परिवेषो वा एष वनस्पतीनाम् । यदुपवेषः । य एवं वेद । विन्दते परिवेष्टारम् । तमुत्करे । यं देवा मनुष्येषु । उपवेषमधारयन् । ये अस्मदपचेतसः । तानस्मभ्यमिहाकुरु । उपवेषोपविड्ढि नः १ प्रजां पुष्टिमथो धनम् । द्विपदो नश्चतुष्पदः । ध्रुवाननपगान्कुर्विति पुरस्तात्प्रत्यञ्चमुपगूहति । तस्मात्पुरस्तात्प्रत्यञ्चः शूद्रा अवस्यन्ति । स्थविमत उपगूहति । अप्रतिवादिन एवैनान्कुरुते । धृष्टिर्वा उपवेषः । शुचर्तो वज्रो ब्रह्मणा सँ शितः । योपवेषे शुक् । सामुमृच्छतु यं द्विष्म इति २ अथास्मै नामगृह्य प्रहरति । निरमुं नुद ओकसः । सपत्नो यः पृतन्यति । निर्बाध्येन हविषा । इन्द्र एणं पराशरीत् । इहि तिस्रः परावतः । इहि पञ्च जनाँ अति । इहि तिस्रोऽति रोचना । यावत् । सूर्यो असद्दिवि । परमां त्वा परावतम् ३ इन्द्रो नयतु वृत्रहा । यतो न पुनरायसि । शश्वतीभ्यः समाभ्य इति । त्रिवृद्वा एष वज्रो ब्रह्मणा सँ शितः । शुचैवैनं विद्ध्वा । एभ्यो लोकेभ्यो निर्णुद्य । वज्रेण ब्रह्मणा स्तृणुते । हतोऽसाववधिष्मामुमित्याह स्तृत्यै । यं द्विष्यात्तं ध्यायेत् । शुचैवैनमर्पयति ७९ ४
pariveṣo vā eṣa vanaspatīnām | yadupaveṣaḥ | ya evaṃ veda | vindate pariveṣṭāram | tamutkare | yaṃ devā manuṣyeṣu | upaveṣamadhārayan | ye asmadapacetasaḥ | tānasmabhyamihākuru | upaveṣopaviḍḍhi naḥ 1 prajāṃ puṣṭimatho dhanam | dvipado naścatuṣpadaḥ | dhruvānanapagānkurviti purastātpratyañcamupagūhati | tasmātpurastātpratyañcaḥ śūdrā avasyanti | sthavimata upagūhati | aprativādina evainānkurute | dhṛṣṭirvā upaveṣaḥ | śucarto vajro brahmaṇā sa~ śitaḥ | yopaveṣe śuk | sāmumṛcchatu yaṃ dviṣma iti 2 athāsmai nāmagṛhya praharati | niramuṃ nuda okasaḥ | sapatno yaḥ pṛtanyati | nirbādhyena haviṣā | indra eṇaṃ parāśarīt | ihi tisraḥ parāvataḥ | ihi pañca janā~ ati | ihi tisro'ti rocanā | yāvat | sūryo asaddivi | paramāṃ tvā parāvatam 3 indro nayatu vṛtrahā | yato na punarāyasi | śaśvatībhyaḥ samābhya iti | trivṛdvā eṣa vajro brahmaṇā sa~ śitaḥ | śucaivainaṃ viddhvā | ebhyo lokebhyo nirṇudya | vajreṇa brahmaṇā stṛṇute | hato'sāvavadhiṣmāmumityāha stṛtyai | yaṃ dviṣyāttaṃ dhyāyet | śucaivainamarpayati 79 4
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.