चन्द्रमा वा अकामयत । अहोरात्रानर्धमासान्मासानृतून्त्संवत्सरमाप्त्वा । चन्द्र मसः सायुज्यꣳ सलोकतामाप्नुयामिति । स एतं चन्द्र मसे प्रतीदृश्यायै पुरोडाशं पञ्चदशकपालं निरवपत् । ततो वै सोऽहोरात्रानर्धमासान्मासानृतून्त्संवत्सरमाप्त्वा । चन्द्र मसः सायुज्यꣳ सलोकतामाप्नोत् । अहोरात्रान्ह वा अर्धमासान्मासानृतून्त्संवत्सरमाप्त्वा । चन्द्र मसः सायुज्यꣳ सलोकतामाप्नोति । य एतेन हविषा यजते । य उ चैनदेवं वेद । सोऽत्र जुहोति । चन्द्र मसे स्वाहा प्रतीदृश्यायै स्वाहा । अहोरात्रेभ्यः स्वाहार्धमासेभ्यः स्वाहा । मासेभ्यः स्वाहर्तुभ्यः स्वाहा । संवत्सराय स्वाहेति १ अहोरात्रे वा अकामयेताम् । अत्यहोरात्रे मुच्येवहि । न नावहोरात्रे आप्नुयातामिति । ते एतमहोरात्राभ्यां चरुं निरवपताम् । द्वयानां व्रीहीणाम् । शुक्लानां च कृष्णानां च । सवात्योर्दुग्धे । श्वेतायै च कृष्णायै च । ततो वै ते अत्यहोरात्रे अमुच्येते । नैने अहोरात्रे आप्नुताम् । अति ह वा अहोरात्रे मुच्यते । नैनमहोरात्रे आप्नुतः । य एतेन हविषा यजते । य उ चैनदेवं वेद । सोऽत्र जुहोति । अह्ने स्वाहा रात्रियै स्वाहा । अतिमुक्त्यै स्वाहेति २ उषा वा अकामयत । प्रियादित्यस्य सुभगा स्यामिति । सैतमुषसे चरुं निरवपत् । ततो वै सा प्रियादित्यस्य सुभगाभवत् । प्रियो ह वै समानानाꣳ सुभगो भवति । य एतेन हविषा यजते । य उ चैनदेवं वेद । सोऽत्र जुहोति । उषसे स्वाहा व्युष्ट्यै स्वाहा । व्यूषुष्यै स्वाहा व्युच्छन्त्यै स्वाहा । व्युष्टायै स्वाहेति ३ अथैतस्मै नक्षत्राय चरुं निर्वपति । यथा त्वं देवानामसि । एवमहं मनुष्याणां भूयासमिति । यथा ह वा एतद्देवानाम् । एवꣳ ह वा एष मनुष्याणां भवति । य एतेन हविषा यजते । य उ चैनदेवं वेद । सोऽत्र जुहोति । नक्षत्राय स्वाहोदेष्यते स्वाहा । उद्यते स्वाहोदिताय स्वाहा । हरसे स्वाहा भरसे स्वाहा । भ्राजसे स्वाहा तेजसे स्वाहा । तपसे स्वाहा ब्रह्मवर्चसाय स्वाहेति ४ सूर्यो वा अकामयत । नक्षत्राणां प्रतिष्ठा स्यामिति । स एतꣳ सूर्याय नक्षत्रेभ्यश्चरुं निरवपत् । ततो वै स नक्षत्राणां प्रतिष्ठाभवत् । प्रतिष्ठा ह वै समानानां भवति । य एतेन हविषा यजते । य उ चैनदेवं वेद । सोऽत्र जुहोति । सूर्याय स्वाहा नक्षत्रेभ्यः स्वाहा । प्रतिष्ठायै स्वाहेति ५ अथैतमदित्यै चरुं निर्वपति । इयं वा अदितिः । अस्यामेव प्रतितिष्ठति । सोऽत्र जुहोति । अदित्यै स्वाहा प्रतिष्ठायै स्वाहेति ६ अथैतं विष्णवे चरुं निर्वपति । यज्ञो वै विष्णुः । यज्ञ एवान्ततः प्रतितिष्ठति । सोऽत्र जुहोति । विष्णवे स्वाहा यज्ञाय स्वाहा । प्रतिष्ठायै स्वाहेति ७
