Section 4.17

In this sitting

1. 4.17.1प्रजापतिर् लोकान् अभ्यतपत् । तेषां तप्यमानानां रसान् प्रावृहत् । अग्निं पृथिव्याः । वायुम् अन्तरिक्षात् । आदित्यं दिवः
2. 4.17.2स एतास् तिस्रो देवता अभ्यतपत् । तासां तप्यमानानां रसान् प्रावृहत् । अग्नेर् ऋचः । वायोर् यजूंषि । सामान्य् आदित्यात्
3. 4.17.3स एतां त्रयीं विद्याम् अभ्यतपत् । तस्यास् तप्यमानाया रसान् प्रावृहत् । भूर् इत्य् ऋग्भ्यः । भुवर् इति यजुर्भ्यः । स्वर् इति सामभ्यः
4. 4.17.4तद् यद्य् ऋक्तो रिष्येद् भूः स्वाहेति गार्हपत्ये जुहुयात् । ऋचाम् एव तद्रसेनर्चां वीर्येणर्चां यज्ञस्य विरिष्टं संदधाति
5. 4.17.5अथ यदि यजुष्टो रिष्येद् भुवः स्वाहेति दक्षिणाग्नौ जुहुयात् । यजुषाम् एव तद्रसेन यजुषां वीर्येण यजुषां यज्ञस्य विरिष्टं संदधाति
6. 4.17.6अथ यदि सामतो रिष्येत् स्वः स्वाहेत्य् आहवनीये जुहुयात् । साम्नाम् एव तद्रसेन साम्नां वीर्येण साम्नां यज्ञस्य विरिष्टं संदधाति
7. 4.17.7तद् यथा लवणेन सुवर्णं संदध्यात् । सुवर्णेन रजतं रजतेन त्रपु त्रपुणा सीसं सीसेन लोहं लोहेन दारु दारु चर्मणा
8. 4.17.8एवम् एषां लोकानाम् आसां देवतानाम् अस्यास् त्रय्या विद्याया वीर्येण यज्ञस्य विरिष्टं संदधाति । भेषजकृतो ह वा एष यज्ञो यत्रैवंविद् ब्रह्मा भवति
9. 4.17.9एष ह वा उदक्प्रवणो यज्ञो यत्रैवंविद् ब्रह्मा भवति । एवंविदं ह वा एषा ब्रह्माणम् अनु गाथा । यतो यत आवर्तते तत् तद् गच्छति
10. 4.17.10मानवः । ब्रह्मैवैक ऋत्विक् कुरून् अश्वाभिरक्षति । एवंविद् ध वै ब्रह्मा यज्ञं यजमानं सर्वांश् चर्त्विजो ऽभिरक्षति । तस्माद् एवंविदम् एव ब्रह्माणं कुर्वीत नानेवंविदं नानेवंविदम्