Library·Atharvaveda Saṃhitā (Śaunaka)·5·5.21
विहृदयं वैमनस्यं वदामित्रेषु दुन्दुभे । विद्वेषं कश्मशं भयम् अमित्रेषु नि दध्मस्य् अव एनान् दुन्दुभे जहि ॥१॥
vihṛdayaṃ vaimanasyaṃ vadāmitreṣu dundubhe | vidveṣaṃ kaśmaśaṃ bhayam amitreṣu ni dadhmasy ava enān dundubhe jahi ||1||
Division of hearts, division of minds speak thou among our enemies, O drum; mutual hate, confusion, fear, we put into our enemies: smite them down, O drum.
Translated by William Dwight Whitney (1905)
उद्वेपमाना मनसा चक्षुषा हृदयेन च । धावन्तु बिभ्यतो ऽमित्राः प्रत्रासेनाज्ये हुते ॥२॥
udvepamānā manasā cakṣuṣā hṛdayena ca | dhāvantu bibhyato 'mitrāḥ pratrāsenājye hute ||2||
Quaking with mind, with sight, and with heart, let our enemies run fearing with alarm (pratrāsá) when the sacrificial butter is offered.
Translated by William Dwight Whitney (1905)
वानस्पत्यः संभृत उस्रियाभिर् विश्वगोत्र्यः । प्रत्रासम् अमित्रेभ्यो वदाज्येनाभिघारितः ॥३॥
vānaspatyaḥ saṃbhṛta usriyābhir viśvagotryaḥ | pratrāsam amitrebhyo vadājyenābhighāritaḥ ||3||
Made of forest-tree, brought together with the ruddy [kine], belonging to all the families (-gotrá-), speak thou alarm for our enemies, being smeared with sacrificial butter.
Translated by William Dwight Whitney (1905)
यथा मृगाः संविजन्त आरण्याः पुरुषाद् अधि । एव त्वं दुन्दुभे ऽमित्रान् अभि क्रन्द प्र त्रासयाथो चित्तानि मोहय ॥४॥
yathā mṛgāḥ saṃvijanta āraṇyāḥ puruṣād adhi | eva tvaṃ dundubhe 'mitrān abhi kranda pra trāsayātho cittāni mohaya ||4||
As the wild beasts of the forest are all in a tremble at man, so do thou, O drum, roar at [and] alarm our enemies, then confound their intents.
Translated by William Dwight Whitney (1905)
यथा वृकाद् अजावयो धावन्ति बहु बिभ्यतीः । एव त्वं दुन्दुभे ऽमित्रान् अभि क्रन्द प्र त्रासयाथो चित्तानि मोहय ॥५॥
yathā vṛkād ajāvayo dhāvanti bahu bibhyatīḥ | eva tvaṃ dundubhe 'mitrān abhi kranda pra trāsayātho cittāni mohaya ||5||
As the goats-and-sheep run greatly fearing the wolf, so do thou, O drum etc. etc.
Translated by William Dwight Whitney (1905)
यथा श्येनात् पतत्रिणः संविजन्ते अहर्दिवि सिंहस्य स्तनथोर् यथा । एव त्वं दुन्दुभे ऽमित्रान् अभि क्रन्द प्र त्रासयाथो चित्तानि मोहय ॥६॥
yathā śyenāt patatriṇaḥ saṃvijante ahardivi siṃhasya stanathor yathā | eva tvaṃ dundubhe 'mitrān abhi kranda pra trāsayātho cittāni mohaya ||6||
As the birds (patatrín) are all in a tremble at the falcon, day by day; as at the thundering of the lion, so do thou, O drum etc. etc.
Translated by William Dwight Whitney (1905)
परामित्रान् दुन्दुभिना हरिणस्याजिनेन च । सर्वे देवा अतित्रसन् ये संग्रामस्येषते ॥७॥
parāmitrān dundubhinā hariṇasyājinena ca | sarve devā atitrasan ye saṃgrāmasyeṣate ||7||
Away have all the gods alarmed our enemies by the drum and the skin of the gazelle—[the gods] who are masters of the host.
Translated by William Dwight Whitney (1905)
यैर् इन्द्रः प्रक्रीडते पद्घोषैश् छायया सह । तैर् अमित्रास् त्रसन्तु नो ऽमी ये यन्त्य् अनीकशः ॥८॥
yair indraḥ prakrīḍate padghoṣaiś chāyayā saha | tair amitrās trasantu no 'mī ye yanty anīkaśaḥ ||8||
With what foot-noises Indra plays together with shadow, by those let our enemies be alarmed who go yonder in troops (anīkaçás).
Translated by William Dwight Whitney (1905)
ज्याघोषा दुन्दुभयो ऽभि क्रोशन्तु या दिशः । सेनाः पराजिता यतीर् अमित्राणाम् अनीकशः ॥९॥
jyāghoṣā dundubhayo 'bhi krośantu yā diśaḥ | senāḥ parājitā yatīr amitrāṇām anīkaśaḥ ||9||
Let the drums, with bow-string noises, yell toward all (yā́s) the quarters—the armies of our enemies going conquered in troops.
Translated by William Dwight Whitney (1905)
आदित्य चक्षुर् आ दत्स्व मरीचयो ऽनु धावत । पत्सङ्गिनीर् आ सजन्तु विगते बाहुवीर्ये ॥१०॥
āditya cakṣur ā datsva marīcayo 'nu dhāvata | patsaṅginīr ā sajantu vigate bāhuvīrye ||10||
O Āditya, take [away their] sight; ye beams, run after; let them that have foot-fastenings fasten on, the arm-power (-vīryà) being gone away.
Translated by William Dwight Whitney (1905)
यूयम् उग्रा मरुतः पृश्निमातर इन्द्रेण युजा प्र मृनीत शत्रून् । सोमो राजा वरुणो राजा महादेव उत मृत्युर् इन्द्रः ॥११॥
yūyam ugrā marutaḥ pṛśnimātara indreṇa yujā pra mṛnīta śatrūn | somo rājā varuṇo rājā mahādeva uta mṛtyur indraḥ ||11||
Do ye [who are] formidable, O Maruts, sons of the spotted mother, with Indra as ally, slaughter our foes.
Translated by William Dwight Whitney (1905)
एता देवसेनाः सूर्यकेतवः सचेतसः । अमित्रान् नो जयन्तु स्वाहा ॥१२॥
etā devasenāḥ sūryaketavaḥ sacetasaḥ | amitrān no jayantu svāhā ||12||
Let these armies of the gods, sun-bannered, accordant, conquer our enemies: hail!
Translated by William Dwight Whitney (1905)