Question 5

In this sitting

1. 5.1अथ हैनं शैब्यः सत्यकामः पप्रच्छ । स यो ह वै तद् भगवन् मनुष्येषु प्रायणान्तम् ॐकारम् अभिध्यायीत । कतमं वाव स तेन लोकं जयतीति
2. 5.2तस्मै स होवाच । एतद् वै सत्यकाम परं चापरं च ब्रह्म यद् ॐकारः । तस्माद् विद्वान् एतेनैवायतनेनैकतरम् अन्वेति
3. 5.3स यद्य् एकमात्रम् अभिध्यायीत । स तेनैव संवेदितस् तूर्णम् एव जगत्याम् अभिसम्पद्यते । तम् ऋचो मनुष्यलोकम् उपनयन्ते । स तत्र तपसा ब्रह्मचर्येण श्रद्धया सम्पन्नो महिमानम् अनुभवति
4. 5.4अथ यदि द्विमात्रेण मनसि संपद्यते । सो ऽन्तरीक्षं यजुर्भिर् उन्नीयते सोमलोकम् । स सोमलोके विभूतिम् अनुभूय पुनर् आवर्तते
5. 5.5यः पुनर् एतं त्रिमात्रेणोमित्य् एतेनैवाक्षरेण परं पुरुषम् अभिध्यायीत । स तेजसि सूर्ये संपन्नः । यथा पादोदरस् त्वचा विनिर्मुच्यते । एवं ह वै स पाप्मना विनिर्मुक्तः स सामभिर् उन्नीयते ब्रह्मलोकम् । स एतस्माज् जीवधनात् परापरं पुरिशयं पुरुषम् ईक्षते तद् एतौ श्लोकौ भवतः
6. 5.6तिस्रो मात्रा मृत्युमत्यः प्रयुक्ता अन्योन्यसक्ता अनविप्रयुक्ताः । क्रियासु बाह्याभ्यन्तरमध्यमासु सम्यक्प्रयुक्तासु न कम्पते ज्ञः
7. 5.7ऋग्भिर् एतं यजुर्भिर् अन्तरिक्षं सामभिर् यत् तत् कवयो वेदयन्ते । तम् ॐकारेणैवायतनेनान्वेति विद्वान् यत् तच् छान्तम् अजरम् अमृतम् अभयं परं चेति