अन्नात् परिस्रुतो रसं ब्रह्मणा क्षत्रं व्यपिबत् । ऋतेन सत्यम् इन्द्रियं विपानं शुक्रम् अन्धसः । इन्द्रस्येन्द्रियम् इदं पयो ऽमृतं मधु ॥ रेतो मूत्रं विजहाति योनिं प्रविशद् इन्द्रियम् । गर्भो जरायुणावृता उल्बं जहाति जन्मना ॥ ऋतेन सत्यम् इन्द्रियं विपानं शुक्रम् अन्धसः । इन्द्रस्येन्द्रियम् इदं पयो ऽमृतं मधु ॥ दृष्ट्वा रूपे व्याकरोत् सत्यानृते प्रजापतिः । अश्रद्धाम् अनृते ऽदधाञ् श्रद्धां सत्ये प्रजापतिः ॥ ऋतेन सत्यम् इन्द्रियं विपानं शुक्रम् अन्धसः । इन्द्रस्येन्द्रियम् इदं पयो ऽमृतं मधु ॥ वेदेन रूपे व्यपिबत् सुतासुतौ प्रजापतिः । ऋतेन सत्यम् इन्द्रियं विपानं शुक्रम् अन्धसः । इन्द्रस्येन्द्रियम् इदं पयो ऽमृतं मधु ॥ दृष्ट्वा परिस्रुतो रसं शुक्रेण शुक्रं व्यपिबत् पयः सोमं प्रजापतिः । ऋतेन सत्यम् इन्द्रियं विपानं शुक्रम् अन्धसः । इन्द्रस्येन्द्रियम् इदं पयो ऽमृतं मधु
annāt parisruto rasaṃ brahmaṇā kṣatraṃ vyapibat / ṛtena satyam indriyaṃ vipānaṃ śukram andhasaḥ / indrasyendriyam idaṃ payo 'mṛtaṃ madhu // reto mūtraṃ vijahāti yoniṃ praviśad indriyam / garbho jarāyuṇāvṛtā ulbaṃ jahāti janmanā // ṛtena satyam indriyaṃ vipānaṃ śukram andhasaḥ / indrasyendriyam idaṃ payo 'mṛtaṃ madhu // dṛṣṭvā rūpe vyākarot satyānṛte prajāpatiḥ / aśraddhām anṛte 'dadhāñ śraddhāṃ satye prajāpatiḥ // ṛtena satyam indriyaṃ vipānaṃ śukram andhasaḥ / indrasyendriyam idaṃ payo 'mṛtaṃ madhu // vedena rūpe vyapibat sutāsutau prajāpatiḥ / ṛtena satyam indriyaṃ vipānaṃ śukram andhasaḥ / indrasyendriyam idaṃ payo 'mṛtaṃ madhu // dṛṣṭvā parisruto rasaṃ śukreṇa śukraṃ vyapibat payaḥ somaṃ prajāpatiḥ / ṛtena satyam indriyaṃ vipānaṃ śukram andhasaḥ / indrasyendriyam idaṃ payo 'mṛtaṃ madhu
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.