शमीगर्भादग्निं मन्थति । एषा वा अग्नेर्यज्ञिया तनूः । तामेवास्मै जनयति । अदितिः पुत्रकामा । साध्येभ्यो देवेभ्यो ब्रह्मौदनमपचत् । तस्या उच्छेषणमददुः । तत्प्राश्नात् । सा रेतोऽधत्त । तस्यै धाता चार्यमा चाजायेताम् । सा द्वितीयमपचत् १ तस्या उच्छेषणमददुः । तत्प्राश्नात् । सा रेतोऽधत्त तस्यै मित्रश्च वरुणश्चाजायेताम् । सा तृतीयमपचत् । तस्या उच्छेषणमददुः । तत्प्राश्नात् । सा रेतोऽधत्त । तस्या अꣳशश्च भगश्चाजायेताम् । सा चतुर्थमपचत् २ तस्या उच्छेषणमददुः । तत्प्राश्नात् । सा रेतोऽधत्त । तस्या इन्द्रश्च विवस्वाꣳश्चाजायेताम् । ब्रह्मौदनं पचति । रेत एव तद्दधाति । प्राश्नन्ति ब्राह्मणा ओदनम् । यदाज्यमुच्छिष्यते । तेन समिधोऽभ्यज्यादधाति । उच्छेषणाद्वा अदिती रेतोऽधत्त ३ उच्छेषणादेव तद्रेतो धत्ते । अस्थि वा एतत् । यत्समिधः । एतद्रेतः । यदाज्यम् । यदाज्येन समिधोऽभ्यज्यादधाति । अस्थ्येव तद्रेतसि दधाति । तिस्र आदधाति मिथुनत्वाय । इयतीर्भवन्ति । प्रजापतिना यज्ञमुखेन संमिताः ४ इयतीर्भवन्ति । यज्ञपरुषा संमिताः । इयतीर्भवन्ति । एतावद्वै पुरुषे वीर्यम् । वीर्यसंमिताः । आर्द्रा भवन्ति । आर्द्र मिव हि रेतः सिच्यते । चित्रियस्याश्वत्थस्यादधाति । चित्रमेव भवति । घृतवतीभिरादधाति ५ एतद्वा अग्नेः प्रियं धाम । यद्घृतम् । प्रियेणैवैनं धाम्ना समर्धयति । अथो तेजसा । गायत्रीभिर्ब्राह्मणस्यादध्यात् । गायत्रच्छन्दा वै ब्राह्मणः । स्वस्य छन्दसः प्रत्ययनस्त्वाय । त्रिष्टुग्भी राजन्यस्य । त्रिष्टुप्छन्दा वै राजन्यः । स्वस्य छन्दसः प्रत्ययनस्त्वाय ६ जगतीभिर्वैश्यस्य । जगतीछन्दा वै वैश्यः । स्वस्य छन्दसः प्रत्ययनस्त्वाय । तꣳ संवत्सरं गोपायेत् । संवत्सरꣳ हि रेतो हितं वर्धते । यद्येनꣳ संवत्सरे नोपनमेत् । समिधः पुनरादध्यात् । रेत एव तद्धितं वर्धमानमेति । न माꣳसमश्नीयात् । न स्त्रियमुपेयात् ७ यन्माꣳसमश्नीयात् । यत्स्त्रियमुपेयात् । निर्वीर्यः स्यात् । नैनमग्निरुपनमेत् । श्व आधास्यमानो ब्रह्मौदनं पचति । आदित्या वा इत उत्तमाः सुवर्गं लोकमायन्न् । ते वा इतो यन्तं प्रतिनुदन्ते । एते खलु वावादित्याः । यद्ब्राह्मणाः । तैरेव संत्वं गच्छति ८ नैनं प्रतिनुदन्ते । ब्रह्मवादिनो वदन्ति । क्वा सः । अग्निः कार्यः । योऽस्मै प्रजां पशून्प्रजनयतीति । शल्कैस्ताꣳ रात्रिमग्निमिन्धीत । तस्मिन्नुपव्युषमरणी निष्टपेत् । यथर्षभाय वाशिता न्याविच्छायति ।तदृगेव तत् । अपोदूह्य भस्माग्निं मन्थति ९ सैव साग्नेः संततिः । तं मथित्वा प्राञ्चमुद्धरति । संवत्सरमेव तद्रे तो हितं प्रजनयति । अनाहितस्तस्याग्निरित्याहुः । यः समिधोऽनाधायाग्निमाधत्त इति । ताः संवत्सरे पुरस्तादादध्यात् । संवत्सरादेवैनमवरुध्याधत्ते । यदि संवत्सरे नादध्यात् । द्वादश्यां पुरस्तादादध्यात्संवत्सरप्रतिमा वै द्वादश रात्रयः । संवत्सरमेवास्याहिता भवन्ति । यदि द्वादश्यां नादध्यात् । त्र्यहे पुरस्तादादध्यात् । आहिता एवास्य भवन्ति १०
