Section 1.2

In this sitting

1. 1.2.1देवासुरा ह वै यत्र संयेतिरे । उभये प्राजापत्यास् तद् ध देवा उद्गीथम् आजह्रुर् अनेनैनान् अभिभविष्याम इति
2. 1.2.2ते ह नासिक्यं प्राणम् उद्गीथम् उपासां चक्रिरे । तं ह असुराः पाप्मना विविधुः । तस्मात् तेनोभयं जिघ्रति सुरभि च दुर्गन्धि च । पाप्मना ह्य् एष विद्धः
3. 1.2.3अथ ह वाचम् उद्गीथम् उपासां चक्रिरे । तां हासुराः पाप्मना विविधुः । तस्मात् तयोभयं वदति सत्यं चानृतं च । पाप्मना ह्य् एषा विद्धा
4. 1.2.4अथ ह चक्षुर् उद्गीथम् उपासां चक्रिरे । तद् धासुराः पाप्मना विविधुः । तस्मात् तेनोभयं पश्यति दर्शनीयं चादर्शनीयं च । पाप्मना ह्य् एतद् विद्धम्
5. 1.2.5अथ ह श्रोत्रम् उद्गीथम् उपासां चक्रिरे । तद् धासुराः पाप्मना विविधुः । तस्मात् तेनोभयं शृणोति श्रवणीयं चाश्रवणीयं च । पाप्मना ह्य् एतद् विद्धम्
6. 1.2.6अथ ह मन उद्गीथम् उपासां चक्रिरे । तद् धासुराः पाप्मना विविधुः । तस्मात् तेनोभयं संकल्पयते संकल्पनीयं च । पाप्मना ह्य् एतद् विद्धम्
7. 1.2.7अथ ह य एवायं मुख्यः प्राणस् तम् उद्गीथम् उपासां चक्रिरे । तं हासुरा ऋत्वा विदध्वंसुर् यथाश्मानम् आखणम् ऋत्वा विध्वंसेतैवम्
8. 1.2.8एवं यथाश्मानम् आखणम् ऋत्वा विध्वंसत एवं हैव स विध्वंसते य एवंविदि पापं कामयते यश् चैनम् अभिदासति । स एषो ऽश्माखणः
9. 1.2.9नैवैतेन सुरभि न दुर्गन्धि विजानाति । अपहतपाप्मा ह्य् एषः । तेन यद् अश्नाति यत् पिबति तेनेतरान् प्राणान् अवति । एतम् उ एवान्ततो ऽवित्त्वोत्क्रामति । व्याददात्य् एवान्तत इति
10. 1.2.10तं हाङ्गिरा उद्गीथम् उपासां चक्रे । एतम् उ एवाङ्गिरसं मन्यन्ते ऽङ्गानां यद् रसः
11. 1.2.11तेन तं ह बृहस्पतिर् उद्गीथम् उपासां चक्रे । एतम् उ एव बृहस्पतिं मन्यन्ते । वाग् घि बृहती तस्या एषपतिः
12. 1.2.12तेन तं हायास्य उद्गीथम् उपासां चक्रे । एतम् उ एवायास्यं मन्यन्ते । आस्याद् यद् अयते
13. 1.2.13तेन तं ह बको दाल्भ्यो विदां चकार । स ह नैमिशीयानाम् उद्गाता बभूव । स ह स्मैभ्यः कामान् आगायति
14. 1.2.14आगाता ह वै कामानां भवति य एतद् एवं विद्वान् अक्षरम् उद्गीथम् उपास्ते । इत्य् अध्यात्मम्