एष गोसवः । षट्त्रिꣳश उक्थ्यो बृहत्सामा । पवमाने कण्वरथंतरं भवति । यो वै वाजपेयः । स सम्राट्त्सवः । यो राजसूयः । स वरुणसवः । प्रजापतिः स्वाराज्यं परमेष्ठी । स्वाराज्यं गौरेव । गौरिव भवति १ य एतेन यजते । य उ चैनमेवं वेद । उभे बृहद्र थंतरे भवतः । तद्धि स्वाराज्यम् । अयुतं दक्षिणाः । तद्धि स्वाराज्यम् । प्रतिधुषाभिषिञ्चति । तद्धि स्वाराज्यम् । अनुद्धते वेद्यै दक्षिणत आहवनीयस्य बृहतस्तोत्रं प्रत्यभिषिञ्चति । इयं वाव रथंतरम् २ असौ बृहत् । अनयोरेवैनमनन्तर्हितमभिषिञ्चति । पशुस्तोमो वा एषः । तेन गोसवः । षट्त्रिꣳशः सर्वः । रेवज्जातः सहसा वृद्धः । क्षत्राणां क्षत्रभृत्तमो वयोधाः । महान्महित्वे तस्तभानः । क्षत्रे राष्ट्रे च जागृहि । प्रजापतेस्त्वा परमेष्ठिनः स्वाराज्येनाभिषिञ्चामीत्याह । स्वाराज्यमेवैनं गमयति ३
eṣa gosavaḥ | ṣaṭtrim̐śa ukthyo bṛhatsāmā | pavamāne kaṇvarathaṃtaraṃ bhavati | yo vai vājapeyaḥ | sa samrāṭtsavaḥ | yo rājasūyaḥ | sa varuṇasavaḥ | prajāpatiḥ svārājyaṃ parameṣṭhī | svārājyaṃ gaureva | gauriva bhavati 1 ya etena yajate | ya u cainamevaṃ veda | ubhe bṛhadra thaṃtare bhavataḥ | taddhi svārājyam | ayutaṃ dakṣiṇāḥ | taddhi svārājyam | pratidhuṣābhiṣiñcati | taddhi svārājyam | anuddhate vedyai dakṣiṇata āhavanīyasya bṛhatastotraṃ pratyabhiṣiñcati | iyaṃ vāva rathaṃtaram 2 asau bṛhat | anayorevainamanantarhitamabhiṣiñcati | paśustomo vā eṣaḥ | tena gosavaḥ | ṣaṭtrim̐śaḥ sarvaḥ | revajjātaḥ sahasā vṛddhaḥ | kṣatrāṇāṃ kṣatrabhṛttamo vayodhāḥ | mahānmahitve tastabhānaḥ | kṣatre rāṣṭre ca jāgṛhi | prajāpatestvā parameṣṭhinaḥ svārājyenābhiṣiñcāmītyāha | svārājyamevainaṃ gamayati 3
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.