प्रजापतिः प्रजा असृजत । ता अस्मात्सृष्टाः पराचीरायन् । स एतं प्रजापतिरोदनमपश्यत् । सोऽन्नं भूतोऽतिष्ठत् । ता अन्यत्रान्नाद्यमवित्त्वा । प्रजापतिं प्रजा उपावर्तन्त । अन्नमेवैनं भूतं पश्यन्तीः प्रजा उपावर्तन्ते । य एतेन यजते । य उ चैनमेवं वेद । सर्वाण्यन्नानि भवन्ति १ सर्वे पुरुषाः । सर्वाण्येवान्नान्यवरुन्धे । सर्वान्पुरुषान् । राडसि विराडसीत्याह । स्वाराज्यमेवैनं गमयति । यद्धिरण्यं ददाति । तेजस्तेनावरुन्धे । यत्तिसृधन्वम् । वीर्यं तेन । यदष्ट्राम् २ पुष्टिं तेन । यत्कमण्डलुम् । आयुष्टेन । यद्धिरण्यमाबध्नाति । ज्योतिर्वै हिरण्यम् । ज्योतिरेवास्मिन्दधाति । अथो तेजो वै हिरण्यम् । तेज एवात्मन्धत्ते । यदोदनं प्राश्नाति । एतदेव सर्वमवरुध्य ३ तदस्मिन्नेकधाधात् । रोहिण्यां कार्यः । यद्ब्राह्मण एव रोहिणी ।तस्मादेव । अथो वर्ष्मैवैनꣳ समानानां करोति । उद्यता सूर्येण कार्यः । उद्यन्तं वा एतꣳ सर्वाः प्रजाः प्रतिनन्दन्ति । दिदृक्षेण्यो दर्शनीयो भवति । य एवं वेद । ब्रह्मवादिनो वदन्ति ४ अवेत्योऽवभृथा३ ना३ इति । यद्दर्भपुञ्जीलैः पवयति । तत्स्विदेवावैति । तन्नावैति । त्रिभिः पवयति । त्रय इमे लोकाः । एभिरेवैनं लोकैः पवयति । अथो अपां वा एतत्तेजो वर्चः । यद्दर्भाः । यद्दर्भपुञ्जीलैः पवयति । अपामेवैनं तेजसा वर्चसाभिषिञ्चति ५
prajāpatiḥ prajā asṛjata | tā asmātsṛṣṭāḥ parācīrāyan | sa etaṃ prajāpatirodanamapaśyat | so'nnaṃ bhūto'tiṣṭhat | tā anyatrānnādyamavittvā | prajāpatiṃ prajā upāvartanta | annamevainaṃ bhūtaṃ paśyantīḥ prajā upāvartante | ya etena yajate | ya u cainamevaṃ veda | sarvāṇyannāni bhavanti 1 sarve puruṣāḥ | sarvāṇyevānnānyavarundhe | sarvānpuruṣān | rāḍasi virāḍasītyāha | svārājyamevainaṃ gamayati | yaddhiraṇyaṃ dadāti | tejastenāvarundhe | yattisṛdhanvam | vīryaṃ tena | yadaṣṭrām 2 puṣṭiṃ tena | yatkamaṇḍalum | āyuṣṭena | yaddhiraṇyamābadhnāti | jyotirvai hiraṇyam | jyotirevāsmindadhāti | atho tejo vai hiraṇyam | teja evātmandhatte | yadodanaṃ prāśnāti | etadeva sarvamavarudhya 3 tadasminnekadhādhāt | rohiṇyāṃ kāryaḥ | yadbrāhmaṇa eva rohiṇī |tasmādeva | atho varṣmaivainam̐ samānānāṃ karoti | udyatā sūryeṇa kāryaḥ | udyantaṃ vā etam̐ sarvāḥ prajāḥ pratinandanti | didṛkṣeṇyo darśanīyo bhavati | ya evaṃ veda | brahmavādino vadanti 4 avetyo'vabhṛthā3 nā3 iti | yaddarbhapuñjīlaiḥ pavayati | tatsvidevāvaiti | tannāvaiti | tribhiḥ pavayati | traya ime lokāḥ | ebhirevainaṃ lokaiḥ pavayati | atho apāṃ vā etattejo varcaḥ | yaddarbhāḥ | yaddarbhapuñjīlaiḥ pavayati | apāmevainaṃ tejasā varcasābhiṣiñcati 5
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.