ये त्व् एवंजातीयकान् अप्य् अप्रयोजकान् हेतून् प्रयुञ्जते, ते सुलभैः प्रतिहेत्वादिदोषैश् चिरं भ्राम्यन्ति। शक्यते हि प्रतिहेतुर् दर्शयितुं, दैक्षपशुहिंसा धर्मः विहितत्वाद् अग्निहोत्रादिवद् इति। प्रयोजके हि हेताव् एवंजातीयका दोषा नास्पदं लभन्ते। अप्रयोजके तु सुलभा एव। तद् एतद् आह -- ये त्व् इति। विस्रब्धम् इति क्रियाविशेषणम्। यथा विश्वासो भवति तथा प्रयुञ्जत इत्य् अर्थः
ye tv evaṃjātīyakān apy aprayojakān hetūn prayuñjate, te sulabhaiḥ pratihetvādidoṣaiś ciraṃ bhrāmyanti. śakyate hi pratihetur darśayituṃ, daikṣapaśuhiṃsā dharmaḥ vihitatvād agnihotrādivad iti. prayojake hi hetāv evaṃjātīyakā doṣā nāspadaṃ labhante. aprayojake tu sulabhā eva. tad etad āha -- ye tv iti. visrabdham iti kriyāviśeṣaṇam. yathā viśvāso bhavati tathā prayuñjata ity arthaḥ
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.