Aryasura: Jatakamala 1

नमो बुद्धाय ॥ श्रीमन्ति सद्गुणपरिग्रहमङ्गलानि कीर्त्यास्पदान्य् अनवगीतमनोहराणि । पूर्वेषु जन्मसु मुनेश् चरिताद्भुतानि भक्त्या स्वकाव्यकुसुमाञ्जलिनार्चयिष्ये

namo buddhāya // śrīmanti sadguṇaparigrahamaṅgalāni kīrtyāspadāny anavagītamanoharāṇi / pūrveṣu janmasu muneś caritādbhutāni bhaktyā svakāvyakusumāñjalinārcayiṣye

Sanskrit only: no published translation is held for this verse.

श्लाघ्यैर् अमीभिर् अभिलक्षितचिह्नभूतैर् आदेशितो भवति यत् सुगतत्वमार्गः । स्याद् एव रूक्षमनसाम् अपि च प्रसादो धर्म्याः कथाश् च रमणीयतरत्वम् ईयुः

ślāghyair amībhir abhilakṣitacihnabhūtair ādeśito bhavati yat sugatatvamārgaḥ / syād eva rūkṣamanasām api ca prasādo dharmyāḥ kathāś ca ramaṇīyataratvam īyuḥ

Sanskrit only: no published translation is held for this verse.

लोकार्थम् इत्य् अभिसमीक्ष्य करिष्यते ऽयं श्रुत्यार्षयुक्त्यविगुणेन पथा प्रयत्नः । लोकोत्तमस्य चरितातिशयप्रदेशैः स्वं प्रातिभं गमयितुं श्रुतिवल्लभत्वम्

lokārtham ity abhisamīkṣya kariṣyate 'yaṃ śrutyārṣayuktyaviguṇena pathā prayatnaḥ / lokottamasya caritātiśayapradeśaiḥ svaṃ prātibhaṃ gamayituṃ śrutivallabhatvam

Sanskrit only: no published translation is held for this verse.

स्वार्थोद्यतैर् अपि परार्थचरस्य यस्य नैवान्वगम्यत गुणप्रतिपत्तिशोभा । सर्वज्ञ इत्य् अवितथाक्षरदीप्तकीर्तिं मूर्ध्ना नमे तम् असमं सहधर्मसङ्घम्

svārthodyatair api parārthacarasya yasya naivānvagamyata guṇapratipattiśobhā / sarvajña ity avitathākṣaradīptakīrtiṃ mūrdhnā name tam asamaṃ sahadharmasaṅgham

Sanskrit only: no published translation is held for this verse.

सर्वसत्त्वेष्व् अकारणपरमवत्सलस्वभावः सर्वभूतात्मभूतः पूर्वजन्मस्व् अपि स भगवान् इति बुद्धे भगवति परः प्रसादः कार्यः ॥ तद्यथानुश्रूयते रत्नत्रयगुरुभिः प्रतिपत्तिगुणाभिराधितगुरुभिर् गुणप्रचयगुरुभिर् अस्मद्गुरुभिः परिकीर्त्यमानम् इदं भगवतः पूर्वजन्मावदानम् । बोधिसत्त्वः किल प्रतिज्ञातिशयसदृशैर् दानप्रियवचनार्थचर्याप्रभृतिभिः प्रज्ञापरिग्रहनिरवद्यैः कारुण्यनिस्यन्दैर् लोकम् अनुगृह्णन् स्वधर्माभिरत्युपनतशुचिवृत्तिन्य् उदितोदिते महति ब्राह्मणकुले जन्मपरिग्रहं चकार ॥ स कृतसंस्कारक्रमो जातकर्मादिभिर् अभिवर्धमानः प्रकृतिमेधावित्वात् सानाथ्यविशेषाज् ज्ञानकौतूहलाद् अकौसीद्याच् च नचिरेणैवाष्टादशसु विद्यास्थानेषु स्वकुलक्रमाविरुद्धासु च सकलासु कलास्व् आचार्यकं परम् अवाप । स ब्रह्मवद् ब्रह्मविदां बभूव राजेव राज्ञां बहुमानपात्रम् । साक्षात् सहस्राक्ष इव प्रजानां ज्ञानार्थिनाम् अर्थचरः पितेव

