यस्य स्पन्दास्पन्दमयी सत्ता । चेत्यौन्मुख्ययुक्ता सत्ता स्पन्दमयी । तद्रहितास्पन्दमयी । व्यवहारान् नाम्नैव व्यवहारार्थं कृतेन नाम्ना एव । भिन्ना इव । कथम्भूता । सर्वगा विश्वे तदुत्तीर्णे च स्वरूपे गता । कस्येव । पवनस्येव । पवनस्य स्पन्दमयी सत्ता यया वृक्षादयः कम्पन्ते । ऽस्पन्दमयी आकाशस्वरूपा । ननु कथं स्पन्दास्पन्दमय्याः सत्ताया एकत्वं । सत्यं । सस्पन्दस्य निःस्पन्दस्य च जलस्यैकत्वं यथा निपुणैर् निश्चीयते तथात्रापीति न विरोधः
yasya spandāspandamayī sattā | cetyaunmukhyayuktā sattā spandamayī | tadrahitāspandamayī | vyavahārān nāmnaiva vyavahārārthaṃ kṛtena nāmnā eva | bhinnā iva | kathambhūtā | sarvagā viśve taduttīrṇe ca svarūpe gatā | kasyeva | pavanasyeva | pavanasya spandamayī sattā yayā vṛkṣādayaḥ kampante | 'spandamayī ākāśasvarūpā | nanu kathaṃ spandāspandamayyāḥ sattāyā ekatvaṃ | satyaṃ | saspandasya niḥspandasya ca jalasyaikatvaṃ yathā nipuṇair niścīyate tathātrāpīti na virodhaḥ
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.