Section 1.8

In this sitting

1. 1.8.1त्रयो होद्गीथे कुशला बभूवुः शिलकः शालावत्यश् चैकितायनो दाल्भ्यः प्रवाहणो जैवलिर् इति । ते होचुर् उद्गीथे वै कुशलाः स्मो हन्तोद्गीथे कथां वदाम इति
2. 1.8.2तथेति ह समुपविविशुः । स ह प्रावहणो जैवलिर् उवाच । भगवन्ताव् अग्रे वदताम् । भ्रामणयोर् वदतोर् वाचं श्रोष्यामीति
3. 1.8.3स ह शिलकः शालावत्यश् चैकितायनं दाल्भ्यम् उवाच हन्त त्वा पृच्छानीति । पृच्छेति होवाच
4. 1.8.4का साम्नो गतिर् इति । स्वर इति होवाच । स्वरस्य का गतिर् इति । प्राण इति होवाच । अन्नस्य का गतिर् इति । अन्नम् इति होवाच । अन्नस्य का गतिर् इति । आप इति होवाच
5. 1.8.5अपां का गतिर् इति । असौ लोक इति होवाच । अमुष्य लोकस्य का गतिर् इति । न स्वर्गं लोकम् अतिनयेद् इति होवाच । स्वर्गं वयं लोकं सामाभिसंस्थापयामः । स्वर्गसंस्तावं हि सामेति
6. 1.8.6तं ह शिलकः शालावत्यश् चैकितायनं दाल्भ्यम् उवाचाप्रतिष्ठितं वै किल ते दाल्भ्य साम । यस् त्व् एतर्हि ब्रूयान् मूर्धा ते विपतिष्यतीति मूर्धा ते विपतेद् इति
7. 1.8.7हन्ताहम् एतद् भगवत्तो वेदानीति । विद्धीति होवाच । अमुष्य लोकस्य का गतिर् इति । अयं लोक इति होवाच । अस्य लोकस्य का गतिर् इति । न प्रतिष्ठां लोकम् अतिनयेद् इति होवाच । प्रतिष्ठां वयं लोकं सामाभिसंस्थापयामः । प्रतिष्ठासंस्तावं हि सामेति
8. 1.8.8तं ह प्रवाहणो जैवलिर् उवाच । अन्तवद् वै किल ते शालावत्य साम । यस् त्व् एतर्हि ब्रूयान् मूर्धा ते विपतिष्यतीति मूर्धा ते विपतेद् इति । हन्ताहम् एतद् भगवत्तो वेदानीति । विद्धीति होवाच