprám údābhyaś śúcirā pūtá emi sómasya tanū́r asi tanúvaṃ me pā́hi mahīnā́ṃ páyo 'si várco-dhā́ asi várcomáyi dhehi vr̥trásya kanī́nikāsi cakṣuṣ-pā́ asi cákṣur me pāhi cit-pátis tvā púnātu vāk-pátis tvā punātu devás tvā savitā́ punātv ácchidreṇa pavítreṇa vásos sū́ryasya raśmíbhis tásya te pavitra-pate pavítreṇa yásmai káṃ puné tác chakeyam ā vo devāsa īmahe sátya-dharmāṇo adhvaré yád vo devāsa āguré yájñiyāso hávāmaha índrāgnī dyā́vā-pr̥thivī ā́pa oṣadhīs tváṃ dīkṣā́ṇām ádhipatir asīhá mā sántaṃ pāhi
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.