त्वम् अग्ने वीरवद् यशो देवश् च सविता भगः । दितिश् च दाति वार्यम् ॥ त्वं भगो ना आ हि रत्नम् इषे परिज्मेव क्षयसि दस्मवर्चाः । अग्ने मित्रो न बृहत ऋतस्यासि क्षत्ता वामस्य देव भूरेः ॥ प्रेद्धो अग्ने ॥ इमो अग्ने वीततमानि हव्याजस्रो वक्षि देवतातिम् अछ । प्रति न ईं सुरभीणि व्यन्तु ॥ अग्ना आयूंषि पवसे ऽग्निर् ऋषिः ॥ तं हि शस्वन्ता ईडते स्रुचा देवं घृतश्चुता । अग्निं हव्याय वोढवे ॥ अग्निमग्निं हवीमभिः सदा हवन्त विश्पतिम् । हव्यवाहं पुरुप्रियम् ॥ अग्ने पावक रोचिषा स नः पावक दीदिवो ऽग्निः शुचिव्रततम उद् अग्ने शुचयस् तव ॥ स हव्यवाड् अमर्त्य उशिग् दूतश् चनोहितः । अग्निर् धिया समृण्वति ॥ अग्निं स्तोमेन बोधय समिधानो अमर्त्यम् । हव्या देवेषु नो दधत् ॥ किम् इत् ते विष्णो परिचक्ष्यं भूत् प्र यद् ववक्षे शिपिविष्टो अस्मि । मा वर्पो अस्मद् अपगूह एतद् यद् अन्यरूपः समिथे बभूथ ॥ प्र तत् ते अद्य शिपिविष्ट नामार्यः शंसामि वयुनानि विद्वान् । तं त्वा गृणामि तवसम् अतव्यान् क्षयन्तम् अस्य रजसः पराके ॥ सुत्रामाणं पृथिवीं द्याम् अनेहसं सुशर्माणम् अदितिं सुप्रणीतिम् । दैवीं नावं स्वरित्राम् अनागसम् अस्रवन्तीम् आरुहेमा स्वस्तये ॥ महीम् ऊ षु मातरं सुव्रतानाम् ऋतस्य पत्नीम् अवसे हुवेम । तुविक्षत्राम् अजरन्तीम् उरूचीं सुशर्माणम् अदितिं सुप्रणीतिम् ॥ अग्नीषोमा सवेदसा सहूती वनतं गिरः । सं देवत्रा बभूवथुः ॥ युवम् एतानि दिवि रोचनान्य् अग्निश् च सोम सक्रतू अधत्तम् । युवं सिन्धूंर् अभिशस्तेर् अवद्याद् अग्नीषोमा अमुञ्चतं गृभीतान्
tvam agne vīravad yaśo devaś ca savitā bhagaḥ / ditiś ca dāti vāryam // tvaṃ bhago nā ā hi ratnam iṣe parijmeva kṣayasi dasmavarcāḥ / agne mitro na bṛhata ṛtasyāsi kṣattā vāmasya deva bhūreḥ // preddho agne // imo agne vītatamāni havyājasro vakṣi devatātim acha / prati na īṃ surabhīṇi vyantu // agnā āyūṃṣi pavase 'gnir ṛṣiḥ // taṃ hi śasvantā īḍate srucā devaṃ ghṛtaścutā / agniṃ havyāya voḍhave // agnimagniṃ havīmabhiḥ sadā havanta viśpatim / havyavāhaṃ purupriyam // agne pāvaka rociṣā sa naḥ pāvaka dīdivo 'gniḥ śucivratatama ud agne śucayas tava // sa havyavāḍ amartya uśig dūtaś canohitaḥ / agnir dhiyā samṛṇvati // agniṃ stomena bodhaya samidhāno amartyam / havyā deveṣu no dadhat // kim it te viṣṇo paricakṣyaṃ bhūt pra yad vavakṣe śipiviṣṭo asmi / mā varpo asmad apagūha etad yad anyarūpaḥ samithe babhūtha // pra tat te adya śipiviṣṭa nāmāryaḥ śaṃsāmi vayunāni vidvān / taṃ tvā gṛṇāmi tavasam atavyān kṣayantam asya rajasaḥ parāke // sutrāmāṇaṃ pṛthivīṃ dyām anehasaṃ suśarmāṇam aditiṃ supraṇītim / daivīṃ nāvaṃ svaritrām anāgasam asravantīm āruhemā svastaye // mahīm ū ṣu mātaraṃ suvratānām ṛtasya patnīm avase huvema / tuvikṣatrām ajarantīm urūcīṃ suśarmāṇam aditiṃ supraṇītim // agnīṣomā savedasā sahūtī vanataṃ giraḥ / saṃ devatrā babhūvathuḥ // yuvam etāni divi rocanāny agniś ca soma sakratū adhattam / yuvaṃ sindhūṃr abhiśaster avadyād agnīṣomā amuñcataṃ gṛbhītān
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.