यद्देवा देवहेडनम् । देवासश्चकृमा वयम् । आदित्यास्तस्मान्मा मुञ्चत । ऋतस्यर्तेन मामुत । देवा जीवनकाम्या यत् । वाचानृतमूदिम । अग्निर्मा तस्मादेनसः । गार्हपत्यः प्रमुञ्चतु । दुरिता यानि चकृम । करोतु मामनेनसम् १ ऋतेन द्यावापृथिवी ।ऋतेन त्वꣳ सरस्वति । ऋतान्मा मुञ्चताꣳ हसः । यदन्यकृतमारिम । सजातशꣳ सादुत वा जामिशꣳ सात् । ज्यायसः शꣳ सादुत वा कनीयसः । अनाज्ञातं देवकृतं यदेनः । तस्मात्त्वमस्मान्जातवेदो मुमुग्धि । यद्वाचा यन्मनसा । बाहुभ्यामूरुभ्यामष्ठीवद्भ्याम् २ शिश्नैर्यदनृतं चकृमा वयम् । अग्निर्मा तस्मादेनसः । यद्धस्ताभ्यां चकर किल्बिषाणि । अक्षाणां वग्नुमुपजिघ्नमानः । दूरेपश्या च राष्ट्रभृच्च । तान्यप्सरसावनुदत्तामृणानि । अदीव्यन्नृणं यदहं चकार । यद्वादास्यन्त्संजगारा जनेभ्यः । अग्निर्मा तस्मादेनसः । यन्मयि माता गर्भे सति ३ एनश्चकार यत्पिता । अग्निर्मा तस्मादेनसः । यदापिपेष मातरं पितरम् । पुत्रः प्रमुदितो धयन् । अहिꣳ सितौ पितरौ मया तत् । तदग्ने अनृणो भवामि । यदन्तरिक्षं पृथिवीमुत द्याम् । यन्मातरं पितरं वा जिहिꣳ सिम । अगिर्मा तस्मादेनसः । यदाशसा निशसा यत्पराशसा ४ यदेनश्चकृमा नूतनं यत्पुराणम् । अग्निर्मा तस्मादेनसः । अतिक्रामामि दुरितं यदेनः । जहामि रिप्रं परमे सधस्थे । यत्र यन्ति सुकृतो नापि दुष्कृतः । तमारोहामि सुकृतां नु लोकम् । त्रिते देवा अमृजतैतदेनः । त्रित एतन्मनुष्येषु मामृजे । ततो मा यदि किं चिदानशे । अग्निर्मा तस्मादेनसः ५ गार्हपत्यः प्रमुञ्चतु । दुरिता यानि चकृम । करोतु मामनेनसम् । दिवि जाता अप्सु जाताः । या जाता ओषधीभ्यः । अथो या अग्निजा आपः । ता नः शुन्धन्तु शुन्धनीः । यदापो नक्तं दुरितं चराम । यद्वा दिवा नूतनं यत्पुराणम् । हिरण्यवर्णास्तत उत्पुनीत नः । इमं मे वरुण । तत्त्वा यामि । ।त्वं नो अग्ने । स त्वं नो अग्ने । त्वमग्ने अयासि ६
yaddevā devaheḍanam | devāsaścakṛmā vayam | ādityāstasmānmā muñcata | ṛtasyartena māmuta | devā jīvanakāmyā yat | vācānṛtamūdima | agnirmā tasmādenasaḥ | gārhapatyaḥ pramuñcatu | duritā yāni cakṛma | karotu māmanenasam 1 ṛtena dyāvāpṛthivī |ṛtena tvam̐ sarasvati | ṛtānmā muñcatām̐ hasaḥ | yadanyakṛtamārima | sajātaśam̐ sāduta vā jāmiśam̐ sāt | jyāyasaḥ śam̐ sāduta vā kanīyasaḥ | anājñātaṃ devakṛtaṃ yadenaḥ | tasmāttvamasmānjātavedo mumugdhi | yadvācā yanmanasā | bāhubhyāmūrubhyāmaṣṭhīvadbhyām 2 śiśnairyadanṛtaṃ cakṛmā vayam | agnirmā tasmādenasaḥ | yaddhastābhyāṃ cakara kilbiṣāṇi | akṣāṇāṃ vagnumupajighnamānaḥ | dūrepaśyā ca rāṣṭrabhṛcca | tānyapsarasāvanudattāmṛṇāni | adīvyannṛṇaṃ yadahaṃ cakāra | yadvādāsyantsaṃjagārā janebhyaḥ | agnirmā tasmādenasaḥ | yanmayi mātā garbhe sati 3 enaścakāra yatpitā | agnirmā tasmādenasaḥ | yadāpipeṣa mātaraṃ pitaram | putraḥ pramudito dhayan | ahim̐ sitau pitarau mayā tat | tadagne anṛṇo bhavāmi | yadantarikṣaṃ pṛthivīmuta dyām | yanmātaraṃ pitaraṃ vā jihim̐ sima | agirmā tasmādenasaḥ | yadāśasā niśasā yatparāśasā 4 yadenaścakṛmā nūtanaṃ yatpurāṇam | agnirmā tasmādenasaḥ | atikrāmāmi duritaṃ yadenaḥ | jahāmi ripraṃ parame sadhasthe | yatra yanti sukṛto nāpi duṣkṛtaḥ | tamārohāmi sukṛtāṃ nu lokam | trite devā amṛjataitadenaḥ | trita etanmanuṣyeṣu māmṛje | tato mā yadi kiṃ cidānaśe | agnirmā tasmādenasaḥ 5 gārhapatyaḥ pramuñcatu | duritā yāni cakṛma | karotu māmanenasam | divi jātā apsu jātāḥ | yā jātā oṣadhībhyaḥ | atho yā agnijā āpaḥ | tā naḥ śundhantu śundhanīḥ | yadāpo naktaṃ duritaṃ carāma | yadvā divā nūtanaṃ yatpurāṇam | hiraṇyavarṇāstata utpunīta naḥ | imaṃ me varuṇa | tattvā yāmi | |tvaṃ no agne | sa tvaṃ no agne | tvamagne ayāsi 6
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.