हरिः सूत्रकारः अत्र पादे लिङ्गानां नाम्नां च स्वस्मिन्वृत्तिं वक्ति । ननु पूर्वेण पादद्वयेनोक्ता सेत्यत उक्तम् पुनरिति ॥ ननु तर्हि वैयर्थ्यमित्यत उक्तं तत्र हरौ, अन्यत्र च तस्मात्, प्रसिद्धानामिति । पूर्वत्र त्वन्यत्र प्रसिद्धानामित्युक्तमेव । परमेश्वरे प्रसिद्धानि चेल्लिङ्गनामानि किं समन्वयप्रतिपादनेन । सिद्धत्वादित्यत उक्तम् स्वस्मिन्नेवेति ॥ अन्ययोगव्यवच्छेदः, प्रयोजनमिति भावः । तत्किमन्यत्र शब्दवृत्तिरेव नास्ति । न नास्ति । किन्तु मुख्यतः परमेश्वरे अन्यत्र त्वमुख्येत्युक्तम् मुख्यत इति ॥ एवं सत्यन्यत्र लक्षणादिकमेव प्राप्तमित्यत उक्तम् विशेषादिति ॥ परममुख्या वृत्तिरीश्वरे अन्यत्र मुख्यादीति । एतदुक्तं भवति । ये शब्दाः लोकदृष्टया अन्यत्र शक्तिमन्तः तेषां वेदवाक्येष्वन्यपरत्वे प्राप्ते शक्तितात्पर्याभ्यां भगवदेकनिष्ठत्वं पादद्वयेन प्रतिपादितम् । अत्र तूभयत्र शक्तिमत्तया लोकप्रसिद्धानामन्यत्र तात्पर्ये प्राप्ते, भगवत्येव शक्तितात्पर्ये प्रतिपाद्येते इति । यद्यपि प्राधान्यक्रमानुरोधेन नामलिङ्गानामिति वक्तव्यम् । तथाप्युत्तरप्रतिपादनानुसारेण लिङ्गनाम्नामित्यभिहितम् । *४,५* ॥ ॐ द्युभ्वाद्यायतनं स्वशब्दात् ॐ ॥ द्युभ्वाद्यायतनं स्वशब्दात्
hariḥ sūtrakāraḥ atra pāde liṅgānāṃ nāmnāṃ ca svasminvṛttiṃ vakti / nanu pūrveṇa pādadvayenoktā setyata uktam punariti // nanu tarhi vaiyarthyamityata uktaṃ tatra harau, anyatra ca tasmāt, prasiddhānāmiti / pūrvatra tvanyatra prasiddhānāmityuktameva / parameśvare prasiddhāni celliṅganāmāni kiṃ samanvayapratipādanena / siddhatvādityata uktam svasminneveti // anyayogavyavacchedaḥ, prayojanamiti bhāvaḥ / tatkimanyatra śabdavṛttireva nāsti / na nāsti / kintu mukhyataḥ parameśvare anyatra tvamukhyetyuktam mukhyata iti // evaṃ satyanyatra lakṣaṇādikameva prāptamityata uktam viśeṣāditi // paramamukhyā vṛttirīśvare anyatra mukhyādīti / etaduktaṃ bhavati / ye śabdāḥ lokadṛṣṭayā anyatra śaktimantaḥ teṣāṃ vedavākyeṣvanyaparatve prāpte śaktitātparyābhyāṃ bhagavadekaniṣṭhatvaṃ pādadvayena pratipāditam / atra tūbhayatra śaktimattayā lokaprasiddhānāmanyatra tātparye prāpte, bhagavatyeva śaktitātparye pratipādyete iti / yadyapi prādhānyakramānurodhena nāmaliṅgānāmiti vaktavyam / tathāpyuttarapratipādanānusāreṇa liṅganāmnāmityabhihitam / *4,5* // oṃ dyubhvādyāyatanaṃ svaśabdāt oṃ // dyubhvādyāyatanaṃ svaśabdāt
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.