उदस्तांप्सीत्सविता मित्रो अर्यमा । सर्वानमित्रानवधीद्युगेन । बृहन्तं मामकरद्वीरवन्तम् । रथंतरे श्रयस्व स्वाहा पृथिव्याम् । वामदेव्ये श्रयस्व स्वाहान्तरिक्षे । बृहति श्रयस्व स्वाहा दिवि । बृहता त्वोपस्तभ्नोमि । आ त्वा ददे यशसे वीर्याय च । अस्मास्वघ्निया यूयं दधाथेन्द्रि यं पयः । यस्ते द्र प्सो यस्त उदर्षः १ दैव्यः केतुर्विश्वं भुवनमाविवेश । स नः पाह्यरिष्ट्यै स्वाहा । अनु मा सर्वो यज्ञोऽयमेतु । विश्वे देवा मरुतः सामार्कः । आप्रियश्छन्दाꣳ सि निविदो यजूꣳ षि । अस्यै पृथिव्यै यद्यज्ञियम् । प्रजापतेर्वर्तनिमनुवर्तस्व । अनु वीरैरनुराध्याम गोभिः । अन्वश्वैरनु सर्वैरु पुष्टैः । अनु प्रजयान्विन्द्रि येण २ देवा नो यज्ञमृजुधा नयन्तु । प्रति क्षत्रे प्रति तिष्ठामि राष्ट्रे । प्रत्यश्वेषु प्रतितिष्ठामि गोषु । प्रति प्रजायां प्रतितिष्ठामि भव्ये । विश्वमन्याभिवावृधे । तदन्यस्यामधि श्रितम् । दिवे च विश्वकर्मणे । पृथिव्यै चाकरं नमः । अस्कान्द्यौः पृथिवीम् । अस्कानृषभो युवा गाः ३ स्कन्नेमा विश्वा भुवना । स्कन्नो यज्ञः प्रजनयतु । अस्कानजनि प्राजनि । आ स्कन्नाज्जायते वृषा । स्कन्नात्प्रजनिषीमहि । ये देवा येषामिदं भागधेयं बभूव । येषां प्रयाजा उतानूयाजाः । इन्द्र ज्येष्ठेभ्यो वरुणराजभ्यः । अग्निहोतृभ्यो देवेभ्यः स्वाहा । उत त्या नो दिवा मतिः ४ अदितिरूत्यागमत् । सा शन्ताची मयस्करत् । अप स्रिधः । उत त्या दैव्या भिषजा । शं नस्करतो अश्विना । यूयातामस्मद्र पः । अप स्रिधः । शमग्निरग्निभिस्करत् । शं नस्तपतु सूर्यः । शं वातो वात्वरपाः ५ अप स्रिधः । तदित्पदं न विचिकेत विद्वान् । यन्मृतः पुनरप्येति जीवान् । त्रिवृद्यद्भुवनस्य रथवृत् । जीवो गर्भो न मृतः स जीवात् । प्रत्यस्मै पिपीषते । विश्वानि विदुषे भर । अरंगमाय जग्मवे । अपश्चाद्दध्वने नरे । इन्दुरिन्दुमवागात् । इन्दोरिन्द्रो ऽपात् । तस्य त इन्दविन्द्र पीतस्य मधुमतः । उपहूतस्योपहूतो भक्षयामि ६
udastāṃpsītsavitā mitro aryamā | sarvānamitrānavadhīdyugena | bṛhantaṃ māmakaradvīravantam | rathaṃtare śrayasva svāhā pṛthivyām | vāmadevye śrayasva svāhāntarikṣe | bṛhati śrayasva svāhā divi | bṛhatā tvopastabhnomi | ā tvā dade yaśase vīryāya ca | asmāsvaghniyā yūyaṃ dadhāthendri yaṃ payaḥ | yaste dra pso yasta udarṣaḥ 1 daivyaḥ keturviśvaṃ bhuvanamāviveśa | sa naḥ pāhyariṣṭyai svāhā | anu mā sarvo yajño'yametu | viśve devā marutaḥ sāmārkaḥ | āpriyaśchandām̐ si nivido yajūm̐ ṣi | asyai pṛthivyai yadyajñiyam | prajāpatervartanimanuvartasva | anu vīrairanurādhyāma gobhiḥ | anvaśvairanu sarvairu puṣṭaiḥ | anu prajayānvindri yeṇa 2 devā no yajñamṛjudhā nayantu | prati kṣatre prati tiṣṭhāmi rāṣṭre | pratyaśveṣu pratitiṣṭhāmi goṣu | prati prajāyāṃ pratitiṣṭhāmi bhavye | viśvamanyābhivāvṛdhe | tadanyasyāmadhi śritam | dive ca viśvakarmaṇe | pṛthivyai cākaraṃ namaḥ | askāndyauḥ pṛthivīm | askānṛṣabho yuvā gāḥ 3 skannemā viśvā bhuvanā | skanno yajñaḥ prajanayatu | askānajani prājani | ā skannājjāyate vṛṣā | skannātprajaniṣīmahi | ye devā yeṣāmidaṃ bhāgadheyaṃ babhūva | yeṣāṃ prayājā utānūyājāḥ | indra jyeṣṭhebhyo varuṇarājabhyaḥ | agnihotṛbhyo devebhyaḥ svāhā | uta tyā no divā matiḥ 4 aditirūtyāgamat | sā śantācī mayaskarat | apa sridhaḥ | uta tyā daivyā bhiṣajā | śaṃ naskarato aśvinā | yūyātāmasmadra paḥ | apa sridhaḥ | śamagniragnibhiskarat | śaṃ nastapatu sūryaḥ | śaṃ vāto vātvarapāḥ 5 apa sridhaḥ | taditpadaṃ na viciketa vidvān | yanmṛtaḥ punarapyeti jīvān | trivṛdyadbhuvanasya rathavṛt | jīvo garbho na mṛtaḥ sa jīvāt | pratyasmai pipīṣate | viśvāni viduṣe bhara | araṃgamāya jagmave | apaścāddadhvane nare | indurindumavāgāt | indorindro 'pāt | tasya ta indavindra pītasya madhumataḥ | upahūtasyopahūto bhakṣayāmi 6
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.