sarvasattveṣv akāraṇaparamavatsalasvabhāvaḥ sarvabhūtātmabhūtaḥ pūrvajanmasv api sa bhagavān iti buddhe bhagavati paraḥ prasādaḥ kāryaḥ // tadyathānuśrūyate ratnatrayagurubhiḥ pratipattiguṇābhirādhitagurubhir guṇapracayagurubhir asmadgurubhiḥ parikīrtyamānam idaṃ bhagavataḥ pūrvajanmāvadānam / bodhisattvaḥ kila pratijñātiśayasadṛśair dānapriyavacanārthacaryāprabhṛtibhiḥ prajñāparigrahaniravadyaiḥ kāruṇyanisyandair lokam anugṛhṇan svadharmābhiratyupanataśucivṛttiny uditodite mahati brāhmaṇakule janmaparigrahaṃ cakāra // sa kṛtasaṃskārakramo jātakarmādibhir abhivardhamānaḥ prakṛtimedhāvitvāt sānāthyaviśeṣāj jñānakautūhalād akausīdyāc ca nacireṇaivāṣṭādaśasu vidyāsthāneṣu svakulakramāviruddhāsu ca sakalāsu kalāsv ācāryakaṃ param avāpa / sa brahmavad brahmavidāṃ babhūva rājeva rājñāṃ bahumānapātram / sākṣāt sahasrākṣa iva prajānāṃ jñānārthinām arthacaraḥ piteva

Sanskrit only: no published translation is held for this verse.

तस्य भाग्यगुणातिशयसमावर्जितो महालाभसत्कारयशोविशेषः प्रादुरभूत्। धर्माभ्यासभावितमतिः कृतप्रव्रज्यापरिचयस् तु बोधिसत्त्वो न तेनाभिरेमे । स पूर्वचर्यापरिशुद्धबुद्धिः कामेषु दृष्ट्वा बहुदोषजातम् । गार्हस्थ्यम् अस्वास्थ्यम् इवावधूय कं चिद् वनप्रस्थम् अलंचकार

tasya bhāgyaguṇātiśayasamāvarjito mahālābhasatkārayaśoviśeṣaḥ prādurabhūt/ dharmābhyāsabhāvitamatiḥ kṛtapravrajyāparicayas tu bodhisattvo na tenābhireme / sa pūrvacaryāpariśuddhabuddhiḥ kāmeṣu dṛṣṭvā bahudoṣajātam / gārhasthyam asvāsthyam ivāvadhūya kaṃ cid vanaprastham alaṃcakāra

Sanskrit only: no published translation is held for this verse.

स तत्र निःसङ्गतया तया च प्रज्ञावदातेन शमेन चैव । प्रत्यादिदेशेव कुकार्यसङ्गाद् विश्लिष्टशिष्टोपशमं नृलोकम्

sa tatra niḥsaṅgatayā tayā ca prajñāvadātena śamena caiva / pratyādideśeva kukāryasaṅgād viśliṣṭaśiṣṭopaśamaṃ nṛlokam

Sanskrit only: no published translation is held for this verse.

मैत्रीमयेन प्रशमेन तस्य विस्यन्दिनेवानुपरीतचित्ताः । परस्परद्रोहनिवृत्तभावास् तपस्विवद् व्याडमृगा विचेरुः

maitrīmayena praśamena tasya visyandinevānuparītacittāḥ / parasparadrohanivṛttabhāvās tapasvivad vyāḍamṛgā viceruḥ

Sanskrit only: no published translation is held for this verse.

