Dvavimsatyavadanakatha 18

अथ खलु मैत्रेयो बोधिसत्त्वो महासत्त्वो भगवन्तम् एतद् अवोचत् ॥ भगवञ् छ्रोतुम् इच्छामि, दीपदानस्य यत् फलम् । स्तूपे वा बुद्धबिम्बे वा वद लोकार्थहेतवे

atha khalu maitreyo bodhisattvo mahāsattvo bhagavantam etad avocat // bhagavañ chrotum icchāmi, dīpadānasya yat phalam / stūpe vā buddhabimbe vā vada lokārthahetave

Sanskrit only: no published translation is held for this verse.

भगवान् क्षणं तूष्णीम् आस्थाय पर्षदं समालोक्य च मैत्रेयम् आमन्त्र्यैवम् आह ॥ शृणु मैत्रेय वक्ष्यामि लोकानां हितहेतवे । यच् छ्रुतं तत्कथां भव्यां श्रुत्वा प्रामोद्य जायते

bhagavān kṣaṇaṃ tūṣṇīm āsthāya parṣadaṃ samālokya ca maitreyam āmantryaivam āha // śṛṇu maitreya vakṣyāmi lokānāṃ hitahetave / yac chrutaṃ tatkathāṃ bhavyāṃ śrutvā prāmodya jāyate

Sanskrit only: no published translation is held for this verse.

अथ स पुरुषः प्रसादजातः पुनर् अपि स्तूपे ऽष्टाङ्गप्रणामं कृत्वाथ प्रभाते मनोह्लादितः प्रहसितवदनः स्वगृहं प्रत्यागतः ॥ अथ स्वगृहे पत्न्यादिपरिजनस् तम् आगतं दृष्ट्वावर्जितमना ऊचुः ॥ अहो क्व गतो ऽसि । कथं ते शरीरो दुष्कृतैः परिमुक्तः स्वस्थदेहो ऽहो भाग्यातिशयस्य कर्म यथैव पुनर्जन्म तथैव प्राप्तः । वैद्योषधैर् असंस्पृष्टः केन कुष्ठः प्रमुच्यते ॥ स आह ॥ वैद्योषधैः किं क्रियते महारोगप्रशान्तये । बुद्धेषु कृतपुण्येन तस्मात् पापं प्रमुञ्चति

atha sa puruṣaḥ prasādajātaḥ punar api stūpe 'ṣṭāṅgapraṇāmaṃ kṛtvātha prabhāte manohlāditaḥ prahasitavadanaḥ svagṛhaṃ pratyāgataḥ // atha svagṛhe patnyādiparijanas tam āgataṃ dṛṣṭvāvarjitamanā ūcuḥ // aho kva gato 'si / kathaṃ te śarīro duṣkṛtaiḥ parimuktaḥ svasthadeho 'ho bhāgyātiśayasya karma yathaiva punarjanma tathaiva prāptaḥ / vaidyoṣadhair asaṃspṛṣṭaḥ kena kuṣṭhaḥ pramucyate // sa āha // vaidyoṣadhaiḥ kiṃ kriyate mahārogapraśāntaye / buddheṣu kṛtapuṇyena tasmāt pāpaṃ pramuñcati

Sanskrit only: no published translation is held for this verse.

अहो गुणमयं क्षेत्रं सर्वदोषविवर्जितम् । अद्यैवारोपितं बीजम् अद्यैव प्राप्त संपदम्

aho guṇamayaṃ kṣetraṃ sarvadoṣavivarjitam / adyaivāropitaṃ bījam adyaiva prāpta saṃpadam

Sanskrit only: no published translation is held for this verse.

ततः स पुरुषस् तेन कुशलमूलेन च प्रणिधानवशाद् दीपार्चिषलोकधातौ दीपराजो नाम प्रत्येकबुद्ध उपपन्नः पञ्चाभिज्ञाप्राप्तः ॥ ततः स प्रत्येकबुद्धः संसारम् असारम् इति ज्ञात्वा विद्युद् इव प्रातिहार्यं कृत्वा विहायसं सप्ततालमात्रम् अभ्युद्गम्य च तेजोधातुं समापद्योल्केव परिनिर्वाति स्म ॥ यत् तस्य पित्तश्लेष्ममांसास्थिस्नायुरुधिरं तत् सर्वं तेजसा पर्यवदातम् अगमच् छुद्धशरीरो ऽभूत् ॥ एवंरूपेण संसारे ऽनन्तसुखम् अनुप्राप्य निर्वाणभूमिं गच्छति स्म ॥ दीपदानस्य महापुण्यता महानुशंसा प्रतिलभ्यते ऽनेकविपाका भिक्षवः ॥ पुनर् विस्तरेण शृणुत ॥ धराधरतिरस्कृतं परमदूरदेशस्थितं सुसूक्ष्मम् अपि वस्तु चातितिमिरोत्करैर् आवृतम् । कराग्र इव स स्थितं यद् अनिरुद्धदृष्टं दिशो ददर्श सुगते महाद्युतिप्रदीपदानात् फलम्

