ऋषयो वा इन्द्रं प्रत्यक्षं नापश्यन् तं वसिष्ठ एव प्रत्यक्षम् अपश्यत् सो ऽबिभेद् इतरेभ्य ऋषिभ्यो मा प्रवोचद् इति सो ऽब्रवीद् ब्राह्मणं ते वक्ष्यामि यथा त्वत्पुरोहिताः प्रजाः प्रजनिष्यन्ते अथेतरेभ्य ऋषिभ्यो मा प्रवोच इति तस्मा एतान् स्तोमभागान् उवाच ततो वसिष्ठपुरोहिताः प्रजाः प्राजायन्त स्तोमो वा एते एतेषां भागस् तत् स्तोमभागानां स्तोमभागत्वम् रश्मिर् असि क्षयाय त्वेति क्षयो वै देवाः देवेभ्य एव यज्ञं प्राह प्रेतिर् असि धर्मणे त्वेति धर्मो मनुष्याः मनुष्येभ्य एव यज्ञं प्राह अन्वितिर् असि संधिर् असि प्रतिधिर् असीति [एद्। अनितिर्, चोर्र्। पत्यल्] त्रयो वै लोकाः लोकेष्व् एव यज्ञं प्रतिष्ठापयति विष्टम्भो ऽसीति वृष्टिम् एवावरुन्द्धे प्रावो ऽस्य् अह्नांसीति मिथुनम् एव करोति उशिग् असि प्रकेतो ऽसि सुदितिर् असीति अष्टौ वसव एकादश रुद्रा द्वादशादित्या वाग् द्वात्रिंशी स्वरस् त्रयस्त्रिंशस्त्रयस्त्रिंशद् देवाः देवेभ्य एव यज्ञं प्राह ओजो ऽसि पितृभ्यस् त्वेति बलम् एव तत्पितॄन् अनुसंतनोति तन्तुर् असि प्रजाभ्यस् त्वेति प्रजा एव पशून् अनुसंतनोति रेवद् अस्य् ओषधीभ्यस् त्वेति ओषधीष्व् एव यज्ञं प्रतिष्ठापयति पृतनाषाड् असि पशुभ्यस् त्वेति प्रजा एव पशून् अनुसंतनोति अभिजिद् असीति वज्रो वै षोडशी व्यावृत्तो ऽसौ वज्रस् तस्माद् एषो ऽन्यैर् व्यावृत्तः नाभुर् असीति प्रजापतिर् वै सप्तदशः प्रजापतिम् एवावरुन्द्धे ॥ १३ ॥
ṛṣayo vā indraṃ pratyakṣaṃ nāpaśyan taṃ vasiṣṭha eva pratyakṣam apaśyat so 'bibhed itarebhya ṛṣibhyo mā pravocad iti so 'bravīd brāhmaṇaṃ te vakṣyāmi yathā tvatpurohitāḥ prajāḥ prajaniṣyante athetarebhya ṛṣibhyo mā pravoca iti tasmā etān stomabhāgān uvāca tato vasiṣṭhapurohitāḥ prajāḥ prājāyanta stomo vā ete eteṣāṃ bhāgas tat stomabhāgānāṃ stomabhāgatvam raśmir asi kṣayāya tveti kṣayo vai devāḥ devebhya eva yajñaṃ prāha pretir asi dharmaṇe tveti dharmo manuṣyāḥ manuṣyebhya eva yajñaṃ prāha anvitir asi saṃdhir asi pratidhir asīti [ed. anitir, corr. Patyal] trayo vai lokāḥ lokeṣv eva yajñaṃ pratiṣṭhāpayati viṣṭambho 'sīti vṛṣṭim evāvarunddhe prāvo 'sy ahnāṃsīti mithunam eva karoti uśig asi praketo 'si suditir asīti aṣṭau vasava ekādaśa rudrā dvādaśādityā vāg dvātriṃśī svaras trayastriṃśastrayastriṃśad devāḥ devebhya eva yajñaṃ prāha ojo 'si pitṛbhyas tveti balam eva tatpitṝn anusaṃtanoti tantur asi prajābhyas tveti prajā eva paśūn anusaṃtanoti revad asy oṣadhībhyas tveti oṣadhīṣv eva yajñaṃ pratiṣṭhāpayati pṛtanāṣāḍ asi paśubhyas tveti prajā eva paśūn anusaṃtanoti abhijid asīti vajro vai ṣoḍaśī vyāvṛtto 'sau vajras tasmād eṣo 'nyair vyāvṛttaḥ nābhur asīti prajāpatir vai saptadaśaḥ prajāpatim evāvarunddhe || 13 ||
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.