यस् ते अद्य कृणवद् भद्रशोचे ऽपूपं देव घृतवन्तम् अग्ने । प्र तं नय प्रतरं वस्यो अछाभि द्युम्नं देवहितं यविष्ठ्य ॥ आ तं भज सौश्रवसेष्व् अग्न उक्थौक्था आभज शस्यमाने । प्रियः सूर्ये प्रियो अग्ना भवात्य् उज् जातेन भिनदद् उज् जनित्वैः ॥ त्वाम् अग्ने यजमाना अनु द्यून् दूतं कृण्वाना अयजन्त हव्यैः । त्वया सह द्रविणम् इछमाना व्रजं गोमन्तम् उशिजो विवव्रुः ॥ अस्ताव्य् अग्निर् नृणां सुशेवो वैश्वानर ऋषिभिः सोमगोपाः । अद्वेष्ये द्यावापृथिवी हुवे देवा धत्त रयिम् अस्मे सुवीरम्
yas te adya kṛṇavad bhadraśoce 'pūpaṃ deva ghṛtavantam agne / pra taṃ naya prataraṃ vasyo achābhi dyumnaṃ devahitaṃ yaviṣṭhya // ā taṃ bhaja sauśravaseṣv agna ukthaukthā ābhaja śasyamāne / priyaḥ sūrye priyo agnā bhavāty uj jātena bhinadad uj janitvaiḥ // tvām agne yajamānā anu dyūn dūtaṃ kṛṇvānā ayajanta havyaiḥ / tvayā saha draviṇam ichamānā vrajaṃ gomantam uśijo vivavruḥ // astāvy agnir nṛṇāṃ suśevo vaiśvānara ṛṣibhiḥ somagopāḥ / adveṣye dyāvāpṛthivī huve devā dhatta rayim asme suvīram
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.