प्रजापतिः प्रजा असृजत । स रिरिचानोऽमन्यत । स तपोऽतप्यत । स आत्मन्वीर्यमपश्यत् । तदवर्धत । तदस्मात्सहसोर्ध्वमसृज्यत । सा विरा-डभवत् । तां देवासुरा व्यगृह्णत । सोऽब्रवीत्प्रजापतिः । मम वा एषा १ दोहा एव युष्माकमिति । सा ततः प्राच्युदक्रामत् । तत्प्रजापतिः पर्यगृह्णात् । अथर्व पितुं मे गोपायेति । सा द्वितीयमुदक्रामत् । तत्प्रजापतिः पर्यगृह्णात् । नर्य प्रजां मे गोपायेति । सा तृतीयमुदक्रामत् । तत्प्रजापतिः पर्यगृह्णात् । शꣳस्य पशून्मे गोपायेति २ सा चतुर्थमुदक्रामत् । तत्प्रजापतिः पर्यगृह्णात् । सप्रथ सभां मे गोपायेति । सा पञ्चममुदक्रामत् । तत्प्रजापतिः पर्यगृह्णात् । अहे बुध्निय मन्त्रं मे गोपायेति । अग्नीन्वाव सा तान्व्यक्रमत । तान्प्रजापतिः पर्यगृह्णात् । अथो पङ्क्तिमेव । पङ्क्तिर्वा एषा ब्राह्मणे प्रविष्टा ३ तामात्मनोऽधि निर्मिमीते । यदग्निराधीयते । तस्मादेतावन्तोऽग्नय आधीयन्ते । पाङ्क्तं वा इदꣳ सर्वम् । पाङ्क्तेनैव पाङ्क्तꣳ स्पृणोति । अथर्व पितुं मे गोपायेत्याह । अन्नमेवैतेन स्पृणोति । नर्य प्रजां मे गोपायेत्याह । प्रजामेवतेन स्पृणोति । शꣳस्य पशून्मे गोपायेत्याह ४ पशूनेवैतेन स्पृणोति । सप्रथ सभां मे गोपायेत्याह । सभामेवैतेनेन्द्रि यꣳ स्पृणोति । अहे बुध्निय मन्त्रं मे गोपायेत्याह । मन्त्रमेवैतेन श्रियꣳ स्पृणोति । यदन्वाहार्यपचनेऽन्वाहार्यं पचन्ति । तेन सोऽस्याभीष्टः प्रीतः । यद्गार्हपत्य आज्यमधिश्रयन्ति संपत्नीर्याजयन्ति । तेन सोऽस्याभीष्टः प्रीतः । यदाहवनीये जुह्वति ५ तेन सोऽस्याभीष्टः प्रीतः । यत्सभायां विजयन्ते । तेन सोऽस्याभीष्टः प्रीतः । यदावसथेऽन्नꣳ हरन्ति । तेन सोऽस्याभीष्टः प्रीतः । तथास्य सर्वे प्रीता अभीष्टा आधीयन्ते । प्रवसथमेष्यन्नेवमुपतिष्ठेतैकमेकम् । यथा ब्राह्मणाय गृहे वासिने परिदाय गृहानेति । तादृगेव तत् । पुनरागत्योपतिष्ठते । साभागेयमेवैषां तत् । सा तत ऊर्ध्वारोहत् । सा रोहिण्यभवत् । तद्रो हिण्यै रोहिणित्वम् । रोहिण्यामग्निमादधीत । स्व एवैनं योनौ प्रतिष्ठितमाधत्ते । ऋध्नोत्येनेन ६
prajāpatiḥ prajā asṛjata | sa riricāno'manyata | sa tapo'tapyata | sa ātmanvīryamapaśyat | tadavardhata | tadasmātsahasordhvamasṛjyata | sā virā-ḍabhavat | tāṃ devāsurā vyagṛhṇata | so'bravītprajāpatiḥ | mama vā eṣā 1 dohā eva yuṣmākamiti | sā tataḥ prācyudakrāmat | tatprajāpatiḥ paryagṛhṇāt | atharva pituṃ me gopāyeti | sā dvitīyamudakrāmat | tatprajāpatiḥ paryagṛhṇāt | narya prajāṃ me gopāyeti | sā tṛtīyamudakrāmat | tatprajāpatiḥ paryagṛhṇāt | śam̐sya paśūnme gopāyeti 2 sā caturthamudakrāmat | tatprajāpatiḥ paryagṛhṇāt | sapratha sabhāṃ me gopāyeti | sā pañcamamudakrāmat | tatprajāpatiḥ paryagṛhṇāt | ahe budhniya mantraṃ me gopāyeti | agnīnvāva sā tānvyakramata | tānprajāpatiḥ paryagṛhṇāt | atho paṅktimeva | paṅktirvā eṣā brāhmaṇe praviṣṭā 3 tāmātmano'dhi nirmimīte | yadagnirādhīyate | tasmādetāvanto'gnaya ādhīyante | pāṅktaṃ vā idam̐ sarvam | pāṅktenaiva pāṅktam̐ spṛṇoti | atharva pituṃ me gopāyetyāha | annamevaitena spṛṇoti | narya prajāṃ me gopāyetyāha | prajāmevatena spṛṇoti | śam̐sya paśūnme gopāyetyāha 4 paśūnevaitena spṛṇoti | sapratha sabhāṃ me gopāyetyāha | sabhāmevaitenendri yam̐ spṛṇoti | ahe budhniya mantraṃ me gopāyetyāha | mantramevaitena śriyam̐ spṛṇoti | yadanvāhāryapacane'nvāhāryaṃ pacanti | tena so'syābhīṣṭaḥ prītaḥ | yadgārhapatya ājyamadhiśrayanti saṃpatnīryājayanti | tena so'syābhīṣṭaḥ prītaḥ | yadāhavanīye juhvati 5 tena so'syābhīṣṭaḥ prītaḥ | yatsabhāyāṃ vijayante | tena so'syābhīṣṭaḥ prītaḥ | yadāvasathe'nnam̐ haranti | tena so'syābhīṣṭaḥ prītaḥ | tathāsya sarve prītā abhīṣṭā ādhīyante | pravasathameṣyannevamupatiṣṭhetaikamekam | yathā brāhmaṇāya gṛhe vāsine paridāya gṛhāneti | tādṛgeva tat | punarāgatyopatiṣṭhate | sābhāgeyamevaiṣāṃ tat | sā tata ūrdhvārohat | sā rohiṇyabhavat | tadro hiṇyai rohiṇitvam | rohiṇyāmagnimādadhīta | sva evainaṃ yonau pratiṣṭhitamādhatte | ṛdhnotyenena 6
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.