यत्ते ग्राव्णा चिच्छिदुः सोम राजन् । प्रियाण्यङ्गानि स्वधिता परूꣳ षि । तत्संधत्स्वाज्येनोत वर्धयस्व । अनागसो अधमित्संक्षयेम । यत्ते ग्रावा बाहुच्युतो अचुच्यवुः । नरो यत्ते दुदुहुर्दक्षिणेन । तत्त आप्यायतां तत्ते । निष्ट्यायतां देव सोम । यत्ते त्वचं बिभिदुर्यच्च योनिम् । यदास्थानात्प्रच्युतो वेनसि त्मना १ त्वया तत्सोम गुप्तमस्तु नः । सा नः संधाऽसत्परमे व्योमन् । अहाच्छरीरं पयसा समेत्य । अन्योऽन्यो भवति वर्णो अस्य । तस्मिन्वयमुपहूतास्तव स्मः । आ नो भज सदसि विश्वरूपे । नृचक्षाः सोम उत शुश्रुगस्तु । मा नो विहासीद्गिर आवृणानः । अनागास्तनुवो वावृधानः । आ नो रूपं वहतु जायमानः २ उपक्षरन्ति जुह्वो घृतेन । प्रियाण्यङ्गानि तव वर्धयन्तीः । तस्मै ते सोम नम इद्वषट्च । उप मा राजन्त्सुकृते ह्वयस्व । सं प्राणापानाभ्याꣳ समु चक्षुषा त्वम् । सꣳ श्रोत्रेण गच्छस्व सोम राजन् । यत्त आस्थितꣳ शमु तत्ते अस्तु । जानीतान्नः संगमने पथीनाम् । एतं जानीतात्परमे व्योमन् । वृकाः सधस्था विद रूपमस्य ३ यदागच्छात्पथिभिर्देवयानैः । इष्टापूर्ते कृणुतादाविरस्मै । अरिष्टो राजन्नगदः परेहि । नमस्ते अस्तु चक्षसे रघूयते । नाकमारोह सह यजमानेन । सूर्यं गच्छतात्परमे व्योमन् । अभूद्देवः सविता वन्द्यो नु नः । इदानीमह्न उपवाच्यो नृभिः । वि यो रत्ना भजति मानवेभ्यः । श्रेष्ठं नो अत्र द्र विणं यथा दधत् । उप नो मित्रावरुणाविहावतम् । अन्वादीध्याथामिह नः सखाया । आदित्यानां प्रसितिर्हेतिः । उग्रा शतापाष्ठा घ विषा परि णो वृणक्तु । आप्यायस्व । सं ते ४
yatte grāvṇā cicchiduḥ soma rājan | priyāṇyaṅgāni svadhitā parūm̐ ṣi | tatsaṃdhatsvājyenota vardhayasva | anāgaso adhamitsaṃkṣayema | yatte grāvā bāhucyuto acucyavuḥ | naro yatte duduhurdakṣiṇena | tatta āpyāyatāṃ tatte | niṣṭyāyatāṃ deva soma | yatte tvacaṃ bibhiduryacca yonim | yadāsthānātpracyuto venasi tmanā 1 tvayā tatsoma guptamastu naḥ | sā naḥ saṃdhā'satparame vyoman | ahāccharīraṃ payasā sametya | anyo'nyo bhavati varṇo asya | tasminvayamupahūtāstava smaḥ | ā no bhaja sadasi viśvarūpe | nṛcakṣāḥ soma uta śuśrugastu | mā no vihāsīdgira āvṛṇānaḥ | anāgāstanuvo vāvṛdhānaḥ | ā no rūpaṃ vahatu jāyamānaḥ 2 upakṣaranti juhvo ghṛtena | priyāṇyaṅgāni tava vardhayantīḥ | tasmai te soma nama idvaṣaṭca | upa mā rājantsukṛte hvayasva | saṃ prāṇāpānābhyām̐ samu cakṣuṣā tvam | sam̐ śrotreṇa gacchasva soma rājan | yatta āsthitam̐ śamu tatte astu | jānītānnaḥ saṃgamane pathīnām | etaṃ jānītātparame vyoman | vṛkāḥ sadhasthā vida rūpamasya 3 yadāgacchātpathibhirdevayānaiḥ | iṣṭāpūrte kṛṇutādāvirasmai | ariṣṭo rājannagadaḥ parehi | namaste astu cakṣase raghūyate | nākamāroha saha yajamānena | sūryaṃ gacchatātparame vyoman | abhūddevaḥ savitā vandyo nu naḥ | idānīmahna upavācyo nṛbhiḥ | vi yo ratnā bhajati mānavebhyaḥ | śreṣṭhaṃ no atra dra viṇaṃ yathā dadhat | upa no mitrāvaruṇāvihāvatam | anvādīdhyāthāmiha naḥ sakhāyā | ādityānāṃ prasitirhetiḥ | ugrā śatāpāṣṭhā gha viṣā pari ṇo vṛṇaktu | āpyāyasva | saṃ te 4
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.