प्र केतुना बृहता भात्यग्निराविर्विश्वानि वृषभो रोरवीति । दिवश्चिदन्तादुप मामुदानडपामुपस्ये महिषो ववर्ध, इति । इदं त एकं पर ऊ त एकं तृतीयेन ज्योतिषा संविशस्व । संवेशनस्तनुवै चारुरेधि प्रियो देवानां परमे सधस्थे, इति । नाके सुपर्णमुप यत्पतन्तꣳ हृदा वेनन्तो अभ्यचक्षत त्वा । हिरण्यपक्षं वरुणस्य दूतं यमस्य योनौ शकुनं भुरण्युम्, इति । अतिद्रव सारमेयौ श्वानौ चतुरक्षौ शबलौ साधुना पथा । अथा पितॄन्त्सुविदत्राꣳ अपीहि यमेन ये सधमादं मदन्ति, इति । यौ ते श्वानौ यम रक्षितारौ चतुरक्षौ पथिरक्षी नृचक्षसा । ताभ्याꣳ राजन्परिदेह्येनꣳ स्वस्ति चास्मा अनमीवं च धेहि ( १), इति । उरुणसावसुतृपावुलुंबलौ यमस्य दूती चरतोऽवशाꣳ अनु । तावस्मभ्यं दृशये सूर्याय पुनर्दत्तावसुमद्येह भद्रम्, इति । सोम एकेभ्यः पवते घृतमेक उपासते । येभ्यो मधु प्रधावति ताꣳश्चिदेवापि गच्छतात्, इति । ये युध्यन्ते प्रधनेषु शूरासो ये तनुत्यजः । ये वा सहस्रदक्षिणास्ताꣳश्चिदेवापि गच्छतात्, इति । तपसा ये अनाधृष्यास्तपसा ये सुवर्गताः । तपो ये चक्रिरे महत्ताꣳश्चिदेवापि गच्छतात्, इति । अश्मन्वती रेवतीः सꣳरभध्वमुत्तिष्ठत प्रतरता सखायः । अत्रा जहाम ये असन्नशेवाः शिवान्वयमभि वाजानुत्तरेम ( २), इति । यद्वै देवस्य सवितुः पवित्रꣳ सहस्रधारं विततमन्तरिक्षे । येनापुनादिन्द्रमनार्तमार्त्यै तेनाहं माꣳ सर्वतनुं पुनामि । या राष्ट्रात्पन्नादपयन्ति शाखा अभिमृता नृपतिमिच्छमानाः । धातुस्ताः सर्वाः पवनेन पूताः प्रजयाऽस्मान्रय्या वर्चसा सꣳसृजाथ । उद्वयं तमसस्परिपश्यन्तो ज्योतिरुत्तरम् । देवं देवत्रा सूर्यमगन्म ज्योतिरुत्तमम्, इति । धाता पुनातु सविता पुनातु । अग्नेस्तेजसा सूर्यस्य वर्चसा ( ३) ।। धेह्युत्तरेमाष्टौ च ।।
pra ketunā bṛhatā bhātyagnirāvirviśvāni vṛṣabho roravīti | divaścidantādupa māmudānaḍapāmupasye mahiṣo vavardha, iti | idaṃ ta ekaṃ para ū ta ekaṃ tṛtīyena jyotiṣā saṃviśasva | saṃveśanastanuvai cāruredhi priyo devānāṃ parame sadhasthe, iti | nāke suparṇamupa yatpatantam̐ hṛdā venanto abhyacakṣata tvā | hiraṇyapakṣaṃ varuṇasya dūtaṃ yamasya yonau śakunaṃ bhuraṇyum, iti | atidrava sārameyau śvānau caturakṣau śabalau sādhunā pathā | athā pitṝntsuvidatrām̐ apīhi yamena ye sadhamādaṃ madanti, iti | yau te śvānau yama rakṣitārau caturakṣau pathirakṣī nṛcakṣasā | tābhyām̐ rājanparidehyenam̐ svasti cāsmā anamīvaṃ ca dhehi ( 1), iti | uruṇasāvasutṛpāvuluṃbalau yamasya dūtī carato'vaśām̐ anu | tāvasmabhyaṃ dṛśaye sūryāya punardattāvasumadyeha bhadram, iti | soma ekebhyaḥ pavate ghṛtameka upāsate | yebhyo madhu pradhāvati tām̐ścidevāpi gacchatāt, iti | ye yudhyante pradhaneṣu śūrāso ye tanutyajaḥ | ye vā sahasradakṣiṇāstām̐ścidevāpi gacchatāt, iti | tapasā ye anādhṛṣyāstapasā ye suvargatāḥ | tapo ye cakrire mahattām̐ścidevāpi gacchatāt, iti | aśmanvatī revatīḥ sam̐rabhadhvamuttiṣṭhata prataratā sakhāyaḥ | atrā jahāma ye asannaśevāḥ śivānvayamabhi vājānuttarema ( 2), iti | yadvai devasya savituḥ pavitram̐ sahasradhāraṃ vitatamantarikṣe | yenāpunādindramanārtamārtyai tenāhaṃ mām̐ sarvatanuṃ punāmi | yā rāṣṭrātpannādapayanti śākhā abhimṛtā nṛpatimicchamānāḥ | dhātustāḥ sarvāḥ pavanena pūtāḥ prajayā'smānrayyā varcasā sam̐sṛjātha | udvayaṃ tamasasparipaśyanto jyotiruttaram | devaṃ devatrā sūryamaganma jyotiruttamam, iti | dhātā punātu savitā punātu | agnestejasā sūryasya varcasā ( 3) || dhehyuttaremāṣṭau ca ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.