Rupa Gosvamin: Ujjvalanilamani 4

अथ श्री-राधा-प्रकरणम् तत्रापि सर्वथा श्रेष्ठे राधा-चन्द्रावलीत्य् उभे । यूथयोस् तु ययोः सन्ति कोटि-सङ्ख्या मृगीदृशः

atha śrī-rādhā-prakaraṇam tatrāpi sarvathā śreṣṭhe rādhā-candrāvalīty ubhe | yūthayos tu yayoḥ santi koṭi-saṅkhyā mṛgīdṛśaḥ

Sanskrit only: no published translation is held for this verse.

अभूद् आकुलितो रासः प्रमदा-शत-कोटिभिः । पुलिने यामुने तस्मिन्न् इत्य् एषागमिकी प्रथा

abhūd ākulito rāsaḥ pramadā-śata-koṭibhiḥ | puline yāmune tasminn ity eṣāgamikī prathā

Sanskrit only: no published translation is held for this verse.

तयोर् अप्य् उभयोर् मध्ये राधिका सर्वथाधिका । महा-भाव-स्वरूपेयं गुणैर् अतिवरीयसी

tayor apy ubhayor madhye rādhikā sarvathādhikā | mahā-bhāva-svarūpeyaṃ guṇair ativarīyasī

Sanskrit only: no published translation is held for this verse.

गोपालोत्तर-तापन्यां यद् गान्धर्वेति विश्रुता । राधेत्य् ऋक्-परिशिष्टे च माधवेन सहोदिता । अतस् तदीय-माहात्म्यं पाद्मे देवर्षिणोदितम्

gopālottara-tāpanyāṃ yad gāndharveti viśrutā | rādhety ṛk-pariśiṣṭe ca mādhavena sahoditā | atas tadīya-māhātmyaṃ pādme devarṣiṇoditam

Sanskrit only: no published translation is held for this verse.

तथा हि- यथा राधा प्रिया विष्णोस् तस्याः कुण्डं प्रियं तथा । सर्व-गोपीषु सैवैका विष्णोर् अत्यन्त-वल्लभा

tathā hi- yathā rādhā priyā viṣṇos tasyāḥ kuṇḍaṃ priyaṃ tathā | sarva-gopīṣu saivaikā viṣṇor atyanta-vallabhā

Sanskrit only: no published translation is held for this verse.

ह्लादिनी या महा-शक्तिः सर्व-शक्ति-वरीयसी । तत्-सार-भाव-रूपेयम् इति तन्त्रे प्रतिष्ठिता

hlādinī yā mahā-śaktiḥ sarva-śakti-varīyasī | tat-sāra-bhāva-rūpeyam iti tantre pratiṣṭhitā

Sanskrit only: no published translation is held for this verse.

सुष्ठु-कान्त-स्वरूपेयं सर्वदा वार्षभानवी । धृत-षोडश-शृङ्गारा द्वादशाभरणान्विता

suṣṭhu-kānta-svarūpeyaṃ sarvadā vārṣabhānavī | dhṛta-ṣoḍaśa-śṛṅgārā dvādaśābharaṇānvitā

Sanskrit only: no published translation is held for this verse.

तत्र सुष्ठु-कान्त-स्वरूपा, यथा श्री-कृष्ण-वाक्यम्--- कचास् तव सुकुञ्चिता मुखम् अधीर-दीर्घेक्षणं कठोर-कुच-भाग्-उरः क्रशिम-शालि मध्य-स्थलम् । नते शिरसि दोर्लते करज-रत्न-रम्यौ करौ विधूनयति राधिके त्रि-जगद् एष रुपोत्सवः

tatra suṣṭhu-kānta-svarūpā, yathā śrī-kṛṣṇa-vākyam--- kacās tava sukuñcitā mukham adhīra-dīrghekṣaṇaṃ kaṭhora-kuca-bhāg-uraḥ kraśima-śāli madhya-sthalam | nate śirasi dorlate karaja-ratna-ramyau karau vidhūnayati rādhike tri-jagad eṣa rupotsavaḥ

Sanskrit only: no published translation is held for this verse.

