मित्रो वा अकामयत । मित्रधेयमेषु लोकेष्वभिजयेयमिति । स एतं मित्रायानूराधेभ्यश्चरुं निरवपत् । ततो वै स मित्रधेयमेषु लोकेष्वभ्यजयत् । मित्रधेयꣳ ह वा एषु लोकेष्वभिजयति । य एतेन हविषा यजते । य उ चैनदेवं वेद । सोऽत्र जुहोति । मित्राय स्वाहानूराधेभ्यः स्वाहा । मित्रधेयाय स्वाहाभिजित्यै स्वाहेति १ इन्द्रो वा अकामयत । ज्यैष्ठ्यं देवानामभिजयेयमिति । स एतमिन्द्रा य ज्येष्ठायै पुरोडाशमेकादशकपालं निरवपन्महाव्रीहीणाम् । ततो वै स ज्यैष्ठ्यं देवानामभ्यजयत् । ज्यैष्ठ्यꣳ ह वै समानानामभिजयति । य एतेन हविषा यजते । य उ चैनदेवं वेद । सोऽत्र जुहोति । इन्द्रा य स्वाहा ज्येष्ठायै स्वाहा ज्यैष्ठ्याय स्वाहाभिजित्यै स्वाहेति २ प्रजापतिर्वा अकामयत । मूलं प्रजां विन्देयेति । स एतं प्रजापतये मूलाय चरुं निरवपत् । ततो वै स मूलं प्रजामविन्दत । मूलꣳ ह वै प्रजां विन्दते । य एतेन हविषा यजते । य उ चैनदेवं वेद । सोऽत्र जुहोति । प्रजापतये स्वाहा मूलाय स्वाहा । प्रजायै स्वाहेति ३ आपो वा अकामयन्त । समुद्रं काममभिजयेमेति । ता एतमद्भ्योऽषाढाभ्यश्चरुं निरवपन्न् । ततो वै ताः समुद्रं काममभ्यजयन् । समुद्रं ह वै काममभिजयति । य एतेन हविषा यजते । य उ चैनदेवं वेद । सोऽत्र जुहोति । अद्भ्यः स्वाहाऽषाढाभ्यः स्वाहा । समुद्राय स्वाहा कामाय स्वाहा । अभिजित्यै स्वाहेति ४ विश्वे वै देवा अकामयन्त । अनपजय्यं जयेमेति । त एतं विश्वेभ्यो देवेभ्योऽषाढाभ्यश्चरुं निरवपन् । ततो वै तेऽनपजय्यमजयन्न् । अनपजय्यꣳ ह वै जयति । य एतेन हविषा यजते । य उ चैनदेवं वेद । सोऽत्र जुहोति । विश्वेभ्यो देवेभ्यः स्वाहाऽषाढाभ्यः स्वाहा । अनपजय्याय स्वाहा जित्यै स्वाहेति ५ ब्रह्म वा अकामयत । ब्रह्मलोकमभिजयेयमिति । तदेतं ब्रह्मणेऽभिजिते चरुं निरवपत् । ततो वै तद्ब्रह्मलोकमभ्यजयत् । ब्रह्मलोकꣳ ह वा अभिजयति । य एतेन हविषा यजते । य उ चैनदेवं वेद । सोऽत्र जुहोति । ब्रह्मणे स्वाहाभिजिते स्वाहा । ब्रह्मलोकाय स्वाहाभिजित्यै स्वाहेति ६ विष्णुर्वा अकामयत । पुण्यꣳ श्लोकꣳ शृण्वीय । न मा पापी कीर्तिरागच्छेदिति । स एतं विष्णवे श्रोणायै पुरोडाशं त्रिकपालं निरवपत् । ततो वै स पुण्यꣳ श्लोकमशृणुत । नैनं पापी कीर्तिरागच्छत् । पुण्यꣳ ह वै श्लोकꣳ शृणुते । नैनं पापी कीर्तिरागच्छति । य एतेन हविषा यजते । य उ चैनदेवं वेद । सोऽत्र जुहोति । विष्णवे स्वाहा श्रोणायै स्वाहा । श्लोकाय स्वाहा श्रुताय स्वाहेति ७ वसवो वा अकामयन्त । अग्रं देवतानां परीयामेति । त एतं वसुभ्यः श्रविष्ठाभ्यः पुरोडाशमष्टाकपालं निरवपन् । ततो वै तेऽग्रं देवतानां पर्यायन्न् । अग्रꣳ ह वै समानानां पर्येति । य एतेन हविषा यजते । य उ चैनदेवं वेद । सोऽत्र