आचारशुद्ध्या निभृतेन्द्रियत्वात् संतोषयोगात् करुणागुणाच् च । असंस्तुतस्यापि जनस्य लोके सो ऽभूत् प्रियस् तस्य यथैव लोकः

ācāraśuddhyā nibhṛtendriyatvāt saṃtoṣayogāt karuṇāguṇāc ca / asaṃstutasyāpi janasya loke so 'bhūt priyas tasya yathaiva lokaḥ

Sanskrit only: no published translation is held for this verse.

अल्पेच्छभावात् कुहनानभिज्ञस् त्यक्तस्पृहो लाभयशःसुखेभ्यः । स देवतानाम् अपि मानसानि प्रसादभक्तिप्रवणानि चक्रे

alpecchabhāvāt kuhanānabhijñas tyaktaspṛho lābhayaśaḥsukhebhyaḥ / sa devatānām api mānasāni prasādabhaktipravaṇāni cakre

Sanskrit only: no published translation is held for this verse.

श्रुत्वाथ तं प्रव्रजितं मनुष्या गुणैस् तदीयैर् अवबद्धचित्ताः । विहाय बन्धूंश् च परिग्रहांश् च तच्छिष्यतां सिद्धिम् इवोपजग्मुः

śrutvātha taṃ pravrajitaṃ manuṣyā guṇais tadīyair avabaddhacittāḥ / vihāya bandhūṃś ca parigrahāṃś ca tacchiṣyatāṃ siddhim ivopajagmuḥ

Sanskrit only: no published translation is held for this verse.

शीले शुचाव् इन्द्रियभावनायां स्मृत्यप्रमोषे प्रविविक्ततायाम् । मैत्र्यादिके चैव मनःसमाधौ यथाबलं सो ऽनुशशास शिष्यान्

śīle śucāv indriyabhāvanāyāṃ smṛtyapramoṣe praviviktatāyām / maitryādike caiva manaḥsamādhau yathābalaṃ so 'nuśaśāsa śiṣyān

Sanskrit only: no published translation is held for this verse.

अथ कदा चित् स महात्मा परिनिष्पन्नभूयिष्ठे पृथूभूते शिष्यगणे प्रतिष्ठापिते ऽस्मिन् कल्याणे वर्त्मन्य् अवतारिते नैष्क्रम्यसत्पथं लोके संवृतेष्व् इवापायद्वारेषु राजमार्गीकृतेष्व् इव सुगतिमार्गेषु दृष्टधर्मसुखविहारार्थं तत्कालशिष्येणाजितेनानुगम्यमानो योगानुकूलान् पर्वतदरीनिकुञ्जान् अनुविचचार ॥ अथात्र व्याघ्रवनितां ददर्श गिरिगह्वरे । प्रसूतिक्लेशदोषेण गतां विस्पन्दमन्दताम्

atha kadā cit sa mahātmā pariniṣpannabhūyiṣṭhe pṛthūbhūte śiṣyagaṇe pratiṣṭhāpite 'smin kalyāṇe vartmany avatārite naiṣkramyasatpathaṃ loke saṃvṛteṣv ivāpāyadvāreṣu rājamārgīkṛteṣv iva sugatimārgeṣu dṛṣṭadharmasukhavihārārthaṃ tatkālaśiṣyeṇājitenānugamyamāno yogānukūlān parvatadarīnikuñjān anuvicacāra // athātra vyāghravanitāṃ dadarśa girigahvare / prasūtikleśadoṣeṇa gatāṃ vispandamandatām

Sanskrit only: no published translation is held for this verse.

परिक्षामेक्षणयुगां क्षुधा च्छाततरोदरीम् । आहारम् इव पश्यन्तीं बालान् स्वतनयान् अपि

parikṣāmekṣaṇayugāṃ kṣudhā cchātatarodarīm / āhāram iva paśyantīṃ bālān svatanayān api

Sanskrit only: no published translation is held for this verse.