अथ धृत-षोडश-शृङ्गारा- स्नाता नासाग्र-जाग्रन्-मणि-रसित-पटा सूत्रिणी बद्ध-वेणी सोत्तंसा चर्चिताङ्गी कुसुमित-चिकुर स्रग्विणी पद्म-हस्ता । ताम्बूलास्योरु-बिन्दु-स्तवकित-चिबुका कज्जलाक्षी सुचित्रा राधालक्तोज्ज्वलाङ्घ्रिः स्फुरिति तिलकिनी षोडशा-कल्पिनीयम्

atha dhṛta-ṣoḍaśa-śṛṅgārā- snātā nāsāgra-jāgran-maṇi-rasita-paṭā sūtriṇī baddha-veṇī sottaṃsā carcitāṅgī kusumita-cikura sragviṇī padma-hastā | tāmbūlāsyoru-bindu-stavakita-cibukā kajjalākṣī sucitrā rādhālaktojjvalāṅghriḥ sphuriti tilakinī ṣoḍaśā-kalpinīyam

Sanskrit only: no published translation is held for this verse.

अथ द्वादशाभरणाश्रिता- दिव्यश् चूडा-मणीन्द्रः पुरट-विरचिताः कुण्डल-द्वन्द्व-काञ्चि- निष्काश् चक्री-शलाका-युग-वलय-घटाः कण्ठ-भूषोर्मिकाश् च । हारास् तारानुकार भुज-कटक-तुलाकोटयो रत्न-क् प्तास् तुङ्गा पादाङ्गुरीय-च्छविर् इति रविभिर् भूषणैर् भाति राधा ॥ रुन्म् ४।१० ॥। अथ वृन्दावनेश्वर्याः कीर्त्यन्ते प्रवरा गुणाः । मधुरेयं नव-वयाश् चलापाङ्गोज्ज्वल-स्मिता

atha dvādaśābharaṇāśritā- divyaś cūḍā-maṇīndraḥ puraṭa-viracitāḥ kuṇḍala-dvandva-kāñci- niṣkāś cakrī-śalākā-yuga-valaya-ghaṭāḥ kaṇṭha-bhūṣormikāś ca | hārās tārānukāra bhuja-kaṭaka-tulākoṭayo ratna-k ptās tuṅgā pādāṅgurīya-cchavir iti ravibhir bhūṣaṇair bhāti rādhā // RUnm 4.10 //| atha vṛndāvaneśvaryāḥ kīrtyante pravarā guṇāḥ | madhureyaṃ nava-vayāś calāpāṅgojjvala-smitā

Sanskrit only: no published translation is held for this verse.

चारु-सौभाग्य-रेखाढ्या गन्धोन्मादित-माधवा । सङ्गीत-प्रसराभिज्ञा रम्य-वाङ् नर्म-पण्डिता

cāru-saubhāgya-rekhāḍhyā gandhonmādita-mādhavā | saṅgīta-prasarābhijñā ramya-vāṅ narma-paṇḍitā

Sanskrit only: no published translation is held for this verse.

विनीता करुणा-पूर्णा विदग्धा पाटवान्विता । लज्जा-शीला सुमर्यादा धैर्य-गाम्भीर्य-शालिनी

vinītā karuṇā-pūrṇā vidagdhā pāṭavānvitā | lajjā-śīlā sumaryādā dhairya-gāmbhīrya-śālinī

Sanskrit only: no published translation is held for this verse.

सुविलासा महाभाव-परमोत्कर्ष-तर्षिणी । गोकुल-प्रेम-वसतिर् जगच्-छ्रेणी-लसद्-यशाः

suvilāsā mahābhāva-paramotkarṣa-tarṣiṇī | gokula-prema-vasatir jagac-chreṇī-lasad-yaśāḥ

Sanskrit only: no published translation is held for this verse.

गुर्व्-अर्पित-गुरु-स्नेहा सखी-प्रणयिता-वशा । कृष्ण-प्रियावली-मुख्या सन्तताश्रव-केशवा । बहुना किं गुणास् तस्याः सङ्ख्यातीता हरेर् इव

gurv-arpita-guru-snehā sakhī-praṇayitā-vaśā | kṛṣṇa-priyāvalī-mukhyā santatāśrava-keśavā | bahunā kiṃ guṇās tasyāḥ saṅkhyātītā harer iva

Sanskrit only: no published translation is held for this verse.

इत्य् अङ्गोक्ति-मनः-स्थास् ते पर-सम्बन्ध-गास् तथा । गुणा वृन्दावनेश्वर्या इह प्रोक्ताश् चतुर्विधाः

ity aṅgokti-manaḥ-sthās te para-sambandha-gās tathā | guṇā vṛndāvaneśvaryā iha proktāś caturvidhāḥ

Sanskrit only: no published translation is held for this verse.

