ता वैश्वदेवेन सृष्टास् तस्मिंस् तरुणिमनि वरुणो ऽगृह्णात् तद् आहुर् अति वै ताः प्रजापतिम् अचरंस् ता अतिचरन्तीर् वरुणेनाग्राहयत् तस्मात् पिता नातिचरितवा इति वैश्वदेवेन वै प्रजापतिः प्रजा असृजत तस्य मरुतो हव्यं व्यमथ्नत ततो ऽंहोगृहीता असृज्यन्त ताभ्यो भेषजम् ऐछत् तद् वा आत्मन्न् एवैछत् स एतत् पय आत्मनो ऽधि निरमिमीत तेनाभ्यो ऽंहो ऽवायजत् तद् अंहसो वा एषावेष्टिर् यद् वरुणप्रघासा यद् वरुणप्रघासैर् यजते सर्वस्यांहसो ऽवेष्ट्यै जग्धाद् वै ताः प्रजा वरुणो ऽगृह्णात् तस्माद् वरुणप्रघासा यावत् कुमारे ऽम्णो जात एनस् तावद् अस्मिन्न् एनो भवति यो वरुणप्रघासैर् यजते सावित्रो ऽष्टाकपालो भवति गायत्रो वै देवानां सविता द्वादशकपाल ऐन्द्राग्नो देवतया यद् वै तद् वरुणगृहीता अवेव्लीयन्तेव तद् आस्व् इन्द्राग्नी बलम् अधत्तां शिथिरा वै ताः प्रजा वरुणो ऽगृह्णात् तास्व् इन्द्राग्नी बलम् अधत्तम् ओजो वै वीर्यम् इन्द्राग्नी ओजो वा एतद् वीर्यं मध्यतः प्रजानां धीयते न वै ताः प्राणंस् ता अप्राणतीर् वरुणो ऽगृह्णात् प्राणापानौ वा इन्द्राग्नी प्राणापानौ वा एतन् मुखतः प्रजानां धीयते अथैतानि पञ्च हवींषि संतत्यै निरवत्त्यै मारुती निर्वरुणत्वाय वारुणी कन्त्वाय कायो यद् वै तद् वरुणगृहीताभ्यः कम् अभवत् तस्मात् कायः प्रजापतिर् वै कः प्रजापतिर् वै ताः प्रजा वरुणेनाग्राहयद् यत् काय आत्मन एवैना वरुणान् मुञ्चति
tā vaiśvadevena sṛṣṭās tasmiṃs taruṇimani varuṇo 'gṛhṇāt tad āhur ati vai tāḥ prajāpatim acaraṃs tā aticarantīr varuṇenāgrāhayat tasmāt pitā nāticaritavā iti vaiśvadevena vai prajāpatiḥ prajā asṛjata tasya maruto havyaṃ vyamathnata tato 'ṃhogṛhītā asṛjyanta tābhyo bheṣajam aichat tad vā ātmann evaichat sa etat paya ātmano 'dhi niramimīta tenābhyo 'ṃho 'vāyajat tad aṃhaso vā eṣāveṣṭir yad varuṇapraghāsā yad varuṇapraghāsair yajate sarvasyāṃhaso 'veṣṭyai jagdhād vai tāḥ prajā varuṇo 'gṛhṇāt tasmād varuṇapraghāsā yāvat kumāre 'mṇo jāta enas tāvad asminn eno bhavati yo varuṇapraghāsair yajate sāvitro 'ṣṭākapālo bhavati gāyatro vai devānāṃ savitā dvādaśakapāla aindrāgno devatayā yad vai tad varuṇagṛhītā avevlīyanteva tad āsv indrāgnī balam adhattāṃ śithirā vai tāḥ prajā varuṇo 'gṛhṇāt tāsv indrāgnī balam adhattam ojo vai vīryam indrāgnī ojo vā etad vīryaṃ madhyataḥ prajānāṃ dhīyate na vai tāḥ prāṇaṃs tā aprāṇatīr varuṇo 'gṛhṇāt prāṇāpānau vā indrāgnī prāṇāpānau vā etan mukhataḥ prajānāṃ dhīyate athaitāni pañca havīṃṣi saṃtatyai niravattyai mārutī nirvaruṇatvāya vāruṇī kantvāya kāyo yad vai tad varuṇagṛhītābhyaḥ kam abhavat tasmāt kāyaḥ prajāpatir vai kaḥ prajāpatir vai tāḥ prajā varuṇenāgrāhayad yat kāya ātmana evainā varuṇān muñcati
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.