शुचिं नु स्तोमꣳ । श्नथद्वृत्रम् । ।उभा वामिन्द्रा ग्नी। प्र चर्षणिभ्यः । ।आ वृत्रहणा । गीर्भिर्विप्रः । ।ब्रह्मणस्पते त्वमस्य यन्ता । सूक्तस्य बोधि तनयं च जिन्व । विश्वं तद्भद्रं यदवन्ति देवाः । बृहद्वदेम विदथे सुवीराः । स ईꣳ सत्येभिः सखिभिः शुचद्भिः । गोधायसं वि धनसैरतर्दत् । ब्रह्मणस्पतिर्वृषभिर्वराहैः १ घर्मस्वेदोभिर्द्र विणं व्यानट् । ब्रह्मणस्पतेरभवद्यथावशम् । सत्यो मन्युर्महि कर्मा करिष्यतः । यो गा उदाजत्स दिवे वि चाभजत् । महीव रीतिः शवसा सरत्पृथक् । इन्धानो अग्निं वनवद्वनुष्यतः । कृतब्रह्मा शूशुवद्रा तहव्य इत् । जातेन जातमति सृत्प्रसृꣳ सते । यंयं युजं कृणुते ब्रह्मणस्पतिः । ब्रह्मणस्पते सुयमस्य विश्वहा २ रायः स्याम रथ्यो विवस्वतः । वीरेषु वीराꣳ उपपृङ्ग्धि नस्त्वम् । यदीशानो ब्रह्मणा वेषि मे हवम् । स इज्जनेन स विशा स जन्मना । स पुत्रैर्वाजं भरते धना नृभिः । देवानां यः पितरमाविवासति । श्रद्धामना हविषा ब्रह्मणस्पतिम् । यस्ते पूषन्नावो अन्तः । शुक्रं ते अन्यत् । पूषेमा आशाः । प्रपथे पथामजनिष्ट पूषा ३ प्रपथे दिवः प्रपथे पृथिव्याः । उभे अभि प्रियतमे सधस्थे । आ च परा च चरति प्रजानन् । पूषा सुबन्धुर्दिव आ पृथिव्याः । इडस्पतिर्मघवा दस्मवर्चाः । तं देवासो अददुः सूर्यायै । कामेन कृतं तवसꣳ स्वञ्चम् । अजाश्वः पशुपा वाजवस्त्यः । धियंजिन्वो विश्वे भुवने अर्पितः । अष्ट्रां पूषा शिथि-रामुद्वरीवृजत् ४ संचक्षाणो भुवना देव ईयते । शुची वो हव्या मरुतः शुचीनाम् । शुचिꣳ हिनोम्यध्वरꣳ शुचिभ्यः । ऋतेन सत्यमृतसाप आयन् । शुचिजन्मानः शुचयः पावकाः । प्र चित्रमर्कं गृणते तुराय । मारुताय स्वतवसे भरध्वम् । ये सहाꣳ सि सहसा सहन्ते । रेजते अग्ने पृथिवी मखेभ्यः । अꣳ सेष्वा मरुतः खादयो वः ५ वक्षःसु रुक्मा उपशिश्रियाणाः । वि विद्युतो न व्यृष्टिभी रुचानाः । अनु स्वधामायुधैर्यच्छमानाः । या वः शर्म शशमानाय सन्ति । त्रिधातूनि दाशुषे यच्छताधि । अस्मभ्यं तानि मरुतो वियन्त । रयिं नो धत्त वृषणः सुवीरम् । इमे तुरं मरुतो रामयन्ति । इमे सहः सहस आनमन्ति । इमे शꣳ सं वनुष्यतो निपान्ति ६ गुरु द्वेषो अररुषे दधन्ति । अरा इवेदचरमा अहेव । प्र प्रजायन्ते अकवा महोभिः । पृश्नेः पुत्रा उपमासो रभिष्ठाः । स्वया मत्या मरुतः संमिमिक्षुः । अनु ते दायि मह इन्द्रि याय । सत्रा ते विश्वमनु वृत्रहत्ये । अनु क्षत्त्रमनु सहो यजत्र । इन्द्र देवेभिरनु ते नृषह्ये । य इन्द्र शुष्मो मघवन्ते अस्ति ७ शिक्षा सखिभ्यः पुरुहूत नृभ्यः । त्वꣳ हि दृढा मघवन्विचेताः । अपावृधि परिवृतिं न राधः । इन्द्रो राजा जगतश्चर्षणीनाम् । अधि क्षमि विषुरूपं यदस्ति । ततो ददातु दाशुषे वसूनि । चोदद्रा ध उपस्तुतश्चिदर्वाक् । तमु ष्टुहि यो अभिभूत्योजाः । वन्वन्नवातः पुरुहूत इन्द्रः । अषाढमुग्रꣳ सहमान-माभिः ८ गीर्भिर्वर्ध वृषभं चर्षणीनाम् । स्थूरस्य रायो बृहतो य ईशे । तमु ष्टवाम विदथेष्विन्द्र म् । यो वायुना जयति गोमतीषु । प्र धृष्णुया नयति वस्यो अच्छ । आ ते शुष्मो वृषभ एतु पश्चात् । ओत्तरादधरागा पुरस्तात् । आ विश्वतो अभि समेत्वर्वाङ्।इन्द्र द्युम्नꣳ सुवर्वद्धेह्यस्मे ९