माधुर्यं चारुता नव्यं वयः कैशोर-मध्यमम् । सौभाग्य-रेखा पादादि-स्थिताश् चन्द्र-कलादयः

mādhuryaṃ cārutā navyaṃ vayaḥ kaiśora-madhyamam | saubhāgya-rekhā pādādi-sthitāś candra-kalādayaḥ

Sanskrit only: no published translation is held for this verse.

साधुमार्गाद् अचलनं मर्यादेत्य् उदितं बुधैः । लज्जाभिजात्य-शीलाद्यैर् धैर्यं दुःख-सहिष्णुता

sādhumārgād acalanaṃ maryādety uditaṃ budhaiḥ | lajjābhijātya-śīlādyair dhairyaṃ duḥkha-sahiṣṇutā

Sanskrit only: no published translation is held for this verse.

व्यक्तत्वाल् लक्षितत्वाच् च नान्येषां लक्षणं कृतम्

vyaktatvāl lakṣitatvāc ca nānyeṣāṃ lakṣaṇaṃ kṛtam

Sanskrit only: no published translation is held for this verse.

तत्र मधुरा, यथा विदग्ध-माधवे (१।३२)- बलाद् अक्ष्णोर् लक्ष्मीः कवलयति नव्यं कुवलयं मुखोल्लासः फुल्लं कमल-वनम् उल्लङ्घयति च । दशां कष्टाम् अष्टा-पदम् अपि नयत्य् आङ्गिक-रुचिर् विचित्रं राधायाः किम् अपि किल रूपं विलसति

tatra madhurā, yathā vidagdha-mādhave (1.32)- balād akṣṇor lakṣmīḥ kavalayati navyaṃ kuvalayaṃ mukhollāsaḥ phullaṃ kamala-vanam ullaṅghayati ca | daśāṃ kaṣṭām aṣṭā-padam api nayaty āṅgika-rucir vicitraṃ rādhāyāḥ kim api kila rūpaṃ vilasati

Sanskrit only: no published translation is held for this verse.

अथ नव-वयाः- श्रोणिः स्यन्दनतां कृशोदरि कुच-द्वन्द्वं क्रमाच् चक्रतां भ्रूश् चाप-श्रियम् ईक्षण-द्वयम् इदं यात्य् आशुगत्वं तव । सैनापत्यम् अतः प्रदाय भुवि ते कामः पशूनां पतिं धुन्वन् जित्वर-मानिनं त्वयि निजं साम्राज्य-भारं न्यधात्

atha nava-vayāḥ- śroṇiḥ syandanatāṃ kṛśodari kuca-dvandvaṃ kramāc cakratāṃ bhrūś cāpa-śriyam īkṣaṇa-dvayam idaṃ yāty āśugatvaṃ tava | saināpatyam ataḥ pradāya bhuvi te kāmaḥ paśūnāṃ patiṃ dhunvan jitvara-māninaṃ tvayi nijaṃ sāmrājya-bhāraṃ nyadhāt

Sanskrit only: no published translation is held for this verse.

अथ चपलापाङ्गी- तडिद्-अतिचलतां ते किं दृगन्ताद् अपाठीद् विधु-मुखि तडितो वा किं तवायं दृगन्तः । ध्रुवम् इह गुरुताभूत् त्वद्-दृग्-अन्तस्य राधे वरम् अतिजविनां मे येन जिग्ये मनोऽपि

atha capalāpāṅgī- taḍid-aticalatāṃ te kiṃ dṛgantād apāṭhīd vidhu-mukhi taḍito vā kiṃ tavāyaṃ dṛgantaḥ | dhruvam iha gurutābhūt tvad-dṛg-antasya rādhe varam atijavināṃ me yena jigye mano'pi

Sanskrit only: no published translation is held for this verse.

अथ उज्ज्वल-स्मिता- तव वदन-विधौ विधौत-मध्यां स्मित-सुधयाधर-लेखिकाम् उदीक्ष्य । सखि लघुर् अघभिच्-चकोर-वर्यः प्रमद-मदोद्धुर-बुद्धिर् उज्जिहीते

atha ujjvala-smitā- tava vadana-vidhau vidhauta-madhyāṃ smita-sudhayādhara-lekhikām udīkṣya | sakhi laghur aghabhic-cakora-varyaḥ pramada-madoddhura-buddhir ujjihīte

Sanskrit only: no published translation is held for this verse.