tataḥ sa puruṣas tena kuśalamūlena ca praṇidhānavaśād dīpārciṣalokadhātau dīparājo nāma pratyekabuddha upapannaḥ pañcābhijñāprāptaḥ // tataḥ sa pratyekabuddhaḥ saṃsāram asāram iti jñātvā vidyud iva prātihāryaṃ kṛtvā vihāyasaṃ saptatālamātram abhyudgamya ca tejodhātuṃ samāpadyolkeva parinirvāti sma // yat tasya pittaśleṣmamāṃsāsthisnāyurudhiraṃ tat sarvaṃ tejasā paryavadātam agamac chuddhaśarīro 'bhūt // evaṃrūpeṇa saṃsāre 'nantasukham anuprāpya nirvāṇabhūmiṃ gacchati sma // dīpadānasya mahāpuṇyatā mahānuśaṃsā pratilabhyate 'nekavipākā bhikṣavaḥ // punar vistareṇa śṛṇuta // dharādharatiraskṛtaṃ paramadūradeśasthitaṃ susūkṣmam api vastu cātitimirotkarair āvṛtam / karāgra iva sa sthitaṃ yad aniruddhadṛṣṭaṃ diśo dadarśa sugate mahādyutipradīpadānāt phalam

Sanskrit only: no published translation is held for this verse.

दूरं सूक्ष्मं व्यवस्थितं दृश्यं पश्यन्ति ये जनाः । जिनप्रदीपमालायास् तत् फलं मुनयो जगुः

dūraṃ sūkṣmaṃ vyavasthitaṃ dṛśyaṃ paśyanti ye janāḥ / jinapradīpamālāyās tat phalaṃ munayo jaguḥ

Sanskrit only: no published translation is held for this verse.

दृश्यन्ते यत् क्षितीशाः शशधरवपुषो दीर्घनीलोत्पलाक्षा देवा यद् देवलोकं वरकनकनिभा भासयन्ति स्वकान्त्या । राजा यच् चक्रवर्त्ल् मणिकिरणशतैर् भासयन् गां प्रयाति तत् सर्वं दीपदानाद् भवति तनुभृतां बुद्धभट्टारकाय

dṛśyante yat kṣitīśāḥ śaśadharavapuṣo dīrghanīlotpalākṣā devā yad devalokaṃ varakanakanibhā bhāsayanti svakāntyā / rājā yac cakravartl maṇikiraṇaśatair bhāsayan gāṃ prayāti tat sarvaṃ dīpadānād bhavati tanubhṛtāṃ buddhabhaṭṭārakāya

Sanskrit only: no published translation is held for this verse.

लोके यद् भान्ति मर्त्याः कुवलयनयनाः सुभ्रुवो हेमवर्णाः शक्रो यद् देवराजो दशशतनयनो भाति दिव्यासनस्थः । यद् ब्रह्मा वीतकामः प्रवरसुरनतो भाति दिव्ये विमाने दत्त्वा तद् दीपमालां प्रभवति सुफलं शस्तृचैत्ये नराणाम्

loke yad bhānti martyāḥ kuvalayanayanāḥ subhruvo hemavarṇāḥ śakro yad devarājo daśaśatanayano bhāti divyāsanasthaḥ / yad brahmā vītakāmaḥ pravarasuranato bhāti divye vimāne dattvā tad dīpamālāṃ prabhavati suphalaṃ śastṛcaitye narāṇām

Sanskrit only: no published translation is held for this verse.

एवं बहुगुणं मत्वा दीपदानप्रभावतः । चैकम् अपि प्रदद्याद् यस् तत् सर्वं फलम् ईहया

evaṃ bahuguṇaṃ matvā dīpadānaprabhāvataḥ / caikam api pradadyād yas tat sarvaṃ phalam īhayā

Sanskrit only: no published translation is held for this verse.

सुरूपो भवति नयनाभिरामो नारीनराणां अभिवीक्षणीयो भवति ॥ एवम् एव भिक्षवो मनुजैर् महद्भिर् नित्यम् एव पूजाकर्मकाले दीपैः सह कर्म कर्तव्यम् ॥ देवार्चने भोजने सम्यक् पादप्रक्षालणेन च । देवगेहे प्रवेशेषु शयनेषु तथैव च

surūpo bhavati nayanābhirāmo nārīnarāṇāṃ abhivīkṣaṇīyo bhavati // evam eva bhikṣavo manujair mahadbhir nityam eva pūjākarmakāle dīpaiḥ saha karma kartavyam // devārcane bhojane samyak pādaprakṣālaṇena ca / devagehe praveśeṣu śayaneṣu tathaiva ca

Sanskrit only: no published translation is held for this verse.

शीलाभरणयुक्तेन सर्वकर्म प्रशस्यते । आत्मशोचं पुनः कुर्याद् बाह्यं शोचं च लौकिकम्

śīlābharaṇayuktena sarvakarma praśasyate / ātmaśocaṃ punaḥ kuryād bāhyaṃ śocaṃ ca laukikam

Sanskrit only: no published translation is held for this verse.

लौकिकलोकोत्तरं लोके यः करोति पवित्रमान् । इहलोके यशस्वी च परलोके परं सुखम्

laukikalokottaraṃ loke yaḥ karoti pavitramān / ihaloke yaśasvī ca paraloke paraṃ sukham

Sanskrit only: no published translation is held for this verse.