śuciṃ nu stomam̐ | śnathadvṛtram | |ubhā vāmindrā gnī| pra carṣaṇibhyaḥ | |ā vṛtrahaṇā | gīrbhirvipraḥ | |brahmaṇaspate tvamasya yantā | sūktasya bodhi tanayaṃ ca jinva | viśvaṃ tadbhadraṃ yadavanti devāḥ | bṛhadvadema vidathe suvīrāḥ | sa īm̐ satyebhiḥ sakhibhiḥ śucadbhiḥ | godhāyasaṃ vi dhanasairatardat | brahmaṇaspatirvṛṣabhirvarāhaiḥ 1 gharmasvedobhirdra viṇaṃ vyānaṭ | brahmaṇaspaterabhavadyathāvaśam | satyo manyurmahi karmā kariṣyataḥ | yo gā udājatsa dive vi cābhajat | mahīva rītiḥ śavasā saratpṛthak | indhāno agniṃ vanavadvanuṣyataḥ | kṛtabrahmā śūśuvadrā tahavya it | jātena jātamati sṛtprasṛm̐ sate | yaṃyaṃ yujaṃ kṛṇute brahmaṇaspatiḥ | brahmaṇaspate suyamasya viśvahā 2 rāyaḥ syāma rathyo vivasvataḥ | vīreṣu vīrām̐ upapṛṅgdhi nastvam | yadīśāno brahmaṇā veṣi me havam | sa ijjanena sa viśā sa janmanā | sa putrairvājaṃ bharate dhanā nṛbhiḥ | devānāṃ yaḥ pitaramāvivāsati | śraddhāmanā haviṣā brahmaṇaspatim | yaste pūṣannāvo antaḥ | śukraṃ te anyat | pūṣemā āśāḥ | prapathe pathāmajaniṣṭa pūṣā 3 prapathe divaḥ prapathe pṛthivyāḥ | ubhe abhi priyatame sadhasthe | ā ca parā ca carati prajānan | pūṣā subandhurdiva ā pṛthivyāḥ | iḍaspatirmaghavā dasmavarcāḥ | taṃ devāso adaduḥ sūryāyai | kāmena kṛtaṃ tavasam̐ svañcam | ajāśvaḥ paśupā vājavastyaḥ | dhiyaṃjinvo viśve bhuvane arpitaḥ | aṣṭrāṃ pūṣā śithi-rāmudvarīvṛjat 4 saṃcakṣāṇo bhuvanā deva īyate | śucī vo havyā marutaḥ śucīnām | śucim̐ hinomyadhvaram̐ śucibhyaḥ | ṛtena satyamṛtasāpa āyan | śucijanmānaḥ śucayaḥ pāvakāḥ | pra citramarkaṃ gṛṇate turāya | mārutāya svatavase bharadhvam | ye sahām̐ si sahasā sahante | rejate agne pṛthivī makhebhyaḥ | am̐ seṣvā marutaḥ khādayo vaḥ 5 vakṣaḥsu rukmā upaśiśriyāṇāḥ | vi vidyuto na vyṛṣṭibhī rucānāḥ | anu svadhāmāyudhairyacchamānāḥ | yā vaḥ śarma śaśamānāya santi | tridhātūni dāśuṣe yacchatādhi | asmabhyaṃ tāni maruto viyanta | rayiṃ no dhatta vṛṣaṇaḥ suvīram | ime turaṃ maruto rāmayanti | ime sahaḥ sahasa ānamanti | ime śam̐ saṃ vanuṣyato nipānti 6 guru dveṣo araruṣe dadhanti | arā ivedacaramā aheva | pra prajāyante akavā mahobhiḥ | pṛśneḥ putrā upamāso rabhiṣṭhāḥ | svayā matyā marutaḥ saṃmimikṣuḥ | anu te dāyi maha indri yāya | satrā te viśvamanu vṛtrahatye | anu kṣattramanu saho yajatra | indra devebhiranu te nṛṣahye | ya indra śuṣmo maghavante asti 7 śikṣā sakhibhyaḥ puruhūta nṛbhyaḥ | tvam̐ hi dṛḍhā maghavanvicetāḥ | apāvṛdhi parivṛtiṃ na rādhaḥ | indro rājā jagataścarṣaṇīnām | adhi kṣami viṣurūpaṃ yadasti | tato dadātu dāśuṣe vasūni | codadrā dha upastutaścidarvāk | tamu ṣṭuhi yo abhibhūtyojāḥ | vanvannavātaḥ puruhūta indraḥ | aṣāḍhamugram̐ sahamāna-mābhiḥ 8 gīrbhirvardha vṛṣabhaṃ carṣaṇīnām | sthūrasya rāyo bṛhato ya īśe | tamu ṣṭavāma vidatheṣvindra m | yo vāyunā jayati gomatīṣu | pra dhṛṣṇuyā nayati vasyo accha | ā te śuṣmo vṛṣabha etu paścāt | ottarādadharāgā purastāt | ā viśvato abhi sametvarvāṅ|indra dyumnam̐ suvarvaddhehyasme 9
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.