देवाश् च ह वा ऋषयश् चासुरैः संयत्ता आसन् [एद्। चिआसुरैः] तेषाम् असुराणाम् इमाः पुरः प्रत्यभिजिता आसन्न् अयस्मयी पृथिवी रजतान्तरिक्षं हरिणी द्यौस् ते देवाः संघातंसंघातं पराजयन्त ते ऽविदुर् अनायतना हि वै स्मस् तस्मात् पराजयामहा इति [एद्। पराजयामह, चोर्र्। पत्यल्] त एताः पुरः प्रत्यकुर्वत हविर्धानं दिव आग्नीध्रम् अन्तरिक्षात् सदः पृथिव्यास् ते देवा अब्रुवन्न् उपसदम् उपायाम उपसदा वै महापुरं जयन्तीति त एभ्यो लोकेभ्यो निरघ्नन् एकयामुष्माल् लोकाद् एकयान्तरिक्षाद् एकया पृथिव्यास् तस्माद् आहुर् उपसदा वै महापुरं जयन्तीति त एभ्यो लोकेभ्यो निर्हता ऋतून् प्राविशन् ते षड् उपायन् तान् उपसद्भिर् एवर्तुभ्यो निरघ्नन् द्वाभ्याम् अमुष्माल् लोकाद् द्वाभ्याम् अन्तरिक्षाद् द्वाभ्यां पृथिव्यास् त ऋतुभ्यो निर्हताः संवत्सरं प्राविशन् ते द्वादशोपायन् तान् उपसद्भिर् एव संवत्सरान् निरघ्नन् चतसृभिर् अमुष्माल् लोकाच् चतसृभिर् अन्तरिक्षाच् चतसृभिः पृथिव्यास् ते संवत्सरान् निर्हता अहोरात्रे प्राविशन् ते यत् सायम् उपायंस् तेनैनान् रात्र्या अनुदन्त यत् प्रातस् तेनाह्नस् तस्माद् गौः सायं प्रातस्तनम् आप्यायते प्रातः सायन्तनम् तान् उपसद्भिर् एवैभ्यो लोकेभ्यो नुदमाना आयन् ततो देवा अभवन् परासुराः सर्वेभ्य एवैभ्यो लोकेभ्यो भ्रातृव्यं नुदमान एति य एवंविद्वान् उपसदम् उपैति ॥ ७ ॥
devāś ca ha vā ṛṣayaś cāsuraiḥ saṃyattā āsan [ed. ciāsuraiḥ] teṣām asurāṇām imāḥ puraḥ pratyabhijitā āsann ayasmayī pṛthivī rajatāntarikṣaṃ hariṇī dyaus te devāḥ saṃghātaṃsaṃghātaṃ parājayanta te 'vidur anāyatanā hi vai smas tasmāt parājayāmahā iti [ed. parājayāmaha, corr. Patyal] ta etāḥ puraḥ pratyakurvata havirdhānaṃ diva āgnīdhram antarikṣāt sadaḥ pṛthivyās te devā abruvann upasadam upāyāma upasadā vai mahāpuraṃ jayantīti ta ebhyo lokebhyo niraghnan ekayāmuṣmāl lokād ekayāntarikṣād ekayā pṛthivyās tasmād āhur upasadā vai mahāpuraṃ jayantīti ta ebhyo lokebhyo nirhatā ṛtūn prāviśan te ṣaḍ upāyan tān upasadbhir evartubhyo niraghnan dvābhyām amuṣmāl lokād dvābhyām antarikṣād dvābhyāṃ pṛthivyās ta ṛtubhyo nirhatāḥ saṃvatsaraṃ prāviśan te dvādaśopāyan tān upasadbhir eva saṃvatsarān niraghnan catasṛbhir amuṣmāl lokāc catasṛbhir antarikṣāc catasṛbhiḥ pṛthivyās te saṃvatsarān nirhatā ahorātre prāviśan te yat sāyam upāyaṃs tenainān rātryā anudanta yat prātas tenāhnas tasmād gauḥ sāyaṃ prātastanam āpyāyate prātaḥ sāyantanam tān upasadbhir evaibhyo lokebhyo nudamānā āyan tato devā abhavan parāsurāḥ sarvebhya evaibhyo lokebhyo bhrātṛvyaṃ nudamāna eti ya evaṃvidvān upasadam upaiti || 7 ||
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.