ब्रह्म प्रतिष्ठा मनसो ब्रह्म वाचः । ब्रह्म यज्ञानाꣳ हविषामाज्यस्य । अतिरिक्तं कर्मणो यच्च हीनम् । यज्ञः पर्वाणि प्रतिरन्नेति कल्पयन् । स्वाहाकृताहुतिरेतु देवान् । आश्रावितमत्याश्रावितम् । वषट्कृतमत्यनूक्तं च यज्ञे । अतिरिक्तं कर्मणो यच्च हीनम् । यज्ञः पर्वाणि प्रतिरन्नेति कल्पयन् । स्वाहाकृताहुतिरेतु देवान् १ यद्वो देवा अतिपादयानि । वाचा चित्प्रयतं देवहेडनम् । अरायो अस्माꣳ अभि दुच्छुनायते । अन्यत्रास्मन्मरुतस्तन्निधेतन । ततं म आपस्तदु तायते पुनः । स्वादिष्ठा धीतिरुचथाय शस्यते । अयꣳ समुद्र उत विश्वभेषजः । स्वाहाकृतस्य समु तृप्णुतर्भुवः । उद्वयं तमसस्परि । ।उदु त्यं। चित्रम् २ इमं मे वरुण । तत्त्वा यामि । ।त्वं नो अग्ने । स त्वं नो अग्ने । ।त्वमग्ने अयासि । प्रजापते । ।इमं जीवेभ्यः परिधिं दधामि । मैषां नु गादपरो अर्धमेतम् । शतं जीवन्तु शरदः पुरूचीः । तिरो मृत्युं दधतां पर्वतेन । इष्टेभ्यः स्वाहा वषडनिष्टेभ्यः स्वाहा । भेषजं दुरिष्ट्यै स्वाहा निष्कृत्यै स्वाहा । दौरार्द्ध्यै स्वाहा दैवीभ्यस्तनूभ्यः स्वाहा ३ ऋद्ध्यै स्वाहा समृद्ध्यै स्वाहा । यत इन्द्र भयामहे । ततो नो अभयं कृधि । मघवञ्शग्धि तव तन्न ऊतये । वि द्विषो वि मृधो जहि । स्वस्तिदा विशस्पतिः । वृत्रहा विमृधो वशी । वृषेन्द्रः पुर एतु नः । स्वस्तिदा अभयंकरः । आभिर्गीर्भिर्यदतो न ऊनम् ४ आप्यायय हरिवो वर्धमानः । यदा स्तोतृभ्यो महि गोत्रा रुजासि । भूयिष्ठभाजो अध ते स्याम । अनाज्ञातं यदाज्ञातम् । यज्ञस्य क्रियते मिथु । अग्ने तदस्य कल्पय । त्वꣳ हि वेत्थ यथातथम् । पुरुषसंमितो यज्ञः । यज्ञः पुरुषसंमितः । अग्ने तदस्य कल्पय । त्वꣳ हि वेत्थ यथातथम् । यत्पाकत्रा मनसा दीनदक्षा न । यज्ञस्य मन्वते मर्तासः । अग्निष्टद्धोता क्रतुविद्विजानन् । यजिष्ठो देवाꣳ ऋतुशो यजाति ५
brahma pratiṣṭhā manaso brahma vācaḥ | brahma yajñānām̐ haviṣāmājyasya | atiriktaṃ karmaṇo yacca hīnam | yajñaḥ parvāṇi pratiranneti kalpayan | svāhākṛtāhutiretu devān | āśrāvitamatyāśrāvitam | vaṣaṭkṛtamatyanūktaṃ ca yajñe | atiriktaṃ karmaṇo yacca hīnam | yajñaḥ parvāṇi pratiranneti kalpayan | svāhākṛtāhutiretu devān 1 yadvo devā atipādayāni | vācā citprayataṃ devaheḍanam | arāyo asmām̐ abhi ducchunāyate | anyatrāsmanmarutastannidhetana | tataṃ ma āpastadu tāyate punaḥ | svādiṣṭhā dhītirucathāya śasyate | ayam̐ samudra uta viśvabheṣajaḥ | svāhākṛtasya samu tṛpṇutarbhuvaḥ | udvayaṃ tamasaspari | |udu tyaṃ| citram 2 imaṃ me varuṇa | tattvā yāmi | |tvaṃ no agne | sa tvaṃ no agne | |tvamagne ayāsi | prajāpate | |imaṃ jīvebhyaḥ paridhiṃ dadhāmi | maiṣāṃ nu gādaparo ardhametam | śataṃ jīvantu śaradaḥ purūcīḥ | tiro mṛtyuṃ dadhatāṃ parvatena | iṣṭebhyaḥ svāhā vaṣaḍaniṣṭebhyaḥ svāhā | bheṣajaṃ duriṣṭyai svāhā niṣkṛtyai svāhā | daurārddhyai svāhā daivībhyastanūbhyaḥ svāhā 3 ṛddhyai svāhā samṛddhyai svāhā | yata indra bhayāmahe | tato no abhayaṃ kṛdhi | maghavañśagdhi tava tanna ūtaye | vi dviṣo vi mṛdho jahi | svastidā viśaspatiḥ | vṛtrahā vimṛdho vaśī | vṛṣendraḥ pura etu naḥ | svastidā abhayaṃkaraḥ | ābhirgīrbhiryadato na ūnam 4 āpyāyaya harivo vardhamānaḥ | yadā stotṛbhyo mahi gotrā rujāsi | bhūyiṣṭhabhājo adha te syāma | anājñātaṃ yadājñātam | yajñasya kriyate mithu | agne tadasya kalpaya | tvam̐ hi vettha yathātatham | puruṣasaṃmito yajñaḥ | yajñaḥ puruṣasaṃmitaḥ | agne tadasya kalpaya | tvam̐ hi vettha yathātatham | yatpākatrā manasā dīnadakṣā na | yajñasya manvate martāsaḥ | agniṣṭaddhotā kratuvidvijānan | yajiṣṭho devām̐ ṛtuśo yajāti 5
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.