देवेभ्यो वा अग्निं चिक्यानेभ्यो न व्यौछत् ते ऽग्ना आहुतिम् अजुहवुस् तुभ्यम् अग्रे व्युछ तथास्मभ्यं विवत्स्यतीति तयाग्नये व्यौछद् व्य् अग्नया औछन् नाहुत्यै व्यौछत् तस्या आहुत्यै यज्ञेन व्यौछद् व्य् आहुत्या औछन् न यज्ञाय व्यौछत् तस्मै यज्ञाय दक्षिणया व्यौछद् वि यज्ञायौछन् न दक्षिणायै व्यौछत् तस्यै दक्षिणायै ब्राह्मणेन व्यौछद् वि दक्षिणाया औछन् न ब्राह्मणाय व्यौछत् तस्मै ब्राह्मणाय ब्रह्मणा व्यौछद् वि ब्राह्मणायौछन् न ब्रह्मणे व्यौछत् तस्मै ब्रह्मणे तपसा व्यौछद् एता वै तपःपरार्धा व्युष्टयः श्वोवसीयस्य् अस्मै व्युछति य एवं विद्वान् व्युष्टीर् उपधत्ते यो वै यथापूर्वं व्युष्टीर् वेद यथापूर्वम् अस्मै व्युछत्य् औषसी वाव प्रथमा व्युष्टिर् व्यवाड् इति वा आहुर् यद् औषस्य् उदेति यद् व्युछति यद् अग्निर् आधीयते यत् सूर्य उदेति यद् धस्ता अवनेनिक्ते यद् अश्नाति यत् पिबत्य् एता वै यथापूर्वं व्युष्टयो यथापूर्वम् अस्मै व्युछति य एवं विद्वान् व्युष्टीर् उपधत्ते
devebhyo vā agniṃ cikyānebhyo na vyauchat te 'gnā āhutim ajuhavus tubhyam agre vyucha tathāsmabhyaṃ vivatsyatīti tayāgnaye vyauchad vy agnayā auchan nāhutyai vyauchat tasyā āhutyai yajñena vyauchad vy āhutyā auchan na yajñāya vyauchat tasmai yajñāya dakṣiṇayā vyauchad vi yajñāyauchan na dakṣiṇāyai vyauchat tasyai dakṣiṇāyai brāhmaṇena vyauchad vi dakṣiṇāyā auchan na brāhmaṇāya vyauchat tasmai brāhmaṇāya brahmaṇā vyauchad vi brāhmaṇāyauchan na brahmaṇe vyauchat tasmai brahmaṇe tapasā vyauchad etā vai tapaḥparārdhā vyuṣṭayaḥ śvovasīyasy asmai vyuchati ya evaṃ vidvān vyuṣṭīr upadhatte yo vai yathāpūrvaṃ vyuṣṭīr veda yathāpūrvam asmai vyuchaty auṣasī vāva prathamā vyuṣṭir vyavāḍ iti vā āhur yad auṣasy udeti yad vyuchati yad agnir ādhīyate yat sūrya udeti yad dhastā avanenikte yad aśnāti yat pibaty etā vai yathāpūrvaṃ vyuṣṭayo yathāpūrvam asmai vyuchati ya evaṃ vidvān vyuṣṭīr upadhatte
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.