स्तन्यतर्षाद् उपसृतान् मातृविश्रम्भनिर्व्यथान् । रोरूयितरवैः क्रूरैर् भर्त्सयन्तीं परान् इव

stanyatarṣād upasṛtān mātṛviśrambhanirvyathān / rorūyitaravaiḥ krūrair bhartsayantīṃ parān iva

Sanskrit only: no published translation is held for this verse.

बोधिसत्त्वस् तु तां दृष्ट्वा धीरो ऽपि करुणावशात् । चकम्पे परदुःखेन महीकम्पाद् इवाद्रिराट्

bodhisattvas tu tāṃ dṛṣṭvā dhīro 'pi karuṇāvaśāt / cakampe paraduḥkhena mahīkampād ivādrirāṭ

Sanskrit only: no published translation is held for this verse.

महत्स्व् अपि स्वदुःखेषु व्यक्तधैर्याः कृपात्मकाः । मृदुनाप्य् अन्यदुःखेन कम्पन्ते यत् तद् अद्भुतम्

mahatsv api svaduḥkheṣu vyaktadhairyāḥ kṛpātmakāḥ / mṛdunāpy anyaduḥkhena kampante yat tad adbhutam

Sanskrit only: no published translation is held for this verse.

अथ बोधिसत्त्वः ससंभ्रमाम्रेडितपदं स्वभावातिशयव्यञ्जकं करुणाबलसमाहिताक्षरं शिष्यम् उवाच । वत्स वत्स । पश्य संसारनैर्गुण्यं मृग्य् एषा स्वसुतान् अपि । लङ्घितस्नेहमर्यादा भोक्तुम् अन्विच्छति क्षुधा

atha bodhisattvaḥ sasaṃbhramāmreḍitapadaṃ svabhāvātiśayavyañjakaṃ karuṇābalasamāhitākṣaraṃ śiṣyam uvāca / vatsa vatsa / paśya saṃsāranairguṇyaṃ mṛgy eṣā svasutān api / laṅghitasnehamaryādā bhoktum anvicchati kṣudhā

Sanskrit only: no published translation is held for this verse.

अहो बतातिकष्टेयम् आत्मस्नेहस्य रौद्रता । येन मातापि तनयान् आहारयितुम् इच्छति

aho batātikaṣṭeyam ātmasnehasya raudratā / yena mātāpi tanayān āhārayitum icchati

Sanskrit only: no published translation is held for this verse.

आत्मस्नेहमयं शत्रुं को वर्धयितुम् अर्हति । येन कुर्यात् पदन्यासम् ईदृशेष्व् अपि कर्मसु

ātmasnehamayaṃ śatruṃ ko vardhayitum arhati / yena kuryāt padanyāsam īdṛśeṣv api karmasu

Sanskrit only: no published translation is held for this verse.

तच् छीघ्रम् अन्विष्यतां तावत् कुतश् चिद् अस्याः क्षुद्दुःखप्रतीकारहेतुर् यावन् न तनयान् आत्मानं चोपहन्ति । अहम् अपि चैनां प्रयतिष्ये साहसाद् अस्माद् वारयितुम् । स तथेत्य् अस्मै प्रतिश्रुत्य तदाहारान्वेषणपरो बभूव ॥ अथ बोधिसत्त्वस् तं शिष्यं सव्यपदेशम् अतिवाह्य चिन्ताम् आपेदे । संविद्यमाने सकले शरीरे कस्मात् परस्मान् मृगयामि मांसम् । यादृच्छिकी तस्य हि लाभसंपत् कार्यात्ययः स्याच् च तथा ममायम्

tac chīghram anviṣyatāṃ tāvat kutaś cid asyāḥ kṣudduḥkhapratīkārahetur yāvan na tanayān ātmānaṃ copahanti / aham api caināṃ prayatiṣye sāhasād asmād vārayitum / sa tathety asmai pratiśrutya tadāhārānveṣaṇaparo babhūva // atha bodhisattvas taṃ śiṣyaṃ savyapadeśam ativāhya cintām āpede / saṃvidyamāne sakale śarīre kasmāt parasmān mṛgayāmi māṃsam / yādṛcchikī tasya hi lābhasaṃpat kāryātyayaḥ syāc ca tathā mamāyam

Sanskrit only: no published translation is held for this verse.

