यो वा अयथादेवतं यज्ञमुपचरति । आ देवताभ्यो वृश्च्यते । पापीयान्भवति । यो यथादेवतम् । न देवताभ्य आवृश्च्यते । वसीयान्भवति । वारुणो वै पाशः । इमं विष्यामि वरुणस्य पाशमित्याह । वरुणपाशादेवैनां मुञ्चति । सवितृप्रसूतो यथादेवतम् १ न देवताभ्य आवृश्च्यते । वसीयान्भवति । धातुश्च योनौ सुकृतस्य लोक इत्याह । अग्निर्वै धाता । पुण्यं कर्म सुकृतस्य लोकः । अग्निरेवैनां धाता । पुण्ये कर्मणि सुकृतस्य लोके दधाति । स्योनं मे सह पत्या करोमीत्याह । आत्मनश्च यजमानस्य चानात्यै संत्वाय । समायुषा संप्रजयेत्याह २ आशिषमेवैतामाशास्ते पूर्णपात्रे । अन्ततोऽनुष्टुभा । चतुष्पद्वा एतच्छन्दः प्रतिष्ठितं पत्नियै पूर्णपात्रे भवति । अस्मिँ ल्लोके प्रतितिष्ठानीति । अस्मिन्नेव लोके प्रतितिष्ठति । अथो वाग्वा अनुष्टुक् । वाङ्मिथुनम् । आपो रेतः प्रजननम् । एतस्माद्वै मिथुनाद्विद्योतमानः स्तनयन्वर्षति । रेतः सिञ्चन् ३ प्रजाः प्रजनयन् । यद्वै यज्ञस्य ब्रह्मणा युज्यते । ब्रह्मणा वै तस्य विमोकः । अद्भिः शान्तिः । विमुक्तं वा एतर्हि योक्त्रं ब्रह्मणा । आदायैनत्पत्नी सहाप उपगृह्णीते शान्त्यै । अञ्जलौ पूर्णपात्रमानयति । रेत एवास्यां प्रजां दधाति । प्रजया हि मनुष्यः पूर्णः । मुखं विमृष्टे । अवभृथस्यैव रूपं कृत्वोत्तिष्ठति ४
yo vā ayathādevataṃ yajñamupacarati | ā devatābhyo vṛścyate | pāpīyānbhavati | yo yathādevatam | na devatābhya āvṛścyate | vasīyānbhavati | vāruṇo vai pāśaḥ | imaṃ viṣyāmi varuṇasya pāśamityāha | varuṇapāśādevaināṃ muñcati | savitṛprasūto yathādevatam 1 na devatābhya āvṛścyate | vasīyānbhavati | dhātuśca yonau sukṛtasya loka ityāha | agnirvai dhātā | puṇyaṃ karma sukṛtasya lokaḥ | agnirevaināṃ dhātā | puṇye karmaṇi sukṛtasya loke dadhāti | syonaṃ me saha patyā karomītyāha | ātmanaśca yajamānasya cānātyai saṃtvāya | samāyuṣā saṃprajayetyāha 2 āśiṣamevaitāmāśāste pūrṇapātre | antato'nuṣṭubhā | catuṣpadvā etacchandaḥ pratiṣṭhitaṃ patniyai pūrṇapātre bhavati | asmi~ lloke pratitiṣṭhānīti | asminneva loke pratitiṣṭhati | atho vāgvā anuṣṭuk | vāṅmithunam | āpo retaḥ prajananam | etasmādvai mithunādvidyotamānaḥ stanayanvarṣati | retaḥ siñcan 3 prajāḥ prajanayan | yadvai yajñasya brahmaṇā yujyate | brahmaṇā vai tasya vimokaḥ | adbhiḥ śāntiḥ | vimuktaṃ vā etarhi yoktraṃ brahmaṇā | ādāyainatpatnī sahāpa upagṛhṇīte śāntyai | añjalau pūrṇapātramānayati | reta evāsyāṃ prajāṃ dadhāti | prajayā hi manuṣyaḥ pūrṇaḥ | mukhaṃ vimṛṣṭe | avabhṛthasyaiva rūpaṃ kṛtvottiṣṭhati 4
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.