śamīgarbhādagniṃ manthati | eṣā vā agneryajñiyā tanūḥ | tāmevāsmai janayati | aditiḥ putrakāmā | sādhyebhyo devebhyo brahmaudanamapacat | tasyā uccheṣaṇamadaduḥ | tatprāśnāt | sā reto'dhatta | tasyai dhātā cāryamā cājāyetām | sā dvitīyamapacat 1 tasyā uccheṣaṇamadaduḥ | tatprāśnāt | sā reto'dhatta tasyai mitraśca varuṇaścājāyetām | sā tṛtīyamapacat | tasyā uccheṣaṇamadaduḥ | tatprāśnāt | sā reto'dhatta | tasyā am̐śaśca bhagaścājāyetām | sā caturthamapacat 2 tasyā uccheṣaṇamadaduḥ | tatprāśnāt | sā reto'dhatta | tasyā indraśca vivasvām̐ścājāyetām | brahmaudanaṃ pacati | reta eva taddadhāti | prāśnanti brāhmaṇā odanam | yadājyamucchiṣyate | tena samidho'bhyajyādadhāti | uccheṣaṇādvā aditī reto'dhatta 3 uccheṣaṇādeva tadreto dhatte | asthi vā etat | yatsamidhaḥ | etadretaḥ | yadājyam | yadājyena samidho'bhyajyādadhāti | asthyeva tadretasi dadhāti | tisra ādadhāti mithunatvāya | iyatīrbhavanti | prajāpatinā yajñamukhena saṃmitāḥ 4 iyatīrbhavanti | yajñaparuṣā saṃmitāḥ | iyatīrbhavanti | etāvadvai puruṣe vīryam | vīryasaṃmitāḥ | ārdrā bhavanti | ārdra miva hi retaḥ sicyate | citriyasyāśvatthasyādadhāti | citrameva bhavati | ghṛtavatībhirādadhāti 5 etadvā agneḥ priyaṃ dhāma | yadghṛtam | priyeṇaivainaṃ dhāmnā samardhayati | atho tejasā | gāyatrībhirbrāhmaṇasyādadhyāt | gāyatracchandā vai brāhmaṇaḥ | svasya chandasaḥ pratyayanastvāya | triṣṭugbhī rājanyasya | triṣṭupchandā vai rājanyaḥ | svasya chandasaḥ pratyayanastvāya 6 jagatībhirvaiśyasya | jagatīchandā vai vaiśyaḥ | svasya chandasaḥ pratyayanastvāya | tam̐ saṃvatsaraṃ gopāyet | saṃvatsaram̐ hi reto hitaṃ vardhate | yadyenam̐ saṃvatsare nopanamet | samidhaḥ punarādadhyāt | reta eva taddhitaṃ vardhamānameti | na mām̐samaśnīyāt | na striyamupeyāt 7 yanmām̐samaśnīyāt | yatstriyamupeyāt | nirvīryaḥ syāt | nainamagnirupanamet | śva ādhāsyamāno brahmaudanaṃ pacati | ādityā vā ita uttamāḥ suvargaṃ lokamāyann | te vā ito yantaṃ pratinudante | ete khalu vāvādityāḥ | yadbrāhmaṇāḥ | taireva saṃtvaṃ gacchati 8 nainaṃ pratinudante | brahmavādino vadanti | kvā saḥ | agniḥ kāryaḥ | yo'smai prajāṃ paśūnprajanayatīti | śalkaistām̐ rātrimagnimindhīta | tasminnupavyuṣamaraṇī niṣṭapet | yatharṣabhāya vāśitā nyāvicchāyati |tadṛgeva tat | apodūhya bhasmāgniṃ manthati 9 saiva sāgneḥ saṃtatiḥ | taṃ mathitvā prāñcamuddharati | saṃvatsarameva tadre to hitaṃ prajanayati | anāhitastasyāgnirityāhuḥ | yaḥ samidho'nādhāyāgnimādhatta iti | tāḥ saṃvatsare purastādādadhyāt | saṃvatsarādevainamavarudhyādhatte | yadi saṃvatsare nādadhyāt | dvādaśyāṃ purastādādadhyātsaṃvatsarapratimā vai dvādaśa rātrayaḥ | saṃvatsaramevāsyāhitā bhavanti | yadi dvādaśyāṃ nādadhyāt | tryahe purastādādadhyāt | āhitā evāsya bhavanti 10
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.