अथ चारु-सौभाग्य-रेखाढ्या- अघहर भज तुष्टिं पश्य यच्चन्द्रलेखा- वलयकुसुमवल्लीकुण्डलाकारभाग्भिः । अभिदधति निलीनामत्र सौभाग्यरेखा- विततिभिरनुविद्धाः सुष्ठु राधां पदाङ्काः

atha cāru-saubhāgya-rekhāḍhyā- aghahara bhaja tuṣṭiṃ paśya yaccandralekhā- valayakusumavallīkuṇḍalākārabhāgbhiḥ | abhidadhati nilīnāmatra saubhāgyarekhā- vitatibhiranuviddhāḥ suṣṭhu rādhāṃ padāṅkāḥ

Sanskrit only: no published translation is held for this verse.

अथ गन्धोन्मादित-माधवा- वल्ली-मण्डल-पल्लवालिभिर् इतः सङ्गोपनायात्मनो मा वृन्दावन-चक्रवर्तिनि कृथा यत्नं मुधा माधवि । भ्राम्यद्भिः स्व-विरोधिभिः परिमलैर् उन्मादनैः सूचितां कृष्णस् तां भ्रमाधिपः सखि धुवन् धूर्तो ध्रुवं धास्यति

atha gandhonmādita-mādhavā- vallī-maṇḍala-pallavālibhir itaḥ saṅgopanāyātmano mā vṛndāvana-cakravartini kṛthā yatnaṃ mudhā mādhavi | bhrāmyadbhiḥ sva-virodhibhiḥ parimalair unmādanaiḥ sūcitāṃ kṛṣṇas tāṃ bhramādhipaḥ sakhi dhuvan dhūrto dhruvaṃ dhāsyati

Sanskrit only: no published translation is held for this verse.

अथ सङ्गीत-प्रसराभिज्ञा- कृष्ण-सार-हर-पञ्चम-स्वरे मुञ्च गीत-कुतुकानि राधिके । प्रेक्षतेऽत्र हरिणानुधावितां त्वां न यावद् अतिरोषणः पतिः

atha saṅgīta-prasarābhijñā- kṛṣṇa-sāra-hara-pañcama-svare muñca gīta-kutukāni rādhike | prekṣate'tra hariṇānudhāvitāṃ tvāṃ na yāvad atiroṣaṇaḥ patiḥ

Sanskrit only: no published translation is held for this verse.

अथ रम्य-वाक्- सुवदने वदने तव रधिके स्फुरति केयम् इहाक्षर-माधुरी । विकलतां लभते किल कोकिलः सखि ययाद्य सुधापि मुधार्थताम्

atha ramya-vāk- suvadane vadane tava radhike sphurati keyam ihākṣara-mādhurī | vikalatāṃ labhate kila kokilaḥ sakhi yayādya sudhāpi mudhārthatām

Sanskrit only: no published translation is held for this verse.

अथ नर्म-पण्डिता- वंश्यास् त्वम् उपाध्यायः किम् उपाध्यायी तवात्र वंशी वा । कुल-युवति-धर्म-हरणाद् अस्ति ययोर् नापरं कर्म

atha narma-paṇḍitā- vaṃśyās tvam upādhyāyaḥ kim upādhyāyī tavātra vaṃśī vā | kula-yuvati-dharma-haraṇād asti yayor nāparaṃ karma

Sanskrit only: no published translation is held for this verse.

यथा वा- देव प्रसीद वृष-वर्धन पुण्य-कीर्ते साध्वी-गण-स्तन-शिवार्चन-नित्य-पूत । निर्मञ्छनं तव भजे रवि-पूजनाय स्नातास्मि हन्त मम न स्पृश न स्पृशाङ्गम्

yathā vā- deva prasīda vṛṣa-vardhana puṇya-kīrte sādhvī-gaṇa-stana-śivārcana-nitya-pūta | nirmañchanaṃ tava bhaje ravi-pūjanāya snātāsmi hanta mama na spṛśa na spṛśāṅgam

Sanskrit only: no published translation is held for this verse.

अथ विनीता- अपि गोकुले प्रसिद्धा भ्रू-भ्रमिभिः परिजनैर् निषिद्धापि । पीठं मुमोच राधा भद्रिकाम् अपि दूरतः प्रेक्ष्य

atha vinītā- api gokule prasiddhā bhrū-bhramibhiḥ parijanair niṣiddhāpi | pīṭhaṃ mumoca rādhā bhadrikām api dūrataḥ prekṣya

Sanskrit only: no published translation is held for this verse.

