Section 4.15

In this sitting

1. 4.15.1य एषो ऽक्षिणि पुरुषो दृश्यत एष आत्मेति होवाच । एतद् अमृतम् अभयम् एतद् ब्रह्मेति । तद् यद्य् अप्य् अस्मिन् सर्पिर् वोदकं वा सिञ्चति वर्त्मनी एव गच्छति
2. 4.15.2एतं संयद्वाम इत्य् आचक्षते । एतं हि सर्वाणि वामान्य् अभिसंयन्ति । सर्वाण्य् एनं वामान्य् अभिसंयन्ति य एवं वेद
3. 4.15.3एष उ एव वामनीः । एष हि सर्वाणि वामानि नयति । सर्वाणि वामानि नयति य एवं वेद
4. 4.15.4एष उ एव भामनीः । एष हि सर्वेषु लोकेषु भाति । सर्वेषु लोकेषु भाति य एवं वेद
5. 4.15.5अथ यद् उ चैवास्मिञ् छव्यं कुर्वन्ति यदि च नार्चिषम् एवाभिसंभवन्ति । अर्चिषो ऽहः । अह्न आपूर्यमाणपक्षम् । आपूर्यमाणपक्षाद् यान् षड् उदङ्ङ् एति मासांस् तान् । मासेभ्यः संवत्सरम् । संवत्सराद् आदित्यम् । आदित्याच् चन्द्रमसम् । चन्द्रमसो विद्युतम् । तत् पुरुषो ऽमानवः । स एनान् ब्रह्म गमयति । एष देवपथो ब्रह्मपथः । एतेन प्रतिपद्यमाना इमं मानवम् आवर्तं नावर्तन्ते नावर्तन्ते