नमस् ते हरसे शोचिषे चाथो ते अर्चिषे नमः । अन्यांस् ते अस्मत् तपन्तु हेतयः पावको अस्मभ्यं शिवो भव ॥ द्रुषदे वण् नृषदे वड् अप्सुषदे वड् बर्हिषदे वड् वनर्षदे वट् स्वर्विदे वट् ॥ अन्नपते अन्नस्य नो देह्य् अनमीवस्य शुष्मिणः । प्रप्र दातारं तारिषा ऊर्जं नो धेहि द्विपदे चतुष्पदे ॥ ये देवा देवानां यज्ञिया यज्ञियानां संवत्सरीयम् उप भागम् आसते । अहुतादो हविषो यज्ञे अस्मिन्त् स्वयं पिबन्तु मधुनो घृतस्य ॥ ये देवा देवेभ्यो अधि देवत्वम् आयन् ये ब्रह्मणः पुरएतारो अस्य । येभ्यो न ऋते पवते धाम किं चन न ते दिवो न पृथिव्या अधि स्नुषु ॥ प्राणदा अपानदा व्यानदा वर्चोधा वरिवोधाः । अन्यांस् ते अस्मत् तपन्तु हेतयः पावको अस्मभ्यं शिवो भव
namas te harase śociṣe cātho te arciṣe namaḥ / anyāṃs te asmat tapantu hetayaḥ pāvako asmabhyaṃ śivo bhava // druṣade vaṇ nṛṣade vaḍ apsuṣade vaḍ barhiṣade vaḍ vanarṣade vaṭ svarvide vaṭ // annapate annasya no dehy anamīvasya śuṣmiṇaḥ / prapra dātāraṃ tāriṣā ūrjaṃ no dhehi dvipade catuṣpade // ye devā devānāṃ yajñiyā yajñiyānāṃ saṃvatsarīyam upa bhāgam āsate / ahutādo haviṣo yajñe asmint svayaṃ pibantu madhuno ghṛtasya // ye devā devebhyo adhi devatvam āyan ye brahmaṇaḥ puraetāro asya / yebhyo na ṛte pavate dhāma kiṃ cana na te divo na pṛthivyā adhi snuṣu // prāṇadā apānadā vyānadā varcodhā varivodhāḥ / anyāṃs te asmat tapantu hetayaḥ pāvako asmabhyaṃ śivo bhava
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.