ये केशिनः प्रथमाः सत्त्रमासत । येभिराभृतं यदिदं विरोचते । तेभ्यो जुहोमि बहुधा घृतेन । रायस्पोषेणेमं वर्चसा सꣳ सृजाथ । नर्ते ब्रह्मणस्तपसो विमोकः । द्विनाम्नी दीक्षा वशिनी ह्युग्रा । प्र केशाः सुवते काण्डिनो भवन्ति । तेषां ब्रह्मेदीशे वपनस्य नान्यः । आरोह प्रोष्ठं विषहस्व शत्रून् । अवास्राग्दीक्षा वशिनी ह्युग्रा १ देहि दक्षिणां प्रतिरस्वायुः । अथा मुच्यस्व वरुणस्य पाशात् । येनावपत्सविता क्षुरेण । सोमस्य राज्ञो वरुणस्य विद्वान् । तेन ब्रह्माणो वपतेदमस्योर्जेमम् । रय्या वर्चसा सꣳ सृजाथ । मा ते केशाननु गाद्वर्च एतत् । तथा धाता करोतु ते । तुभ्यमिन्द्रो बृहस्पतिः । सविता वर्च आदधात् २ तेभ्यो निधानं बहुधा व्यैच्छन् । अन्तरा द्यावापृथिवी अपः सुवः । दर्भस्तम्बे वीर्यकृते निधाय । पौꣳ स्येनेमं वर्चसा सꣳ सृजाथ । बलं ते बाहुवोः सविता दधातु । सोमस्त्वानक्तु पयसा घृतेन । स्त्रीषु रूपमश्विनैतन्निधत्तम् । पौꣳ स्येनेमं वर्चसा सꣳ सृजाथ । यत्सीमन्तं कङ्कतस्ते लिलेख । यद्वा क्षुरः परिववर्ज वपꣳ स्ते । स्त्रीषु रूपमश्विनैतन्निधत्तम् । पौꣳ स्येनेमꣳ सꣳ सृजाथो वीर्येण ३
ye keśinaḥ prathamāḥ sattramāsata | yebhirābhṛtaṃ yadidaṃ virocate | tebhyo juhomi bahudhā ghṛtena | rāyaspoṣeṇemaṃ varcasā sam̐ sṛjātha | narte brahmaṇastapaso vimokaḥ | dvināmnī dīkṣā vaśinī hyugrā | pra keśāḥ suvate kāṇḍino bhavanti | teṣāṃ brahmedīśe vapanasya nānyaḥ | āroha proṣṭhaṃ viṣahasva śatrūn | avāsrāgdīkṣā vaśinī hyugrā 1 dehi dakṣiṇāṃ pratirasvāyuḥ | athā mucyasva varuṇasya pāśāt | yenāvapatsavitā kṣureṇa | somasya rājño varuṇasya vidvān | tena brahmāṇo vapatedamasyorjemam | rayyā varcasā sam̐ sṛjātha | mā te keśānanu gādvarca etat | tathā dhātā karotu te | tubhyamindro bṛhaspatiḥ | savitā varca ādadhāt 2 tebhyo nidhānaṃ bahudhā vyaicchan | antarā dyāvāpṛthivī apaḥ suvaḥ | darbhastambe vīryakṛte nidhāya | paum̐ syenemaṃ varcasā sam̐ sṛjātha | balaṃ te bāhuvoḥ savitā dadhātu | somastvānaktu payasā ghṛtena | strīṣu rūpamaśvinaitannidhattam | paum̐ syenemaṃ varcasā sam̐ sṛjātha | yatsīmantaṃ kaṅkataste lilekha | yadvā kṣuraḥ parivavarja vapam̐ ste | strīṣu rūpamaśvinaitannidhattam | paum̐ syenemam̐ sam̐ sṛjātho vīryeṇa 3
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.