यथा वा, विदग्ध-माधवे (५।१५)- भूयो भूयः कलि-विलसितैः सापराधापि राधा श्लाघ्येनाहं यद् अघरिपुणा बाढम् अङ्गीकृतास्मि । तत्र क्षामोदरि किम् अपरं कारणं वः सखीनां दत्तामोदां प्रगुण-करुणा-मञ्जरीम् अन्तरेण

yathā vā, vidagdha-mādhave (5.15)- bhūyo bhūyaḥ kali-vilasitaiḥ sāparādhāpi rādhā ślāghyenāhaṃ yad agharipuṇā bāḍham aṅgīkṛtāsmi | tatra kṣāmodari kim aparaṃ kāraṇaṃ vaḥ sakhīnāṃ dattāmodāṃ praguṇa-karuṇā-mañjarīm antareṇa

Sanskrit only: no published translation is held for this verse.

अथ करुणा-पूर्णा- तार्ण-सूचि-शिखयापि तर्णकं विद्ध-वक्त्रम् अवलोक्य सास्रया । लिप्यते क्षतम् अवाप्त-बाधया कुङ्कुमेन कृपयास्य राधया

atha karuṇā-pūrṇā- tārṇa-sūci-śikhayāpi tarṇakaṃ viddha-vaktram avalokya sāsrayā | lipyate kṣatam avāpta-bādhayā kuṅkumena kṛpayāsya rādhayā

Sanskrit only: no published translation is held for this verse.

अथ विदग्धा- आचार्या धातु-चित्रे पचन-विरचना-चातुरी-चारु-चित्ता वाग्-युद्धे मुग्धयन्ती गुरुम् अपि च गिरां पण्डिता माल्य-गुम्फे । पाठे शारी-शुकानां पटुर् अजितम् अपि द्यूत-केलिषु जिष्णुर् विद्या-विद्योति-बुद्धिः स्फुरति रति-कला-शालिनी राधिकेयम्

atha vidagdhā- ācāryā dhātu-citre pacana-viracanā-cāturī-cāru-cittā vāg-yuddhe mugdhayantī gurum api ca girāṃ paṇḍitā mālya-gumphe | pāṭhe śārī-śukānāṃ paṭur ajitam api dyūta-keliṣu jiṣṇur vidyā-vidyoti-buddhiḥ sphurati rati-kalā-śālinī rādhikeyam

Sanskrit only: no published translation is held for this verse.

अथ पाटवान्विता, यथा विदग्ध-माधवे (३।३)- छिन्नः प्रियो मणिसरः सखि मौक्तिकानि वृत्तान्य् अहं विचिनुयाम् इति कैतवेन । मुग्धं विवृत्य मयि हन्त दृगन्त-भङ्गीं राधा गुरोर् अपि पुरः प्रणयाद् व्यतानीत्

atha pāṭavānvitā, yathā vidagdha-mādhave (3.3)- chinnaḥ priyo maṇisaraḥ sakhi mauktikāni vṛttāny ahaṃ vicinuyām iti kaitavena | mugdhaṃ vivṛtya mayi hanta dṛganta-bhaṅgīṃ rādhā guror api puraḥ praṇayād vyatānīt

Sanskrit only: no published translation is held for this verse.

अथ लज्जा-शीला- व्रज-नरपति-सूनुर् दुल्रभालोकनोऽयं स्फुरति रहसि ताम्यत्य् एष तर्षाज् जनोऽपि । विरम जननि लज्जे किञ्चिद् उद्घाट्य वक्त्रं निमिषम् इह मनाग् अप्य् अक्षि-कोणं क्षिपामि

atha lajjā-śīlā- vraja-narapati-sūnur dulrabhālokano'yaṃ sphurati rahasi tāmyaty eṣa tarṣāj jano'pi | virama janani lajje kiñcid udghāṭya vaktraṃ nimiṣam iha manāg apy akṣi-koṇaṃ kṣipāmi

Sanskrit only: no published translation is held for this verse.

अथ सुमर्यादा- प्राणान् अकृताहारा सखि राधा-चातकी वरं त्यजति । न तु कृष्ण-मुदिर-मुक्ताद् अमृताद् वृत्तिं भजेद् अपराम्

atha sumaryādā- prāṇān akṛtāhārā sakhi rādhā-cātakī varaṃ tyajati | na tu kṛṣṇa-mudira-muktād amṛtād vṛttiṃ bhajed aparām

Sanskrit only: no published translation is held for this verse.