अपि च । निरात्मके भेदिनि सारहीने दुःखे कृतघ्ने सतताशुचौ च । देहे परस्माय् उपयुज्यमाने न प्रीतिमान् यो न विचक्षणः सः

api ca / nirātmake bhedini sārahīne duḥkhe kṛtaghne satatāśucau ca / dehe parasmāy upayujyamāne na prītimān yo na vicakṣaṇaḥ saḥ

Sanskrit only: no published translation is held for this verse.

स्वसौख्यसङ्गेन परस्य दुःखम् उपेक्ष्यते शक्तिपरिक्षयाद् वा । न चान्यदुःखे सति मे ऽस्ति सौख्यं सत्यां च शक्तौ किम् उपेक्षकः स्याम्

svasaukhyasaṅgena parasya duḥkham upekṣyate śaktiparikṣayād vā / na cānyaduḥkhe sati me 'sti saukhyaṃ satyāṃ ca śaktau kim upekṣakaḥ syām

Sanskrit only: no published translation is held for this verse.

सत्यां च शक्तौ मम यद्य् उपेक्षा स्याद् आततायिन्य् अपि दुःखमग्ने । कृत्वेव पापं मम तेन चित्तं दह्येत कक्षं महताग्निनेव

satyāṃ ca śaktau mama yady upekṣā syād ātatāyiny api duḥkhamagne / kṛtveva pāpaṃ mama tena cittaṃ dahyeta kakṣaṃ mahatāgnineva

Sanskrit only: no published translation is held for this verse.

तस्मात् करिष्यामि शरीरकेण तटप्रपातोद्गतजीवितेन । संरक्षणं पुत्रवधाच् च मृग्या मृग्याः सकाशाच् च तदात्मजानाम्

tasmāt kariṣyāmi śarīrakeṇa taṭaprapātodgatajīvitena / saṃrakṣaṇaṃ putravadhāc ca mṛgyā mṛgyāḥ sakāśāc ca tadātmajānām

Sanskrit only: no published translation is held for this verse.

किं च भूयः । संदर्शनं लोकहितोत्सुकानाम् उत्तेजनं मन्दपराक्रमाणाम् । संहर्षणं त्यागविशारदानाम् आकर्षणं सज्जनमानसानाम्

kiṃ ca bhūyaḥ / saṃdarśanaṃ lokahitotsukānām uttejanaṃ mandaparākramāṇām / saṃharṣaṇaṃ tyāgaviśāradānām ākarṣaṇaṃ sajjanamānasānām

Sanskrit only: no published translation is held for this verse.

विषादनं मारमहाचमूनां प्रसादनं बुद्धगुणप्रियाणाम् । व्रीडोदयं स्वार्थपरायणानां मात्सर्यलोभोपहतात्मनां च

viṣādanaṃ māramahācamūnāṃ prasādanaṃ buddhaguṇapriyāṇām / vrīḍodayaṃ svārthaparāyaṇānāṃ mātsaryalobhopahatātmanāṃ ca

Sanskrit only: no published translation is held for this verse.

श्रद्धापनं यानवराश्रितानां विस्मापनं त्यागकृतस्मयानाम् । विशोधनं स्वर्गमहापथस्य त्यागप्रियाणाम् अनुमोदिनॄणाम्

śraddhāpanaṃ yānavarāśritānāṃ vismāpanaṃ tyāgakṛtasmayānām / viśodhanaṃ svargamahāpathasya tyāgapriyāṇām anumodinṝṇām

Sanskrit only: no published translation is held for this verse.

