Section 5.1

In this sitting

1. 5.1.1यो ह वै ज्येष्ठं च श्रेष्ठं च वेद ज्येष्ठश् च ह वै श्रेष्ठश् च भवति । प्राणो वाव ज्येष्ठश् च श्रेष्ठश् च
2. 5.1.2यो ह वै वसिष्ठं वेद वसिष्ठो ह स्वानां भवति । वाग् वाव वसिष्ठः
3. 5.1.3यो ह वै प्रतिष्ठां वेद प्रति ह तिष्ठत्य् अस्मिंश् च लोके ऽमुष्मिंश् च । चक्षुर् वाव प्रतिष्ठा
4. 5.1.4यो ह वै संपदं वेद सं हास्मै कामाः पद्यन्ते दैवाश् च मानुषाश् च । श्रोत्रं वाव संपत्
5. 5.1.5यो ह वा आयतनं वेदायतनं ह स्वानां भवति । मनो ह वा आयतनम्
6. 5.1.6अथ ह प्राणा अहंश्रेयसि व्यूदिरे । अहं श्रेयान् अस्म्य् अहं श्रेयान् अस्मीति
7. 5.1.7ते ह प्राणाः प्रजापतिं पितरम् एत्योचुः भगवन् को नः श्रेष्ठ इति । तान् होवाच । यस्मिन् व उत्क्रान्ते शरीरं पापिष्ठतरम् इव दृश्येत स वः श्रेष्ठ इति
8. 5.1.8सा ह वाग् उच्चक्राम । सा संवत्सरं प्रोष्य पर्येत्योवाच । कथम् अशकतर्ते मज् जीवितुम् इति । यथा कला अवदन्तः प्राणन्तः प्राणेन पश्यन्तश् चक्षुषा शृण्वन्तः श्रोत्रेण ध्यायन्तो मनसैवम् इति । प्रविवेश ह वाक्
9. 5.1.9चक्षुर् होच्चक्राम । तत् संवत्सरं प्रोष्य पर्येत्योवाच । कथम् अशकतर्ते मज् जीवितुम् इति । यथान्धा अपश्यन्तः प्राणन्तः प्राणेन वदन्तो वाचा शृण्वन्तः श्रोत्रेण ध्यायन्तो मनसैवम् इति । प्रविवेश ह चक्षुः
10. 5.1.10श्रोत्रं होच्चक्राम । तत् संवत्सरं प्रोष्य पर्येत्योवाच कथम् अशकतर्ते मज् जीवितुम् इति । यथा बधिरा अशृण्वन्तः प्राणन्तः प्राणेन वदन्तो वाचा पश्यन्तश् चक्षुषा ध्यायन्तो मनसैवम् इति । प्रविवेश ह श्रोत्रम्
11. 5.1.11मनो होच्चक्राम । तत् संवत्सरं प्रोष्य पर्येत्योवाच । कथम् अशकतर्ते मज् जीवितुम् इति । यथा बाला अमनसः प्राणन्तः प्राणेन वदन्तो वाचा पश्यन्तश् चक्षुषा शृण्वन्तः श्रोत्रेणैवम् इति । प्रविवेश ह मनः
12. 5.1.12अथ ह प्राण उच्चिक्रमिषन् स यथा सुहयः पड्वीशशङ्कून् संखिदेद् एवम् इतरान् प्राणान् समखिदत् । तं हाभिसमेत्योचुः । भगवन्न् एधि । त्वं नः श्रेष्ठो ऽसि । मोत्क्रमीर् इति
13. 5.1.13अथ हैनं वाग् उवाच । यद् अहं वसिष्ठो ऽस्मि त्वं तद्वसिष्ठो ऽसीति । अथ हैनं चक्षुर् उवाच । यद् अहं प्रतिष्ठास्मि त्वं तत्प्रतिष्ठासीति
14. 5.1.14अथ हैनं श्रोत्रम् उवाच । यद् अहं संपद् अस्मि त्वं तत्संपद् असीति । अथ हैनं मन उवाच । यद् अहम् आयतनम् अस्मि त्वं तदायतनम् असीति
15. 5.1.15न वै वाचो न चक्षूंषि न श्रोत्राणि न मनांसीत्य् आचक्षते । प्राणा इत्य् एवाचक्षते । प्राणो ह्य् एवैतानि सर्वाणि भवति