candramā vā akāmayata | ahorātrānardhamāsānmāsānṛtūntsaṃvatsaramāptvā | candra masaḥ sāyujyam̐ salokatāmāpnuyāmiti | sa etaṃ candra mase pratīdṛśyāyai puroḍāśaṃ pañcadaśakapālaṃ niravapat | tato vai so'horātrānardhamāsānmāsānṛtūntsaṃvatsaramāptvā | candra masaḥ sāyujyam̐ salokatāmāpnot | ahorātrānha vā ardhamāsānmāsānṛtūntsaṃvatsaramāptvā | candra masaḥ sāyujyam̐ salokatāmāpnoti | ya etena haviṣā yajate | ya u cainadevaṃ veda | so'tra juhoti | candra mase svāhā pratīdṛśyāyai svāhā | ahorātrebhyaḥ svāhārdhamāsebhyaḥ svāhā | māsebhyaḥ svāhartubhyaḥ svāhā | saṃvatsarāya svāheti 1 ahorātre vā akāmayetām | atyahorātre mucyevahi | na nāvahorātre āpnuyātāmiti | te etamahorātrābhyāṃ caruṃ niravapatām | dvayānāṃ vrīhīṇām | śuklānāṃ ca kṛṣṇānāṃ ca | savātyordugdhe | śvetāyai ca kṛṣṇāyai ca | tato vai te atyahorātre amucyete | naine ahorātre āpnutām | ati ha vā ahorātre mucyate | nainamahorātre āpnutaḥ | ya etena haviṣā yajate | ya u cainadevaṃ veda | so'tra juhoti | ahne svāhā rātriyai svāhā | atimuktyai svāheti 2 uṣā vā akāmayata | priyādityasya subhagā syāmiti | saitamuṣase caruṃ niravapat | tato vai sā priyādityasya subhagābhavat | priyo ha vai samānānām̐ subhago bhavati | ya etena haviṣā yajate | ya u cainadevaṃ veda | so'tra juhoti | uṣase svāhā vyuṣṭyai svāhā | vyūṣuṣyai svāhā vyucchantyai svāhā | vyuṣṭāyai svāheti 3 athaitasmai nakṣatrāya caruṃ nirvapati | yathā tvaṃ devānāmasi | evamahaṃ manuṣyāṇāṃ bhūyāsamiti | yathā ha vā etaddevānām | evam̐ ha vā eṣa manuṣyāṇāṃ bhavati | ya etena haviṣā yajate | ya u cainadevaṃ veda | so'tra juhoti | nakṣatrāya svāhodeṣyate svāhā | udyate svāhoditāya svāhā | harase svāhā bharase svāhā | bhrājase svāhā tejase svāhā | tapase svāhā brahmavarcasāya svāheti 4 sūryo vā akāmayata | nakṣatrāṇāṃ pratiṣṭhā syāmiti | sa etam̐ sūryāya nakṣatrebhyaścaruṃ niravapat | tato vai sa nakṣatrāṇāṃ pratiṣṭhābhavat | pratiṣṭhā ha vai samānānāṃ bhavati | ya etena haviṣā yajate | ya u cainadevaṃ veda | so'tra juhoti | sūryāya svāhā nakṣatrebhyaḥ svāhā | pratiṣṭhāyai svāheti 5 athaitamadityai caruṃ nirvapati | iyaṃ vā aditiḥ | asyāmeva pratitiṣṭhati | so'tra juhoti | adityai svāhā pratiṣṭhāyai svāheti 6 athaitaṃ viṣṇave caruṃ nirvapati | yajño vai viṣṇuḥ | yajña evāntataḥ pratitiṣṭhati | so'tra juhoti | viṣṇave svāhā yajñāya svāhā | pratiṣṭhāyai svāheti 7
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.