बहूनां पिता बहुर् अस्य पुत्रः चिश्चा कृणोति समनावगत्य । इषुधिः सङ्काः पृतनाश् च सर्वाः पृष्ठे निनद्धो जयति प्रसूतः ॥ रथे तिष्ठन् नयति वाजिनः पुरो यत्रयत्र कामयते सुषारथिः । अभीशूनां महिमानं पनायत मनः पश्चाद् अनुयछन्ति रश्मयः ॥ तीव्रान् घोषान् कृण्वते वृषपाणयो ऽश्वा रथेभिः सह वाजयन्तः । अवक्रामन्तः प्रपदैर् अमित्रान् क्षिणन्ति शत्रून्र् अनपव्ययन्तः ॥ वनस्पते वीड्वङ्गो हि भूया अस्मत्सखा प्रतरणः सुवीरः । गोभिः संनद्धो असि वीडयस्वास्थाता ते जयतु जेत्वानि ॥ दिवस् पृथिव्याः पर्य् अन्तरिक्षाद् वनस्पतिभ्यः पर्य् आवृतं सहः । अपाम् ओज्मानं परि गोभिर् आवृतम् इन्द्रस्य वज्रं हविषा रथं यज ॥ इन्द्रस्य वज्रो मरुताम् अनीकं मित्रस्य गर्भो वरुणस्य नाभिः । सेमां नो हव्यदातिं जुषाणो देव रथ प्रति हव्या गृभाय ॥ स्वादुषंसदः पितरो वयोधाः कृछ्रेश्रितः शक्तीवन्तो गभीराः । चित्रसेना इषुबला अमृध्राः सतोवीरा उरवो व्रातसाहाः ॥ ब्राह्मणासः पितरः सोम्यासः शिवे नो द्यावापृथिवी उभे स्ताम् । पूषा नः पातु दुरिताद् ऋतावृधो रक्षा माकिर् नो अघशंस ईशत ॥ ऋजीते परिवृङ्ग्धि नो ऽश्मा भवतु नस् तनूः । सोमो अधिब्रवीतु नो ऽदितिः शर्म यछतु ॥ सुपर्णं वस्ते मृगो अस्या दन्तो गोभिः संनद्धा पतति प्रसूता । यत्रा नरः सं च वि च द्रवन्ति तत्रास्मभ्यम् इषवः शर्म यंसन् ॥ अहिर् इव भोगैः पर्येति बाहुं ज्याया हेतिं परिबाधमानः । हस्तघ्नो विश्वा वयुनानि विद्वान् पुमान् पुमांसं परिपातु विश्वतः ॥ आजङ्घन्ति सान्व् एषां जघनं उपजिघ्नतु । अश्वाजनि प्रचेतसो ऽश्वान्त् समत्सु नोदय ॥ उपश्वासय पृथिवीम् उत द्यां पुरुत्रा ते मनुतां विष्ठितं जगत् । सं दुन्दुभे सजूर् इन्द्रेण देवैर् आराद् दवीयो अपसेध शत्रून् ॥ आक्रन्दय बलम् ओजो ना आधा निष्टनिहि दुरिता बाधमानः । अपप्रोथ दुन्दुभे दुछुना इत इन्द्रस्य मुष्टिर् असि वीडयस्व ॥ इन्द्रस्य : फ़्न् एमेन्देद्। एद्।: इन्द्रस्य। आमूर् अज प्रत्यावर्तयेमाः केतुमद् दुन्दुभिर् वावदीति । सम् अश्वपर्णाश् चरन्तु नो नरो ऽस्माकम् इन्द्र रथिनो जयन्तु
bahūnāṃ pitā bahur asya putraḥ ciścā kṛṇoti samanāvagatya / iṣudhiḥ saṅkāḥ pṛtanāś ca sarvāḥ pṛṣṭhe ninaddho jayati prasūtaḥ // rathe tiṣṭhan nayati vājinaḥ puro yatrayatra kāmayate suṣārathiḥ / abhīśūnāṃ mahimānaṃ panāyata manaḥ paścād anuyachanti raśmayaḥ // tīvrān ghoṣān kṛṇvate vṛṣapāṇayo 'śvā rathebhiḥ saha vājayantaḥ / avakrāmantaḥ prapadair amitrān kṣiṇanti śatrūnr anapavyayantaḥ // vanaspate vīḍvaṅgo hi bhūyā asmatsakhā prataraṇaḥ suvīraḥ / gobhiḥ saṃnaddho asi vīḍayasvāsthātā te jayatu jetvāni // divas pṛthivyāḥ pary antarikṣād vanaspatibhyaḥ pary āvṛtaṃ sahaḥ / apām ojmānaṃ pari gobhir āvṛtam indrasya vajraṃ haviṣā rathaṃ yaja // indrasya vajro marutām anīkaṃ mitrasya garbho varuṇasya nābhiḥ / semāṃ no havyadātiṃ juṣāṇo deva ratha prati havyā gṛbhāya // svāduṣaṃsadaḥ pitaro vayodhāḥ kṛchreśritaḥ śaktīvanto gabhīrāḥ / citrasenā iṣubalā amṛdhrāḥ satovīrā uravo vrātasāhāḥ // brāhmaṇāsaḥ pitaraḥ somyāsaḥ śive no dyāvāpṛthivī ubhe stām / pūṣā naḥ pātu duritād ṛtāvṛdho rakṣā mākir no aghaśaṃsa īśata // ṛjīte parivṛṅgdhi no 'śmā bhavatu nas tanūḥ / somo adhibravītu no 'ditiḥ śarma yachatu // suparṇaṃ vaste mṛgo asyā danto gobhiḥ saṃnaddhā patati prasūtā / yatrā naraḥ saṃ ca vi ca dravanti tatrāsmabhyam iṣavaḥ śarma yaṃsan // ahir iva bhogaiḥ paryeti bāhuṃ jyāyā hetiṃ paribādhamānaḥ / hastaghno viśvā vayunāni vidvān pumān pumāṃsaṃ paripātu viśvataḥ // ājaṅghanti sānv eṣāṃ jaghanaṃ upajighnatu / aśvājani pracetaso 'śvānt samatsu nodaya // upaśvāsaya pṛthivīm uta dyāṃ purutrā te manutāṃ viṣṭhitaṃ jagat / saṃ dundubhe sajūr indreṇa devair ārād davīyo apasedha śatrūn // ākrandaya balam ojo nā ādhā niṣṭanihi duritā bādhamānaḥ / apaprotha dundubhe duchunā ita indrasya muṣṭir asi vīḍayasva // indrasya : FN emended. Ed.: indrasya. āmūr aja pratyāvartayemāḥ ketumad dundubhir vāvadīti / sam aśvaparṇāś carantu no naro 'smākam indra rathino jayantu
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.