प्रजापतिः संभ्रियमाणः । सम्राट्संभृतः । घर्मः प्रवृक्तः । महावीर उद्वासितः । असौ खलु वावैष आदित्यः । यत्प्रवर्ग्यः । स एतानि नामान्यकुरुत । य एवं वेद । विदुरेनं नाम्ना । ब्रह्मवादिनो वदन्ति १ यो वै वसीयाꣳसं यथानाममुपचरति । पुण्यार्तिं वै स तस्मै कामयते । पुण्यार्तिं अस्मै कामयन्ते । य एवं वेद । तस्मादेवं विद्वान् । घर्म इति दिवा चक्षीत । संराडिति नक्तम् । एते वा एतस्य प्रिये तनुवौ । एते अस्य प्रिये नामनी । प्रिययैवैनं तनुवा २ प्रियेण नाम्ना समर्धयति । कीर्तिरस्य पूर्वा गच्छति जनतामायतः । गायत्री देवेभ्योऽपाक्रामत् । तां देवाः प्रवर्ग्येणैवानु व्यभवन् । प्रवर्ग्येणाप्नुवन् । यच्चतुर्विꣳशतिः कृत्वः प्रवर्ग्यं प्रवृणक्ति । गायत्रीमेव तदनु वि भवति । गायत्रीमाप्नोति । पूर्वास्य जनं यतः कीर्तिर्गच्छति । वैश्वदेवः सꣳसन्नः ३ वसवः प्रवृक्तः । सोमोऽभिकीर्यमाणः । आश्विनः पयस्यानीयमाने । मारुतः क्वथन् । पौष्ण उदन्तःसारस्वतो विष्यन्दमानः । मैत्रः शरोगृहीतः । तेज उद्यतो वायुः । ह्रियमाणः प्रजापतिः । हूयमानो वाग्घृतः ४ असौ खलु वावैष आदित्यः । यत्प्रवर्ग्यः । स एतानि नामान्यकुरुत । य एवं वेद । विदुरेनं नाम्ना । ब्रह्मवादिनो वदन्ति । यन्मृन्मयमाहुतिं नाश्नुतेऽथ । कस्मादेषोऽश्नुत इति । वागेष इति ब्रूयात् । वाच्येव वाचं दधाति ५ तस्मादश्नुते । प्रजापतिर्वा एष द्वादशधा विहितः । यत्प्रवर्ग्यः । यत्प्रागवकाशेभ्यः । तेन प्रजा असृजत । अवकाशैर्देवासुरानसृजत । यदूर्ध्वमवकाशेभ्यः । तेनान्नमसृजत । अन्नं प्रजापतिः । प्रजापतिर्वावैषः ६ वदन्ति तनुवा सꣳसन्नो हूयमानो वाग्घुतो दधात्येषः
prajāpatiḥ saṃbhriyamāṇaḥ | samrāṭsaṃbhṛtaḥ | gharmaḥ pravṛktaḥ | mahāvīra udvāsitaḥ | asau khalu vāvaiṣa ādityaḥ | yatpravargyaḥ | sa etāni nāmānyakuruta | ya evaṃ veda | vidurenaṃ nāmnā | brahmavādino vadanti 1 yo vai vasīyām̐saṃ yathānāmamupacarati | puṇyārtiṃ vai sa tasmai kāmayate | puṇyārtiṃ asmai kāmayante | ya evaṃ veda | tasmādevaṃ vidvān | gharma iti divā cakṣīta | saṃrāḍiti naktam | ete vā etasya priye tanuvau | ete asya priye nāmanī | priyayaivainaṃ tanuvā 2 priyeṇa nāmnā samardhayati | kīrtirasya pūrvā gacchati janatāmāyataḥ | gāyatrī devebhyo'pākrāmat | tāṃ devāḥ pravargyeṇaivānu vyabhavan | pravargyeṇāpnuvan | yaccaturvim̐śatiḥ kṛtvaḥ pravargyaṃ pravṛṇakti | gāyatrīmeva tadanu vi bhavati | gāyatrīmāpnoti | pūrvāsya janaṃ yataḥ kīrtirgacchati | vaiśvadevaḥ sam̐sannaḥ 3 vasavaḥ pravṛktaḥ | somo'bhikīryamāṇaḥ | āśvinaḥ payasyānīyamāne | mārutaḥ kvathan | pauṣṇa udantaḥsārasvato viṣyandamānaḥ | maitraḥ śarogṛhītaḥ | teja udyato vāyuḥ | hriyamāṇaḥ prajāpatiḥ | hūyamāno vāgghṛtaḥ 4 asau khalu vāvaiṣa ādityaḥ | yatpravargyaḥ | sa etāni nāmānyakuruta | ya evaṃ veda | vidurenaṃ nāmnā | brahmavādino vadanti | yanmṛnmayamāhutiṃ nāśnute'tha | kasmādeṣo'śnuta iti | vāgeṣa iti brūyāt | vācyeva vācaṃ dadhāti 5 tasmādaśnute | prajāpatirvā eṣa dvādaśadhā vihitaḥ | yatpravargyaḥ | yatprāgavakāśebhyaḥ | tena prajā asṛjata | avakāśairdevāsurānasṛjata | yadūrdhvamavakāśebhyaḥ | tenānnamasṛjata | annaṃ prajāpatiḥ | prajāpatirvāvaiṣaḥ 6 vadanti tanuvā sam̐sanno hūyamāno vāgghuto dadhātyeṣaḥ
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.