कदा नु गात्रैर् अपि नाम कुर्यां हितं परेषाम् इति यश् च मे ऽभूत् । मनोरथस् तं सफलीक्रियासं संबोधिम् अग्र्याम् अपि चाविदूरे

kadā nu gātrair api nāma kuryāṃ hitaṃ pareṣām iti yaś ca me 'bhūt / manorathas taṃ saphalīkriyāsaṃ saṃbodhim agryām api cāvidūre

Sanskrit only: no published translation is held for this verse.

न स्पर्धया नैव यशोऽभिलाषान् न स्वर्गलोभान् न च राज्यहेतोः । नात्यन्तिके ऽप्य् आत्मसुखे यथायं ममादरो ऽन्यत्र परार्थसिद्धेः

na spardhayā naiva yaśo'bhilāṣān na svargalobhān na ca rājyahetoḥ / nātyantike 'py ātmasukhe yathāyaṃ mamādaro 'nyatra parārthasiddheḥ

Sanskrit only: no published translation is held for this verse.

तथा ममानेन समानकालं लोकस्य दुःखं च सुखोदयं च । हर्तुं च कर्तुं च सदास्तु शक्तिस् तमः प्रकाशं च यथैव भानोः

tathā mamānena samānakālaṃ lokasya duḥkhaṃ ca sukhodayaṃ ca / hartuṃ ca kartuṃ ca sadāstu śaktis tamaḥ prakāśaṃ ca yathaiva bhānoḥ

Sanskrit only: no published translation is held for this verse.

दृष्टः श्रुतो ऽनुस्मृतिम् आगतो वा स्पृष्टः कथायोगम् उपागतो वा । सर्वप्रकारं जगतो हितानि कुर्याम् अजस्रं सुखसंहितानि

dṛṣṭaḥ śruto 'nusmṛtim āgato vā spṛṣṭaḥ kathāyogam upāgato vā / sarvaprakāraṃ jagato hitāni kuryām ajasraṃ sukhasaṃhitāni

Sanskrit only: no published translation is held for this verse.

एवं स निश्चित्य परार्थसिद्ध्यै प्राणात्यये ऽप्य् आपतितप्रमोदः । मनांसि धीराण्य् अपि देवतानां विस्मापयन् स्वां तनुम् उत्ससर्ज

evaṃ sa niścitya parārthasiddhyai prāṇātyaye 'py āpatitapramodaḥ / manāṃsi dhīrāṇy api devatānāṃ vismāpayan svāṃ tanum utsasarja

Sanskrit only: no published translation is held for this verse.

अथ सा व्याघ्री तेन बोधिसत्त्वस्य शरीरनिपातशब्देन समुत्थापितकौतूहलामर्षा विरम्य स्वतनयवैशसोद्यमात् ततो नयने विचिक्षेप । दृष्ट्वैव च तद् बोधिसत्त्वशरीरम् उद्गतप्राणं सहसाभिसृत्य भक्षयितुम् उपचक्रमे । अथ स तस्य शिष्यो मांसम् अनासाद्यैव प्रतिनिवृत्तः कुत्रोपाध्याय इति विलोकयंस् तद् बोधिसत्त्वशरीरम् उद्गतप्राणं तया व्याघ्रयुवत्या भक्ष्यमाणं ददर्श । स तत्कर्मातिशयविस्मयात् प्रतिव्यूढशोकदुःखावेगस् तद्गुणाश्रयबहुमानम् इवोद्गिरन्न् इदम् आत्मगतं ब्रुवाणः शोभेत । अहो दयास्य व्यसनातुरे जने स्वसौख्यनैःसङ्ग्यम् अहो महात्मनः । अहो प्रकर्षं गमिता स्थितिः सताम् अहो परेषां मृदिता यशःश्रियः