यथा वा- आहूयमाना व्रजनाथयास्मि युक्तोऽभिसारः सखि नाधुना मे । न तादृशीनां हि गुरूत्तमानाम् आज्ञास्व् अवज्ञा वलते शिवाय

yathā vā- āhūyamānā vrajanāthayāsmi yukto'bhisāraḥ sakhi nādhunā me | na tādṛśīnāṃ hi gurūttamānām ājñāsv avajñā valate śivāya

Sanskrit only: no published translation is held for this verse.

यथा वा- पूर्णाशीः पूर्णिमासाव् अनवहिततया या त्वयास्यै वितीर्णा वष्टि त्वाम् एव तन्वन्न् अखिल-मधुरिमोत्सेकम् अस्यां मुकुन्दः । दिष्ट्या पर्वोदगात् ते स्वयम् अभिसरणे चित्तम् आधत्स्व वत्से युक्त्याप्य् उक्ता मयेति द्युमणि-सख-सुता प्राहिणोद् एव चित्राम्

yathā vā- pūrṇāśīḥ pūrṇimāsāv anavahitatayā yā tvayāsyai vitīrṇā vaṣṭi tvām eva tanvann akhila-madhurimotsekam asyāṃ mukundaḥ | diṣṭyā parvodagāt te svayam abhisaraṇe cittam ādhatsva vatse yuktyāpy uktā mayeti dyumaṇi-sakha-sutā prāhiṇod eva citrām

Sanskrit only: no published translation is held for this verse.

अथ धैर्य-शालिनी- तीव्रस् तर्जति भिन्न-धीर् गृह-पतिश् छद्म-ज्ञया पद्मया हारं हारयति हरि-प्रणिहितं कीशेन भर्तुः स्वसा । मल्लीं लुम्पति कृष्ण-काम्य-कुसुमां शैव्या प्रिया वर्करी राधा पश्य तथाप्य् अतीव सहना तुष्णीम् असौ तिष्ठति

atha dhairya-śālinī- tīvras tarjati bhinna-dhīr gṛha-patiś chadma-jñayā padmayā hāraṃ hārayati hari-praṇihitaṃ kīśena bhartuḥ svasā | mallīṃ lumpati kṛṣṇa-kāmya-kusumāṃ śaivyā priyā varkarī rādhā paśya tathāpy atīva sahanā tuṣṇīm asau tiṣṭhati

Sanskrit only: no published translation is held for this verse.

अथ गाम्भीर्य-शालिनी- कलहान्तरितापदे स्थितिं सखि धीराद्य गतापि राधिका । बहिर् उद्भट-मान-लक्षणा सुदुरूहा ललिता धियाप्य् अभूत्

atha gāmbhīrya-śālinī- kalahāntaritāpade sthitiṃ sakhi dhīrādya gatāpi rādhikā | bahir udbhaṭa-māna-lakṣaṇā sudurūhā lalitā dhiyāpy abhūt

Sanskrit only: no published translation is held for this verse.

अथ सुविलासा- तिर्यक्-क्षिप्त-चलद्-दृगञ्चल-रुचिर् लास्योल्लसद्-भ्रू-लता कुन्दाभ-स्मित-चन्दिकोज्ज्वल-मुखी गण्डोच्छलत्-कुण्डला । कन्दर्पागम-सिद्ध-मन्त्र-गहनाम् अर्धं दुहाना गिरं हारिण्य् अद्य हरेर् जहार हृदयं राधा विलासोर्मिभिः

atha suvilāsā- tiryak-kṣipta-calad-dṛgañcala-rucir lāsyollasad-bhrū-latā kundābha-smita-candikojjvala-mukhī gaṇḍocchalat-kuṇḍalā | kandarpāgama-siddha-mantra-gahanām ardhaṃ duhānā giraṃ hāriṇy adya harer jahāra hṛdayaṃ rādhā vilāsormibhiḥ

Sanskrit only: no published translation is held for this verse.

