परीतो षिञ्चता सुतं सोमो य उत्तमं हविः । दधन्वान् यो नर्यो अप्स्व् अन्तरा सुषाव सोमम् अद्रिभिः ॥ सोमो ऽस्य् अश्विभ्यां पच्यस्व सरस्वत्यै पच्यस्वेन्द्राय सुत्राम्णे पच्यस्व ॥ पुनातु ते परिस्रुतं सोमं सूर्यस्य दुहिता । वारेण शश्वता तना ॥ वायुः पूतः पवित्रेण प्राक् सोमो अतिद्रुतः । इन्द्रस्य युज्यः सखा ॥ वायोः पूतः पवित्रेण प्रत्यक् सोमो अतिस्रुतः । इन्द्रस्य युज्यः सखा ॥ ब्रह्म क्षत्रं पवते तेज इन्द्रियं सुरायाः सोमः सुत आसुतो मदाय । शुक्रेण देव देवताः पिपृग्धि रसेनान्नं यजमानाय धेहि ॥ कुविद् अङ्ग नाना हि वाम् ॥ या व्याघ्रं विषूचिकोभौ वृकं च रक्षति । श्येनं पतत्रिणं सिंहं सेमं पात्व् अंहसः ॥ सुरावन्तं बर्हिषदं सुवीरं यज्ञं हिन्वन्ति महिषा नमोभिः । दधानाः सोमं दिवि देवतासु मदेनेन्द्रं यजमानाः स्वर्काः ॥ यस् ते रसः संभृता ओषधीषु सोमस्य शुष्मः सुरायां सुतस्य । तेन जिन्व यजमानं मदेन सरस्वतीम् अश्विना इन्द्रम् अग्निम् ॥ यम् अश्विना नमुचेर् आसुराद् अधि सरस्वत्य् असुनोद् इन्द्रियाय । इमं तं शुक्रं मधुमन्तम् इन्दुं सोमं राजानम् इह भक्षयामि ॥ यद् अत्र शिष्टं रसिनः सुतस्य यम् अस्येन्दो अपिबञ् शचीभिः । अहं तम् अस्य मनसा शिवेन सोमं राजानम् इह भक्षयामि
parīto ṣiñcatā sutaṃ somo ya uttamaṃ haviḥ / dadhanvān yo naryo apsv antarā suṣāva somam adribhiḥ // somo 'sy aśvibhyāṃ pacyasva sarasvatyai pacyasvendrāya sutrāmṇe pacyasva // punātu te parisrutaṃ somaṃ sūryasya duhitā / vāreṇa śaśvatā tanā // vāyuḥ pūtaḥ pavitreṇa prāk somo atidrutaḥ / indrasya yujyaḥ sakhā // vāyoḥ pūtaḥ pavitreṇa pratyak somo atisrutaḥ / indrasya yujyaḥ sakhā // brahma kṣatraṃ pavate teja indriyaṃ surāyāḥ somaḥ suta āsuto madāya / śukreṇa deva devatāḥ pipṛgdhi rasenānnaṃ yajamānāya dhehi // kuvid aṅga nānā hi vām // yā vyāghraṃ viṣūcikobhau vṛkaṃ ca rakṣati / śyenaṃ patatriṇaṃ siṃhaṃ semaṃ pātv aṃhasaḥ // surāvantaṃ barhiṣadaṃ suvīraṃ yajñaṃ hinvanti mahiṣā namobhiḥ / dadhānāḥ somaṃ divi devatāsu madenendraṃ yajamānāḥ svarkāḥ // yas te rasaḥ saṃbhṛtā oṣadhīṣu somasya śuṣmaḥ surāyāṃ sutasya / tena jinva yajamānaṃ madena sarasvatīm aśvinā indram agnim // yam aśvinā namucer āsurād adhi sarasvaty asunod indriyāya / imaṃ taṃ śukraṃ madhumantam induṃ somaṃ rājānam iha bhakṣayāmi // yad atra śiṣṭaṃ rasinaḥ sutasya yam asyendo apibañ śacībhiḥ / ahaṃ tam asya manasā śivena somaṃ rājānam iha bhakṣayāmi
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.