atha sā vyāghrī tena bodhisattvasya śarīranipātaśabdena samutthāpitakautūhalāmarṣā viramya svatanayavaiśasodyamāt tato nayane vicikṣepa / dṛṣṭvaiva ca tad bodhisattvaśarīram udgataprāṇaṃ sahasābhisṛtya bhakṣayitum upacakrame / atha sa tasya śiṣyo māṃsam anāsādyaiva pratinivṛttaḥ kutropādhyāya iti vilokayaṃs tad bodhisattvaśarīram udgataprāṇaṃ tayā vyāghrayuvatyā bhakṣyamāṇaṃ dadarśa / sa tatkarmātiśayavismayāt prativyūḍhaśokaduḥkhāvegas tadguṇāśrayabahumānam ivodgirann idam ātmagataṃ bruvāṇaḥ śobheta / aho dayāsya vyasanāture jane svasaukhyanaiḥsaṅgyam aho mahātmanaḥ / aho prakarṣaṃ gamitā sthitiḥ satām aho pareṣāṃ mṛditā yaśaḥśriyaḥ

Sanskrit only: no published translation is held for this verse.

अहो पराक्रान्तम् अपेतसाध्वसं गुणाश्रयं प्रेम परं विदर्शितम् । अहो नमस्कारविशेषपात्रतां प्रसह्य नीता स्वगुणातनुस् तनुः

aho parākrāntam apetasādhvasaṃ guṇāśrayaṃ prema paraṃ vidarśitam / aho namaskāraviśeṣapātratāṃ prasahya nītā svaguṇātanus tanuḥ

Sanskrit only: no published translation is held for this verse.

निसर्गसौम्यस्य वसुंधराधृतेर् अहो परेषां व्यसनेष्व् अमर्षिता । अहो मदीया गमिता प्रकाशतां खटुङ्कता विक्रमसंपदानया

nisargasaumyasya vasuṃdharādhṛter aho pareṣāṃ vyasaneṣv amarṣitā / aho madīyā gamitā prakāśatāṃ khaṭuṅkatā vikramasaṃpadānayā

Sanskrit only: no published translation is held for this verse.

अनेन नाथेन सनाथतां गतं न शोचितव्यं खलु सांप्रतं जगत् । पराजयाशङ्कितजातसंभ्रमो ध्रुवं विनिश्वासपरो ऽद्य मन्मथः

anena nāthena sanāthatāṃ gataṃ na śocitavyaṃ khalu sāṃprataṃ jagat / parājayāśaṅkitajātasaṃbhramo dhruvaṃ viniśvāsaparo 'dya manmathaḥ

Sanskrit only: no published translation is held for this verse.

सर्वथा नमो ऽस्त्व् अस्मै महाभागाय सर्वभूतशरण्यायातिविपुलकारुण्यायाप्रमेयसत्त्वाय भूतार्थबोधिसत्त्वायेति ॥ अथ स तम् अर्थं सब्रह्मचारिभ्यो निवेदयाम् आस । तत्कर्मविस्मितमुखैर् अथ तस्य शिष्यैर् गन्धर्वयक्षभुजगैस् त्रिदशाधिपैश् च । माल्याम्बराभरणचन्दनचूर्णवर्षैश् छन्ना तदस्थिवसुधा वसुधा बभूव

sarvathā namo 'stv asmai mahābhāgāya sarvabhūtaśaraṇyāyātivipulakāruṇyāyāprameyasattvāya bhūtārthabodhisattvāyeti // atha sa tam arthaṃ sabrahmacāribhyo nivedayām āsa / tatkarmavismitamukhair atha tasya śiṣyair gandharvayakṣabhujagais tridaśādhipaiś ca / mālyāmbarābharaṇacandanacūrṇavarṣaiś channā tadasthivasudhā vasudhā babhūva

Sanskrit only: no published translation is held for this verse.