तत्रार्थापत्तितः पूर्वं दृष्टेयम् इति गम्यते । नैव हि प्रागदृष्टे ऽर्थे प्रत्यभिज्ञानसम्भवः ॥ इति। ननु न विशेषः न सामान्यं निर्विकल्पकेनानुभूयत इत्य् उक्तम्। कथम् इदानीं द्व्यात्मकस्यापि ग्रहणम् इत्य् उच्यत इत्य् अत आह -- लक्षणाख्येयम् इति। अयम् अर्थः -- लक्षणाख्येयम् इदं निर्विकल्पकस्य रूपं सामान्यविशेषात्मकं वस्तु निर्विकल्पकेन विषयीक्रियत इति। तच् च निर्विकल्पकलक्षणकारैर् एव परीक्षकैर् आख्यायते। प्रमाता तु सामान्यम् इदं विशेषो ऽयम् इति च विवेकविधुरम् इदम् इति संमुग्धरूपम् एव वस्तूपलभते। शुद्धम् इति। अनुवृत्तिव्यावृत्तिपरामर्शरहितं गृह्यत इत्य् अर्थः। शुद्धवस्तुजम् इत्य् अत्रापि शुद्धशब्दस्यायम् एवार्थो द्रष्टव्यः
tatrārthāpattitaḥ pūrvaṃ dṛṣṭeyam iti gamyate | naiva hi prāgadṛṣṭe 'rthe pratyabhijñānasambhavaḥ || iti. nanu na viśeṣaḥ na sāmānyaṃ nirvikalpakenānubhūyata ity uktam. katham idānīṃ dvyātmakasyāpi grahaṇam ity ucyata ity ata āha -- lakṣaṇākhyeyam iti. ayam arthaḥ -- lakṣaṇākhyeyam idaṃ nirvikalpakasya rūpaṃ sāmānyaviśeṣātmakaṃ vastu nirvikalpakena viṣayīkriyata iti. tac ca nirvikalpakalakṣaṇakārair eva parīkṣakair ākhyāyate. pramātā tu sāmānyam idaṃ viśeṣo 'yam iti ca vivekavidhuram idam iti saṃmugdharūpam eva vastūpalabhate. śuddham iti. anuvṛttivyāvṛttiparāmarśarahitaṃ gṛhyata ity arthaḥ. śuddhavastujam ity atrāpi śuddhaśabdasyāyam evārtho draṣṭavyaḥ
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.