जुहोति । वसुभ्यः स्वाहा श्रविष्ठाभ्यः स्वाहा । अग्राय स्वाहा परीत्यै स्वाहेति ८ इन्द्रो वा अकामयत । दृढोऽशिथिलः स्यामिति । स एतं वरुणाय शतभिषजे भेषजेभ्यः पुरोडाशं दशकपालं निरवपत्कृष्णानां व्रीहीणाम् । ततो वै स दृढोऽशिथिलोऽभवत् । दृढो ह वा अशिथिलो भवति । य एतेन हविषा यजते । य उ चैनदेवं वेद । सोऽत्र जुहोति । वरुणाय स्वाहा शतभिषजे स्वाहा । भेषजेभ्यः स्वाहेति ९ अजो वा एकपादकामयत । तेजस्वी ब्रह्मवर्चसी स्यामिति । स एतमजायैकपदे प्रोष्ठपदेभ्यश्चरुं निरवपत् । ततो वै स तेजस्वी ब्रह्मवर्चस्यभवत् । तेजस्वी ह वै ब्रह्मवर्चसी भवति । य एतेन हविषा यजते । य उ चैनदेवं वेद । सोऽत्र जुहोति । अजायैकपदे स्वाहा प्रोष्ठपदेभ्यः स्वाहा । तेजसे स्वाहा ब्रह्मवर्चसाय स्वाहेति १० अहिर्वै बुध्नियोऽकामयत । इमां प्रतिष्ठां विन्देयेति । स एतमहये बुध्नियाय प्रोष्ठपदेभ्यः पुरोडाशं भूमिकपालं निरवपत् । ततो वै स इमां प्रतिष्ठामविन्दत । इमाꣳ ह वै प्रतिष्ठां विन्दते । य एतेन हविषा यजते । य उ चैनदेवं वेद । सोऽत्र जुहोति । अहये बुध्नियाय स्वाहा प्रोष्ठपदेभ्यः स्वाहा । प्रतिष्ठायै स्वाहेति ११ पूषा वा अकामयत । पशुमान्त्स्यामिति । स एतं पूष्णे रेवत्यै चरुं निरवपत् । ततो वै स पशुमानभवत् । पशुमान्ह वै भवति । य एतेन हविषा यजते । य उ चैनदेवं वेद । सोऽत्र जुहोति । पूष्णे स्वाहा रेवत्यै स्वाहा । पशुभ्यः स्वाहेति १२ अश्विनौ वा अकामयेताम् । श्रोत्रस्विनावबधिरौ स्यावेति । तवेतमश्विभ्यामश्वयुग्भ्यां पुरोडाशं द्विकपालं निरवपताम् । ततो वै तौ श्रोत्रस्विनावबधिरावभवताम् । श्रोत्रस्वी ह वा अबधिरो भवति । य एतेन हविषा यजते । य उ चैनदेवं वेद । सोऽत्र जुहोति । अश्विभ्याꣳ स्वाहाश्वयुग्भ्याꣳ स्वाहा । श्रोत्राय स्वाहा श्रुत्यै स्वाहेति १३ यमो वा अकामयत । पितृणाꣳ राज्यमभिजयेयमिति । स एतं यमा-यापभरणीभ्यश्चरुं निरवपत् । ततो वै स पितृणाꣳ राज्यमभ्यजयत् । समानानाꣳ ह वै राज्यमभिजयति । य एतेन हविषा यजते । य उ चैनदेवं वेद । सोऽत्र जुहोति । यमाय स्वाहापभरणीभ्यः स्वाहा । राज्याय स्वाहाभिजित्यै स्वाहेति १४ अथैतदमावास्याया आज्यं निर्वपति । कामो वा अमावास्या । काम आज्यम् । कामेनैव कामꣳ समर्धयति । क्षिप्रमेनꣳ स काम उपनमति । येन कामेन यजते । सोऽत्र जुहोति । अमावास्यायै स्वाहा कामाय स्वाहागत्यै स्वाहेति १५
