Question 2

In this sitting

1. 2.1अत हैनं भार्गवो वैदर्भिः पप्रच्छ । भगवन् कत्येव देवाः प्रजां विधारयन्ते । कतर एतत् प्रकाशयन्ते । कः पुनर् एषां वरिष्ठ इति
2. 2.2तस्मै स होवाच । आकाशो ह वा एष देवो वायुर् अग्निर् आपः पृथिवी वाङ्मनश्चक्षु श्रोत्रं च । ते प्रकाश्याभिवदन्ति । वयम् एतद् बाणम् अवष्टभ्य विधारयामः
3. 2.3तान् वरिष्टः प्राण उवाच । मा मोहमापद्यथ, अहम् एवैतत् पञ्चधात्मानं प्रविभज्यैतद् बाणमवष्टभ्य विधारयामीति । ते ऽश्रद्दधाना बभूवुः
4. 2.4सो ऽभिमानादूर्ध्वमुत्क्रमत इव । तस्मिन्न् उत्क्रामत्य् अथेतरे सर्व एवोत्क्रामन्ते । तस्मिंश् च प्रतिष्ठमाने सर्व एव प्रातिष्ठन्ते । तद् यथा मक्षिका मधुकरराजानम् उत्क्रामन्तं सर्वा एवोत्क्रामन्ते । तस्मिंश् च प्रतिष्ठमाने सर्वा एव प्रातिष्ठन्ते । एवं वाङ्मनश्चक्षुःश्रोत्रं च । ते प्रीताः प्राणं स्तुन्वन्ति
5. 2.5एषो ऽग्निस् तपत्य् एष सूर्य एष पर्जन्यो मघवान् एष वायुः । एष पृथिवी रयिर् देवः सदसच् चामृतं च यत्
6. 2.6अरा इव रथनाभौ प्राणे सर्वं प्रतिष्ठितम् । ऋचो यजूंषि सामानि यज्ञः क्षत्रं ब्रह्म च
7. 2.7प्रजापतिश् चरसि गर्भे त्वम् एव प्रतिजायसे । तुभ्यं प्राण प्रजास् त्व् इमा बलिं हरन्ति यः प्राणैः प्रतिष्ठसि
8. 2.8देवानाम् असि वह्नितमः पितॄणां प्रथमा स्वधा । ऋषीणां चरितं सत्यम् अथर्वाङ्गिरसाम् असि
9. 2.9इन्द्रस् त्वं प्राण तेजसा रुद्रो ऽसि संहरञ् जगत् । स्थितौ च परि समन्ताद्रक्षिता पालयिता परिरक्षिता । त्वम् एव जगतः सौम्येन रूपेण । त्वम् अन्तरिक्षे ऽजस्रं चरसि उदयास्तमयाभ्यां सूर्यस् त्वम् एव च सर्वेषां ज्योतिषां पतिः
10. 2.10यदा त्वम् अभिवर्षस्य् अथेमाः प्राण ते प्रजाः । आनन्दरूपास् तिष्ठन्ति कामायान्नं भविष्यतीति
11. 2.11व्रात्यस् त्वं प्राणैकऋषिरत्ता विश्वस्य सत्पतिः । वयम् आद्यस्य दातारः पिता त्वं मातरिश्व नः
12. 2.12या ते तनूर्वाचि प्रतिष्ठिता या श्रोत्रं या च चक्षुषि । या च मनसि संतता शिवां तां कुरु मोत्क्रमीः
13. 2.13प्राणस्येदं वशे सर्वं त्रिदिवे यत् प्रतिष्ठितम् । मातेव पुत्रान् रक्षस्व श्रीश् च प्रज्ञां च विधेहि न इति