अथ महा-भाव-परमोत्कर्ष-तर्षिणी- अश्रूणाम् अतिवृष्टिभिर् द्विगुणयन्त्य् अर्कात्मजा-निर्झरं ज्योत्स्नी-स्यन्दि-विधूपल-प्रतिकृति-च्छायं वपुर् बिभ्रती । कण्ठान्तस् त्रुटद्-अक्षराद्य-पुलकैर् लब्धा कदम्बाकृतिं राधा वेणु-धर प्रवात-कदली-तुल्या क्वचिद् वर्तते

atha mahā-bhāva-paramotkarṣa-tarṣiṇī- aśrūṇām ativṛṣṭibhir dviguṇayanty arkātmajā-nirjharaṃ jyotsnī-syandi-vidhūpala-pratikṛti-cchāyaṃ vapur bibhratī | kaṇṭhāntas truṭad-akṣarādya-pulakair labdhā kadambākṛtiṃ rādhā veṇu-dhara pravāta-kadalī-tulyā kvacid vartate

Sanskrit only: no published translation is held for this verse.

अथ गोकुल-प्रेम-वसतिः- प्रेम-सन्ततिभिर् एव वेधसा नु वृषभानु-नन्दिनी । यादृशां पदम् इता मनांसि नः स्नेहयत्य् अखिल-गोष्ठ-वासिनाम्

atha gokula-prema-vasatiḥ- prema-santatibhir eva vedhasā nu vṛṣabhānu-nandinī | yādṛśāṃ padam itā manāṃsi naḥ snehayaty akhila-goṣṭha-vāsinām

Sanskrit only: no published translation is held for this verse.

अथ जगच्-छ्रेणी-लसद्-यशाः- उत्फुल्लं किल कुर्वती कुवलयं देवेन्द्र-पत्नी-श्रुतौ कुन्दं निक्षिपती विरिञ्ची-गृहिणी-रोमौषधी-हर्षिणी । कर्णोत्तंस-सुधांशु-रत्न-सकलं विद्राव्य भद्राङ्गि ते लक्ष्मीम् अप्य् अधुना चकार चकितां राधे यशः-कौमुदी

atha jagac-chreṇī-lasad-yaśāḥ- utphullaṃ kila kurvatī kuvalayaṃ devendra-patnī-śrutau kundaṃ nikṣipatī viriñcī-gṛhiṇī-romauṣadhī-harṣiṇī | karṇottaṃsa-sudhāṃśu-ratna-sakalaṃ vidrāvya bhadrāṅgi te lakṣmīm apy adhunā cakāra cakitāṃ rādhe yaśaḥ-kaumudī

Sanskrit only: no published translation is held for this verse.

अथ गुर्व्-अर्पित-गुरु-स्नेहा- न सुतासि कीर्तिदायाः किन्तु ममैवेति तथ्यम् आख्यामि । प्राणिमि वीक्ष्य मुखस् ते कृष्णस्येवेति किं त्रपसे

atha gurv-arpita-guru-snehā- na sutāsi kīrtidāyāḥ kintu mamaiveti tathyam ākhyāmi | prāṇimi vīkṣya mukhas te kṛṣṇasyeveti kiṃ trapase

Sanskrit only: no published translation is held for this verse.

अथ सखी-प्रणयाधीना- उपदिश सखि वृन्दे वल्लवेन्द्रस्य सूनुं किम् अयम् इह सखीनां माम् अधीनां दुनोति । अपसरतु सशङ्कं मन्दिरान् मानिनीनां कलयति ललितायाः किं न शौटीर्य-धाटीम्

atha sakhī-praṇayādhīnā- upadiśa sakhi vṛnde vallavendrasya sūnuṃ kim ayam iha sakhīnāṃ mām adhīnāṃ dunoti | apasaratu saśaṅkaṃ mandirān māninīnāṃ kalayati lalitāyāḥ kiṃ na śauṭīrya-dhāṭīm

Sanskrit only: no published translation is held for this verse.

अथ कृष्ण-प्रियावली-मुख्या, यथा ललित-माधवे (१०।१०)- सन्तु भ्राम्यद्-अपाड्ग-भङ्गि-खुरली-खेलाभुवः सुभ्रुवः स्वस्ति स्यान् मदिरेक्षणे क्षणम् अपि त्वाम् अन्तरा मे कुतः । ताराणां निकुरुम्बकेन वृतया श्लिष्टेऽपि सोमाभया नाकाशे वृषभानुजां श्रियम् ऋते निष्पद्यते स्वश्-छटा

atha kṛṣṇa-priyāvalī-mukhyā, yathā lalita-mādhave (10.10)- santu bhrāmyad-apāḍga-bhaṅgi-khuralī-khelābhuvaḥ subhruvaḥ svasti syān madirekṣaṇe kṣaṇam api tvām antarā me kutaḥ | tārāṇāṃ nikurumbakena vṛtayā śliṣṭe'pi somābhayā nākāśe vṛṣabhānujāṃ śriyam ṛte niṣpadyate svaś-chaṭā

Sanskrit only: no published translation is held for this verse.

