Library·Ṛgveda Saṃhitā·7·7.7
प्र वो देवं चित् सहसानम् अग्निम् अश्वं न वाजिनं हिषे नमोभिः । भवा नो दूतो अध्वरस्य विद्वान् त्मना देवेषु विविदे मितद्रुः ॥
pra vo devaṃ cit sahasānam agnim aśvaṃ na vājinaṃ hiṣe namobhiḥ | bhavā no dūto adhvarasya vidvān tmanā deveṣu vivide mitadruḥ ||
I SEND forth even your God, victorious Agni, like a strong courser, with mine adoration. Herald of sacrifice be he who knoweth he hath reached Gods, himself, with measured motion.
Translated by Ralph T. H. Griffith (1896)
आ याह्य् अग्ने पथ्या अनु स्वा मन्द्रो देवानां सख्यं जुषाणः । आ सानु शुष्मैर् नदयन् पृथिव्या जम्भेभिर् विश्वम् उशधग् वनानि ॥
ā yāhy agne pathyā anu svā mandro devānāṃ sakhyaṃ juṣāṇaḥ | ā sānu śuṣmair nadayan pṛthivyā jambhebhir viśvam uśadhag vanāni ||
By paths that are thine own come hither, Agni, joyous, delighting in the Gods' alliance, Making the heights of earth roar with thy fury, burning with eager teeth the woods and forests.
Translated by Ralph T. H. Griffith (1896)
प्राचीनो यज्ञः सुधितं हि बर्हिः प्रीणीते अग्निर् ईळितो न होता । आ मातरा विश्ववारे हुवानो यतो यविष्ठ जज्ञिषे सुशेवः ॥
prācīno yajñaḥ sudhitaṃ hi barhiḥ prīṇīte agnir īḷito na hotā | ā mātarā viśvavāre huvāno yato yaviṣṭha jajñiṣe suśevaḥ ||
The grass is strewn; the sacrifice advances adored as Priest, Agni is made propitious, Invoking both All-boon-bestowing Mothers of whom, Most Youthful! thou wast born to help us.
Translated by Ralph T. H. Griffith (1896)
सद्यो अध्वरे रथिरं जनन्त मानुषासो विचेतसो य एषाम् । विशाम् अधायि विश्पतिर् दुरोणे ऽग्निर् मन्द्रो मधुवचा ऋतावा ॥
sadyo adhvare rathiraṃ jananta mānuṣāso vicetaso ya eṣām | viśām adhāyi viśpatir duroṇe 'gnir mandro madhuvacā ṛtāvā ||
Forthwith the men, the best of these for wisdom, have made him leader in the solemn worship. As Lord in homes of men is Agni stablished, the Holy One, the joyous, sweetly speaking.
Translated by Ralph T. H. Griffith (1896)
असादि वृतो वह्निर् आजगन्वान् अग्निर् ब्रह्मा नृषदने विधर्ता । द्यौश् च यम् पृथिवी वावृधाते आ यं होता यजति विश्ववारम् ॥
asādi vṛto vahnir ājaganvān agnir brahmā nṛṣadane vidhartā | dyauś ca yam pṛthivī vāvṛdhāte ā yaṃ hotā yajati viśvavāram ||
He hath come, chosen bearer, and is seated in man's home, Brahman, Agni, the Supporter, He whom both Heaven and Earth exalt and strengthen whom, Giver of all boons, the Hotar worships.
Translated by Ralph T. H. Griffith (1896)
एते द्युम्नेभिर् विश्वम् आतिरन्त मन्त्रं ये वारं नर्या अतक्षन् । प्र ये विशस् तिरन्त श्रोषमाणा आ ये मे अस्य दीधयन्न् ऋतस्य ॥
ete dyumnebhir viśvam ātiranta mantraṃ ye vāraṃ naryā atakṣan | pra ye viśas tiranta śroṣamāṇā ā ye me asya dīdhayann ṛtasya ||
These have passed all in glory, who, the manly, have wrought with skill the hymn of adoration; Who, listening, have advanced the people's welfare, and set their thoughts on this my holy statute.
Translated by Ralph T. H. Griffith (1896)
नू त्वाम् अग्न ईमहे वसिष्ठा ईशानं सूनो सहसो वसूनाम् । इषं स्तोतृभ्यो मघवद्भ्य आनड् यूयम् पात स्वस्तिभिः सदा नः ॥
nū tvām agna īmahe vasiṣṭhā īśānaṃ sūno sahaso vasūnām | iṣaṃ stotṛbhyo maghavadbhya ānaḍ yūyam pāta svastibhiḥ sadā naḥ ||
We, the Vasisthas, now implore thee, Agni, O Son of Strength, the Lord of wealth and treasure. Thou hast brought food to singers and to nobles. Ye Gods, preserve us evermore with blessings.
Translated by Ralph T. H. Griffith (1896)