देवाश् च ह वा असुराश् चास्पर्धन्त ते देवाः समावद् एव यज्ञे कुर्वाणा आसन् यद् एव दवा अकुर्वत तद् असुरा अकुर्वत ते न व्यावृतम् अगच्छन् ते देवा अब्रुवन् नयतेमं यज्ञं तिर उपर्य् असुरेभ्यस् तंस्यामह इति तम् एताभिर् आच्छाद्योदक्रामन् यजूंषि यज्ञे समिधः स्वाहेति तं तिर उपर्य् असुरेभ्यो यज्ञम् अतन्वत तम् एषां यज्ञम् असुरा नान्ववायन् ततो देवा अभवन् परासुराः स य एवंविद्वांस् तिर उपर्य् असुरेभ्यो यज्ञं तनुते भवत्य् आत्मना परास्याप्रियो भ्रातृव्यो भवति एतैर् एव जुहुयात् समृतयज्ञे चतुर्भिश् चतुर्भिर् अन्वाख्यायम् पुरस्तात् प्रातरनुवाकस्य जुहुयात् एतावान् वै यज्ञो यावान् एष यज्ञस् तं वृङ्क्ते सयज्ञो भवति अयज्ञ इतरः एतैर् एव जुहुयात् पुरस्ताद् द्वादशाहस्य एष ह वै प्रत्यक्षं द्वादशाहस् तम् एवालभ्यैतैर् एव जुहुयात् पुरस्ताद् दीक्षायाः एषा ह वै प्रत्यक्षं दीक्षा ताम् एवालभ्यैतैर् एवातिथ्यम् अभिमृशेद् <यज्ञेन यज्ञम् अयजन्त देवाः [श्स् ७।५।१, प्स् २०।२।२, वैत्स् १६।१५]> इति ॥ ११ ॥
devāś ca ha vā asurāś cāspardhanta te devāḥ samāvad eva yajñe kurvāṇā āsan yad eva davā akurvata tad asurā akurvata te na vyāvṛtam agacchan te devā abruvan nayatemaṃ yajñaṃ tira upary asurebhyas taṃsyāmaha iti tam etābhir ācchādyodakrāman yajūṃṣi yajñe samidhaḥ svāheti taṃ tira upary asurebhyo yajñam atanvata tam eṣāṃ yajñam asurā nānvavāyan tato devā abhavan parāsurāḥ sa ya evaṃvidvāṃs tira upary asurebhyo yajñaṃ tanute bhavaty ātmanā parāsyāpriyo bhrātṛvyo bhavati etair eva juhuyāt samṛtayajñe caturbhiś caturbhir anvākhyāyam purastāt prātaranuvākasya juhuyāt etāvān vai yajño yāvān eṣa yajñas taṃ vṛṅkte sayajño bhavati ayajña itaraḥ etair eva juhuyāt purastād dvādaśāhasya eṣa ha vai pratyakṣaṃ dvādaśāhas tam evālabhyaitair eva juhuyāt purastād dīkṣāyāḥ eṣā ha vai pratyakṣaṃ dīkṣā tām evālabhyaitair evātithyam abhimṛśed <yajñena yajñam ayajanta devāḥ [ŚS 7.5.1, PS 20.2.2, VaitS 16.15]> iti || 11 ||
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.