mitro vā akāmayata | mitradheyameṣu lokeṣvabhijayeyamiti | sa etaṃ mitrāyānūrādhebhyaścaruṃ niravapat | tato vai sa mitradheyameṣu lokeṣvabhyajayat | mitradheyam̐ ha vā eṣu lokeṣvabhijayati | ya etena haviṣā yajate | ya u cainadevaṃ veda | so'tra juhoti | mitrāya svāhānūrādhebhyaḥ svāhā | mitradheyāya svāhābhijityai svāheti 1 indro vā akāmayata | jyaiṣṭhyaṃ devānāmabhijayeyamiti | sa etamindrā ya jyeṣṭhāyai puroḍāśamekādaśakapālaṃ niravapanmahāvrīhīṇām | tato vai sa jyaiṣṭhyaṃ devānāmabhyajayat | jyaiṣṭhyam̐ ha vai samānānāmabhijayati | ya etena haviṣā yajate | ya u cainadevaṃ veda | so'tra juhoti | indrā ya svāhā jyeṣṭhāyai svāhā jyaiṣṭhyāya svāhābhijityai svāheti 2 prajāpatirvā akāmayata | mūlaṃ prajāṃ vindeyeti | sa etaṃ prajāpataye mūlāya caruṃ niravapat | tato vai sa mūlaṃ prajāmavindata | mūlam̐ ha vai prajāṃ vindate | ya etena haviṣā yajate | ya u cainadevaṃ veda | so'tra juhoti | prajāpataye svāhā mūlāya svāhā | prajāyai svāheti 3 āpo vā akāmayanta | samudraṃ kāmamabhijayemeti | tā etamadbhyo'ṣāḍhābhyaścaruṃ niravapann | tato vai tāḥ samudraṃ kāmamabhyajayan | samudraṃ ha vai kāmamabhijayati | ya etena haviṣā yajate | ya u cainadevaṃ veda | so'tra juhoti | adbhyaḥ svāhā'ṣāḍhābhyaḥ svāhā | samudrāya svāhā kāmāya svāhā | abhijityai svāheti 4 viśve vai devā akāmayanta | anapajayyaṃ jayemeti | ta etaṃ viśvebhyo devebhyo'ṣāḍhābhyaścaruṃ niravapan | tato vai te'napajayyamajayann | anapajayyam̐ ha vai jayati | ya etena haviṣā yajate | ya u cainadevaṃ veda | so'tra juhoti | viśvebhyo devebhyaḥ svāhā'ṣāḍhābhyaḥ svāhā | anapajayyāya svāhā jityai svāheti 5 brahma vā akāmayata | brahmalokamabhijayeyamiti | tadetaṃ brahmaṇe'bhijite caruṃ niravapat | tato vai tadbrahmalokamabhyajayat | brahmalokam̐ ha vā abhijayati | ya etena haviṣā yajate | ya u cainadevaṃ veda | so'tra juhoti | brahmaṇe svāhābhijite svāhā | brahmalokāya svāhābhijityai svāheti 6 viṣṇurvā akāmayata | puṇyam̐ ślokam̐ śṛṇvīya | na mā pāpī kīrtirāgacchediti | sa etaṃ viṣṇave śroṇāyai puroḍāśaṃ trikapālaṃ niravapat | tato vai sa puṇyam̐ ślokamaśṛṇuta | nainaṃ pāpī kīrtirāgacchat | puṇyam̐ ha vai ślokam̐ śṛṇute | nainaṃ pāpī kīrtirāgacchati | ya etena haviṣā yajate | ya u cainadevaṃ veda | so'tra juhoti | viṣṇave svāhā śroṇāyai svāhā | ślokāya svāhā śrutāya svāheti 7 vasavo vā akāmayanta | agraṃ devatānāṃ parīyāmeti | ta etaṃ vasubhyaḥ śraviṣṭhābhyaḥ puroḍāśamaṣṭākapālaṃ niravapan | tato vai te'graṃ devatānāṃ paryāyann | agram̐ ha vai samānānāṃ paryeti | ya etena haviṣā yajate | ya u cainadevaṃ veda | so'tra juhoti | vasubhyaḥ svāhā śraviṣṭhābhyaḥ svāhā | agrāya svāhā parītyai svāheti 8 indro vā akāmayata | dṛḍho'śithilaḥ syāmiti | sa etaṃ varuṇāya śatabhiṣaje bheṣajebhyaḥ puroḍāśaṃ daśakapālaṃ niravapatkṛṣṇānāṃ vrīhīṇām | tato vai sa dṛḍho'śithilo'bhavat | dṛḍho ha vā aśithilo bhavati | ya etena haviṣā yajate | ya u cainadevaṃ veda | so'tra juhoti | varuṇāya svāhā śatabhiṣaje svāhā | bheṣajebhyaḥ svāheti 9 ajo vā ekapādakāmayata | tejasvī brahmavarcasī syāmiti | sa etamajāyaikapade proṣṭhapadebhyaścaruṃ niravapat | tato vai sa tejasvī brahmavarcasyabhavat | tejasvī ha vai brahmavarcasī bhavati | ya etena haviṣā yajate | ya u cainadevaṃ veda | so'tra juhoti | ajāyaikapade svāhā proṣṭhapadebhyaḥ svāhā | tejase svāhā brahmavarcasāya svāheti 10 ahirvai budhniyo'kāmayata | imāṃ pratiṣṭhāṃ vindeyeti | sa etamahaye budhniyāya proṣṭhapadebhyaḥ puroḍāśaṃ bhūmikapālaṃ niravapat | tato vai sa imāṃ pratiṣṭhāmavindata | imām̐ ha vai pratiṣṭhāṃ vindate | ya etena haviṣā yajate | ya u cainadevaṃ veda | so'tra juhoti | ahaye budhniyāya svāhā proṣṭhapadebhyaḥ svāhā | pratiṣṭhāyai svāheti 11 pūṣā vā akāmayata | paśumāntsyāmiti | sa etaṃ pūṣṇe revatyai caruṃ niravapat | tato vai sa paśumānabhavat | paśumānha vai bhavati | ya etena haviṣā yajate | ya u cainadevaṃ veda | so'tra juhoti | pūṣṇe svāhā revatyai svāhā | paśubhyaḥ svāheti 12 aśvinau vā akāmayetām | śrotrasvināvabadhirau syāveti | tavetamaśvibhyāmaśvayugbhyāṃ puroḍāśaṃ dvikapālaṃ niravapatām | tato vai tau śrotrasvināvabadhirāvabhavatām | śrotrasvī ha vā abadhiro bhavati | ya etena haviṣā yajate | ya u cainadevaṃ veda | so'tra juhoti | aśvibhyām̐ svāhāśvayugbhyām̐ svāhā | śrotrāya svāhā śrutyai svāheti 13 yamo vā akāmayata | pitṛṇām̐ rājyamabhijayeyamiti | sa etaṃ yamā-yāpabharaṇībhyaścaruṃ niravapat | tato vai sa pitṛṇām̐ rājyamabhyajayat | samānānām̐ ha vai rājyamabhijayati | ya etena haviṣā yajate | ya u cainadevaṃ veda | so'tra juhoti | yamāya svāhāpabharaṇībhyaḥ svāhā | rājyāya svāhābhijityai svāheti 14 athaitadamāvāsyāyā ājyaṃ nirvapati | kāmo vā amāvāsyā | kāma ājyam | kāmenaiva kāmam̐ samardhayati | kṣipramenam̐ sa kāma upanamati | yena kāmena yajate | so'tra juhoti | amāvāsyāyai svāhā kāmāya svāhāgatyai svāheti 15
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.