अथ सन्तताश्रव-केशवा- षड्-अङ्घ्रिभिर् अर्दितान् कुसुम-सञ्चयान् आचिनोद् अखण्डम् अपि राधिके बहु-शिखण्डकं त्वद्-गिरा । अमुञ्च नव-पल्लव-व्रजम् उदञ्चद् अर्कोज्ज्वलं करोतु वशगो जनः किम् अयम् अन्यद्-आज्ञापय

atha santatāśrava-keśavā- ṣaḍ-aṅghribhir arditān kusuma-sañcayān ācinod akhaṇḍam api rādhike bahu-śikhaṇḍakaṃ tvad-girā | amuñca nava-pallava-vrajam udañcad arkojjvalaṃ karotu vaśago janaḥ kim ayam anyad-ājñāpaya

Sanskrit only: no published translation is held for this verse.

यस्याः सर्वोत्तमे यूथे सर्व-सद्-गुण-मण्डिताः । समन्तान् माधवाकर्षि-विभ्रमाः सन्ति सुभ्रुवः

yasyāḥ sarvottame yūthe sarva-sad-guṇa-maṇḍitāḥ | samantān mādhavākarṣi-vibhramāḥ santi subhruvaḥ

Sanskrit only: no published translation is held for this verse.

तास् तु वृन्दावनेश्वर्याः सख्यः पञ्च-विधा मताः । सख्यश् च नित्य-सख्यश् च प्राण-सख्यश् च काश्चन । प्रिय-सख्यश् च परम-प्रेष्ठ-सख्यश् च विश्रुताः

tās tu vṛndāvaneśvaryāḥ sakhyaḥ pañca-vidhā matāḥ | sakhyaś ca nitya-sakhyaś ca prāṇa-sakhyaś ca kāścana | priya-sakhyaś ca parama-preṣṭha-sakhyaś ca viśrutāḥ

Sanskrit only: no published translation is held for this verse.

सख्यः कुसुमिका-विन्ध्या-धनिष्ठाद्याः प्रकीर्तिताः । नित्य-सख्यश् च कस्तूरी-मणि-मञ्जरिकादयः

sakhyaḥ kusumikā-vindhyā-dhaniṣṭhādyāḥ prakīrtitāḥ | nitya-sakhyaś ca kastūrī-maṇi-mañjarikādayaḥ

Sanskrit only: no published translation is held for this verse.

प्राण-सख्यः शशिमुखी-वासन्ती-लासिकादयः । गता वृन्दावनेश्वर्याः प्रायेणेमाः स्वरूपताम्

prāṇa-sakhyaḥ śaśimukhī-vāsantī-lāsikādayaḥ | gatā vṛndāvaneśvaryāḥ prāyeṇemāḥ svarūpatām

Sanskrit only: no published translation is held for this verse.

प्रिय-सख्यः कुरङ्गाक्षी सुमध्या मदनालसा । कमला माधुरी मञ्जु-केशी कन्दर्प-सुन्दरी । माधवी मालती काम-लता शशिकलादयः

priya-sakhyaḥ kuraṅgākṣī sumadhyā madanālasā | kamalā mādhurī mañju-keśī kandarpa-sundarī | mādhavī mālatī kāma-latā śaśikalādayaḥ

Sanskrit only: no published translation is held for this verse.

परम-प्रेष्ठ-सख्यस् तु ललिता स-विशाखिका । स-चित्रा चम्पकलता तुङ्गविद्येन्दुलेखिका । रङ्गदेवी सुदेवी चेत्यष्टौ सर्व-गणाग्रिमाः

parama-preṣṭha-sakhyas tu lalitā sa-viśākhikā | sa-citrā campakalatā tuṅgavidyendulekhikā | raṅgadevī sudevī cetyaṣṭau sarva-gaṇāgrimāḥ

Sanskrit only: no published translation is held for this verse.

आसां सुष्ठु द्वयोर् एव प्रेम्णः परम-काष्ठया । क्वचिज् जातु क्वचिज् जातु तद्-आधिक्यम् इवेक्षते

āsāṃ suṣṭhu dvayor eva premṇaḥ parama-kāṣṭhayā | kvacij jātu kvacij jātu tad-ādhikyam ivekṣate

Sanskrit only: no published translation is held for this verse.